Deuteronomy 32 האזינו השׁמים ואדברה ותשׁמע הארץ אמרי פי׃

HOT⁽ⁱ⁾ ¹ האזינו השׁמים ואדברה ותשׁמע הארץ אמרי פי׃ ² יערף כמטר לקחי תזל כטל אמרתי כשׂעירם עלי דשׁא וכרביבים עלי עשׂב׃ ³ כי שׁם יהוה אקרא הבו גדל לאלהינו׃ ⁴ הצור תמים פעלו כי כל דרכיו משׁפט אל אמונה ואין עול צדיק וישׁר הוא׃ ⁵ שׁחת לו לא בניו מומם דור עקשׁ ופתלתל׃ ⁶ ה ליהוה תגמלו זאת עם נבל ולא חכם הלוא הוא אביך קנך הוא עשׂך ויכננך׃ ⁷ זכר ימות עולם בינו שׁנות דר ודר שׁאל אביך ויגדך זקניך ויאמרו׃ ⁸ בהנחל עליון גוים בהפרידו בני אדם יצב גבלת עמים למספר בני ישׂראל׃ ⁹ כי חלק יהוה עמו יעקב חבל נחלתו׃ ¹⁰ ימצאהו בארץ מדבר ובתהו ילל ישׁמן יסבבנהו יבוננהו יצרנהו כאישׁון עינו׃ ¹¹ כנשׁר יעיר קנו על גוזליו ירחף יפרשׂ כנפיו יקחהו ישׂאהו על אברתו׃ ¹² יהוה בדד ינחנו ואין עמו אל נכר׃ ¹³ ירכבהו על במותי ארץ ויאכל תנובת שׂדי וינקהו דבשׁ מסלע ושׁמן מחלמישׁ צור׃ ¹⁴ חמאת בקר וחלב צאן עם חלב כרים ואילים בני בשׁן ועתודים עם חלב כליות חטה ודם ענב תשׁתה חמר׃ ¹⁵ וישׁמן ישׁרון ויבעט שׁמנת עבית כשׂית ויטשׁ אלוה עשׂהו וינבל צור ישׁעתו׃ ¹⁶ יקנאהו בזרים בתועבת יכעיסהו׃ ¹⁷ יזבחו לשׁדים לא אלה אלהים לא ידעום חדשׁים מקרב באו לא שׂערום אבתיכם׃ ¹⁸ צור ילדך תשׁי ותשׁכח אל מחללך׃ ¹⁹ וירא יהוה וינאץ מכעס בניו ובנתיו׃ ²⁰ ויאמר אסתירה פני מהם אראה מה אחריתם כי דור תהפכת המה בנים לא אמן׃ ²¹ הם קנאוני בלא אל כעסוני בהבליהם ואני אקניאם בלא עם בגוי נבל אכעיסם׃ ²² כי אשׁ קדחה באפי ותיקד עד שׁאול תחתית ותאכל ארץ ויבלה ותלהט מוסדי הרים׃ ²³ אספה עלימו רעות חצי אכלה׃ ²⁴ מזי רעב ולחמי רשׁף וקטב מרירי ושׁן בהמת אשׁלח בם עם חמת זחלי עפר׃ ²⁵ מחוץ תשׁכל חרב ומחדרים אימה גם בחור גם בתולה יונק עם אישׁ שׂיבה׃ ²⁶ אמרתי אפאיהם אשׁביתה מאנושׁ זכרם׃ ²⁷ לולי כעס אויב אגור פן ינכרו צרימו פן יאמרו ידנו רמה ולא יהוה פעל כל זאת׃ ²⁸ כי גוי אבד עצות המה ואין בהם תבונה׃ ²⁹ לו חכמו ישׂכילו זאת יבינו לאחריתם׃ ³⁰ איכה ירדף אחד אלף ושׁנים יניסו רבבה אם לא כי צורם מכרם ויהוה הסגירם׃ ³¹ כי לא כצורנו צורם ואיבינו פלילים׃ ³² כי מגפן סדם גפנם ומשׁדמת עמרה ענבמו ענבי רושׁ אשׁכלת מררת׃ ³³ חמת תנינם יינם וראשׁ פתנים אכזר׃ ³⁴ הלא הוא כמס עמדי חתום באוצרתי׃ ³⁵ לי נקם ושׁלם לעת תמוט רגלם כי קרוב יום אידם וחשׁ עתדת׃ ³⁶ כי ידין יהוה עמו ועל עבדיו יתנחם כי יראה כי אזלת יד ואפס עצור ועזוב׃ ³⁷ ואמר אי אלהימו צור חסיו׃ ³⁸ אשׁר חלב זבחימו יאכלו ישׁתו יין נסיכם יקומו ויעזרכם יהי עליכם סתרה׃ ³⁹ ראו עתה כי אני אני הוא ואין אלהים עמדי אני אמית ואחיה מחצתי ואני ארפא ואין מידי מציל׃ ⁴⁰ כי אשׂא אל שׁמים ידי ואמרתי חי אנכי לעלם׃ ⁴¹ אם שׁנותי ברק חרבי ותאחז במשׁפט ידי אשׁיב נקם לצרי ולמשׂנאי אשׁלם׃ ⁴² אשׁכיר חצי מדם וחרבי תאכל בשׂר מדם חלל ושׁביה מראשׁ פרעות אויב׃ ⁴³ הרנינו גוים עמו כי דם עבדיו יקום ונקם ישׁיב לצריו וכפר אדמתו עמו׃ ⁴⁴ ויבא משׁה וידבר את כל דברי השׁירה הזאת באזני העם הוא והושׁע בן נון׃ ⁴⁵ ויכל משׁה לדבר את כל הדברים האלה אל כל ישׂראל׃ ⁴⁶ ויאמר אלהם שׂימו לבבכם לכל הדברים אשׁר אנכי מעיד בכם היום אשׁר תצום את בניכם לשׁמר לעשׂות את כל דברי התורה הזאת׃ ⁴⁷ כי לא דבר רק הוא מכם כי הוא חייכם ובדבר הזה תאריכו ימים על האדמה אשׁר אתם עברים את הירדן שׁמה לרשׁתה׃ ⁴⁸ וידבר יהוה אל משׁה בעצם היום הזה לאמר׃ ⁴⁹ עלה אל הר העברים הזה הר נבו אשׁר בארץ מואב אשׁר על פני ירחו וראה את ארץ כנען אשׁר אני נתן לבני ישׂראל לאחזה׃ ⁵⁰ ומת בהר אשׁר אתה עלה שׁמה והאסף אל עמיך כאשׁר מת אהרן אחיך בהר ההר ויאסף אל עמיו׃ ⁵¹ על אשׁר מעלתם בי בתוך בני ישׂראל במי מריבת קדשׁ מדבר צן על אשׁר לא קדשׁתם אותי בתוך בני ישׂראל׃ ⁵² כי מנגד תראה את הארץ ושׁמה לא תבוא אל הארץ אשׁר אני נתן לבני ישׂראל׃