Mark 5:22-43

Vulgate^{(i) 22} et venit quidam de archisynagogis nomine Iairus et videns eum procidit ad pedes eius ²³ et deprecabatur eum multum dicens quoniam filia mea in extremis est veni inpone manus super eam ut salva sit et vivat ²⁴ et abiit cum illo et sequebatur eum turba multa et conprimebant illum ²⁵ et mulier quae erat in profluvio sanguinis annis duodecim ²⁶ et fuerat multa perpessa a conpluribus medicis et erogaverat omnia sua nec quicquam profecerat sed magis deterius habebat ²⁷ cum audisset de Iesu venit in turba retro et tetigit vestimentum eius ²⁸ dicebat enim quia si vel vestimentum eius tetigero salva ero ²⁹ et confestim siccatus est fons sanguinis eius et sensit corpore quod sanata esset a plaga ³⁰ et statim Iesus cognoscens in semet ipso virtutem quae exierat de eo conversus ad turbam aiebat quis tetigit vestimenta mea ³¹ et dicebant ei discipuli sui vides turbam conprimentem te et dicis quis me tetigit ³² et circumspiciebat videre eam quae hoc fecerat ³³ mulier autem timens et tremens sciens quod factum esset in se venit et procidit ante eum et dixit ei omnem veritatem ³⁴ ille autem dixit ei filia fides tua te salvam fecit vade in pace et esto sana a plaga tua ³⁵ adhuc eo loquente veniunt ab archisynagogo dicentes quia filia tua mortua est quid ultra vexas magistrum ³⁶ Iesus autem verbo quod dicebatur audito ait archisynagogo noli timere tantummodo crede ³⁷ et non admisit quemquam sequi se nisi Petrum et Iacobum et Iohannem fratrem Iacobi ³⁸ et veniunt in domum archisynagogi et videt tumultum et flentes et heiulantes multum ³⁹ et ingressus ait eis quid turbamini et ploratis puella non est mortua sed dormit ⁴⁰ et inridebant eum ipse vero eiectis omnibus adsumit patrem et matrem puellae et qui secum erant et ingreditur ubi erat puella iacens ⁴¹ et tenens manum puellae ait illi talitha cumi quod est interpretatum puella tibi dico surge ⁴² et confestim surrexit puella et ambulabat erat autem annorum duodecim et obstipuerunt stupore maximo ⁴³ et praecepit illis vehementer ut nemo id sciret et dixit dari illi manducare