Jeremiah 36 ויהי בשׁנה הרביעת ליהויקים בן יאשׁיהו מלך יהודה היה הדבר הזה אל ירמיהו מאת יהוה לאמר׃

HOT⁽ⁱ⁾ ¹ ויהי בשׁנה הרביעת ליהויקים בן יאשׁיהו מלך יהודה היה הדבר הזה אל ירמיהו מאת יהוה לאמר׃ ² קח לך מגלת ספר וכתבת אליה את כל הדברים אשׁר דברתי אליך על ישׂראל ועל יהודה ועל כל הגוים מיום דברתי אליך מימי יאשׁיהו ועד היום הזה׃ ³ אולי ישׁמעו בית יהודה את כל הרעה אשׁר אנכי חשׁב לעשׂות להם למען ישׁובו אישׁ מדרכו הרעה וסלחתי לעונם ולחטאתם׃ ⁴ ויקרא ירמיהו את ברוך בן נריה ויכתב ברוך מפי ירמיהו את כל דברי יהוה אשׁר דבר אליו על מגלת ספר׃ ⁵ ויצוה ירמיהו את ברוך לאמר אני עצור לא אוכל לבוא בית יהוה׃ ⁶ ובאת אתה וקראת במגלה אשׁר כתבת מפי את דברי יהוה באזני העם בית יהוה ביום צום וגם באזני כל יהודה הבאים מעריהם תקראם׃ ⁷ אולי תפל תחנתם לפני יהוה וישׁבו אישׁ מדרכו הרעה כי גדול האף והחמה אשׁר דבר יהוה אל העם הזה׃ ⁸ ויעשׂ ברוך בן נריה ככל אשׁר צוהו ירמיהו הנביא לקרא בספר דברי יהוה בית יהוה׃ ⁹ ויהי בשׁנה החמשׁית ליהויקים בן יאשׁיהו מלך יהודה בחדשׁ התשׁעי קראו צום לפני יהוה כל העם בירושׁלם וכל העם הבאים מערי יהודה בירושׁלם׃ ¹⁰ ויקרא ברוך בספר את דברי ירמיהו בית יהוה בלשׁכת גמריהו בן שׁפן הספר בחצר העליון פתח שׁער בית יהוה החדשׁ באזני כל העם׃ ¹¹ וישׁמע מכיהו בן גמריהו בן שׁפן את כל דברי יהוה מעל הספר׃ ¹² וירד בית המלך על לשׁכת הספר והנה שׁם כל השׂרים יושׁבים אלישׁמע הספר ודליהו בן שׁמעיהו ואלנתן בן עכבור וגמריהו בן שׁפן וצדקיהו בן חנניהו וכל השׂרים׃ ¹³ ויגד להם מכיהו את כל הדברים אשׁר שׁמע בקרא ברוך בספר באזני העם׃ ¹⁴ וישׁלחו כל השׂרים אל ברוך את יהודי בן נתניהו בן שׁלמיהו בן כושׁי לאמר המגלה אשׁר קראת בה באזני העם קחנה בידך ולך ויקח ברוך בן נריהו את המגלה בידו ויבא אליהם׃ ¹⁵ ויאמרו אליו שׁב נא וקראנה באזנינו ויקרא ברוך באזניהם׃ ¹⁶ ויהי כשׁמעם את כל הדברים פחדו אישׁ אל רעהו ויאמרו אל ברוך הגיד נגיד למלך את כל הדברים האלה׃ ¹⁷ ואת ברוך שׁאלו לאמר הגד נא לנו איך כתבת את כל הדברים האלה מפיו׃ ¹⁸ ויאמר להם ברוך מפיו יקרא אלי את כל הדברים האלה ואני כתב על הספר בדיו׃ ¹⁹ ויאמרו השׂרים אל ברוך לך הסתר אתה וירמיהו ואישׁ אל ידע איפה אתם׃ ²⁰ ויבאו אל המלך חצרה ואת המגלה הפקדו בלשׁכת אלישׁמע הספר ויגידו באזני המלך את כל הדברים׃ ²¹ וישׁלח המלך את יהודי לקחת את המגלה ויקחה מלשׁכת אלישׁמע הספר ויקראה יהודי באזני המלך ובאזני כל השׂרים העמדים מעל המלך׃ ²² והמלך יושׁב בית החרף בחדשׁ התשׁיעי ואת האח לפניו מבערת׃ ²³ ויהי כקרוא יהודי שׁלשׁ דלתות וארבעה יקרעה בתער הספר והשׁלך אל האשׁ אשׁר אל האח עד תם כל המגלה על האשׁ אשׁר על האח׃ ²⁴ ולא פחדו ולא קרעו את בגדיהם המלך וכל עבדיו השׁמעים את כל הדברים האלה׃ ²⁵ וגם אלנתן ודליהו וגמריהו הפגעו במלך לבלתי שׂרף את המגלה ולא שׁמע אליהם׃ ²⁶ ויצוה המלך את ירחמאל בן המלך ואת שׂריהו בן עזריאל ואת שׁלמיהו בן עבדאל לקחת את ברוך הספר ואת ירמיהו הנביא ויסתרם יהוה׃ ²⁷ ויהי דבר יהוה אל ירמיהו אחרי שׂרף המלך את המגלה ואת הדברים אשׁר כתב ברוך מפי ירמיהו לאמר׃ ²⁸ שׁוב קח לך מגלה אחרת וכתב עליה את כל הדברים הראשׁנים אשׁר היו על המגלה הראשׁנה אשׁר שׂרף יהויקים מלך יהודה׃ ²⁹ ועל יהויקים מלך יהודה תאמר כה אמר יהוה אתה שׂרפת את המגלה הזאת לאמר מדוע כתבת עליה לאמר בא יבוא מלך בבל והשׁחית את הארץ הזאת והשׁבית ממנה אדם ובהמה׃ ³⁰ לכן כה אמר יהוה על יהויקים מלך יהודה לא יהיה לו יושׁב על כסא דוד ונבלתו תהיה משׁלכת לחרב ביום ולקרח בלילה׃ ³¹ ופקדתי עליו ועל זרעו ועל עבדיו את עונם והבאתי עליהם ועל ישׁבי ירושׁלם ואל אישׁ יהודה את כל הרעה אשׁר דברתי אליהם ולא שׁמעו׃ ³² וירמיהו לקח מגלה אחרת ויתנה אל ברוך בן נריהו הספר ויכתב עליה מפי ירמיהו את כל דברי הספר אשׁר שׂרף יהויקים מלך יהודה באשׁ ועוד נוסף עליהם דברים רבים כהמה׃