Genesis 18 וירא אליו יהוה באלני ממרא והוא ישׁב פתח האהל כחם היום׃

HOT⁽ⁱ⁾ ¹ וירא אליו יהוה באלני ממרא והוא ישׁב פתח האהל כחם היום׃ ² וישׂא עיניו וירא והנה שׁלשׁה אנשׁים נצבים עליו וירא וירץ לקראתם מפתח האהל וישׁתחו ארצה׃ ³ ויאמר אדני אם נא מצאתי חן בעיניך אל נא תעבר מעל עבדך׃ ⁴ יקח נא מעט מים ורחצו רגליכם והשׁענו תחת העץ׃ ⁵ ואקחה פת לחם וסעדו לבכם אחר תעברו כי על כן עברתם על עבדכם ויאמרו כן תעשׂה כאשׁר דברת׃ ⁶ וימהר אברהם האהלה אל שׂרה ויאמר מהרי שׁלשׁ סאים קמח סלת לושׁי ועשׂי עגות׃ ⁷ ואל הבקר רץ אברהם ויקח בן בקר רך וטוב ויתן אל הנער וימהר לעשׂות אתו׃ ⁸ ויקח חמאה וחלב ובן הבקר אשׁר עשׂה ויתן לפניהם והוא עמד עליהם תחת העץ ויאכלו׃ ⁹ ויאמרו אליו איה שׂרה אשׁתך ויאמר הנה באהל׃ ¹⁰ ויאמר שׁוב אשׁוב אליך כעת חיה והנה בן לשׂרה אשׁתך ושׂרה שׁמעת פתח האהל והוא אחריו׃ ¹¹ ואברהם ושׂרה זקנים באים בימים חדל להיות לשׂרה ארח כנשׁים׃ ¹² ותצחק שׂרה בקרבה לאמר אחרי בלתי היתה לי עדנה ואדני זקן׃ ¹³ ויאמר יהוה אל אברהם למה זה צחקה שׂרה לאמר האף אמנם אלד ואני זקנתי׃ ¹⁴ היפלא מיהוה דבר למועד אשׁוב אליך כעת חיה ולשׂרה בן׃ ¹⁵ ותכחשׁ שׂרה לאמר לא צחקתי כי יראה ויאמר לא כי צחקת׃ ¹⁶ ויקמו משׁם האנשׁים וישׁקפו על פני סדם ואברהם הלך עמם לשׁלחם׃ ¹⁷ ויהוה אמר המכסה אני מאברהם אשׁר אני עשׂה׃ ¹⁸ ואברהם היו יהיה לגוי גדול ועצום ונברכו בו כל גויי הארץ׃ ¹⁹ כי ידעתיו למען אשׁר יצוה את בניו ואת ביתו אחריו ושׁמרו דרך יהוה לעשׂות צדקה ומשׁפט למען הביא יהוה על אברהם את אשׁר דבר עליו׃ ²⁰ ויאמר יהוה זעקת סדם ועמרה כי רבה וחטאתם כי כבדה מאד׃ ²¹ ארדה נא ואראה הכצעקתה הבאה אלי עשׂו כלה ואם לא אדעה׃ ²² ויפנו משׁם האנשׁים וילכו סדמה ואברהם עודנו עמד לפני יהוה׃ ²³ ויגשׁ אברהם ויאמר האף תספה צדיק עם רשׁע׃ ²⁴ אולי ישׁ חמשׁים צדיקם בתוך העיר האף תספה ולא תשׂא למקום למען חמשׁים הצדיקם אשׁר בקרבה׃ ²⁵ חללה לך מעשׂת כדבר הזה להמית צדיק עם רשׁע והיה כצדיק כרשׁע חללה לך השׁפט כל הארץ לא יעשׂה משׁפט׃ ²⁶ ויאמר יהוה אם אמצא בסדם חמשׁים צדיקם בתוך העיר ונשׂאתי לכל המקום בעבורם׃ ²⁷ ויען אברהם ויאמר הנה נא הואלתי לדבר אל אדני ואנכי עפר ואפר׃ ²⁸ אולי יחסרון חמשׁים הצדיקם חמשׁה התשׁחית בחמשׁה את כל העיר ויאמר לא אשׁחית אם אמצא שׁם ארבעים וחמשׁה׃ ²⁹ ויסף עוד לדבר אליו ויאמר אולי ימצאון שׁם ארבעים ויאמר לא אעשׂה בעבור הארבעים׃ ³⁰ ויאמר אל נא יחר לאדני ואדברה אולי ימצאון שׁם שׁלשׁים ויאמר לא אעשׂה אם אמצא שׁם שׁלשׁים׃ ³¹ ויאמר הנה נא הואלתי לדבר אל אדני אולי ימצאון שׁם עשׂרים ויאמר לא אשׁחית בעבור העשׂרים׃ ³² ויאמר אל נא יחר לאדני ואדברה אך הפעם אולי ימצאון שׁם עשׂרה ויאמר לא אשׁחית בעבור העשׂרה׃ ³³ וילך יהוה כאשׁר כלה לדבר אל אברהם ואברהם שׁב למקמו׃