Leviticus 2:4-5:6 וכי תקרב קרבן מנחה מאפה תנור סלת חלות מצת בלולת בשׁמן ורקיקי מצות משׁחים בשׁמן׃

HOT⁽ⁱ⁾ ⁴ וכי תקרב קרבן מנחה מאפה תנור סלת חלות מצת בלולת בשׁמן ורקיקי מצות משׁחים בשׁמן׃ ⁵ ואם מנחה על המחבת קרבנך סלת בלולה בשׁמן מצה תהיה׃ ⁶ פתות אתה פתים ויצקת עליה שׁמן מנחה הוא׃ ⁷ ואם מנחת מרחשׁת קרבנך סלת בשׁמן תעשׂה׃ ⁸ והבאת את המנחה אשׁר יעשׂה מאלה ליהוה והקריבה אל הכהן והגישׁה אל המזבח׃ ⁹ והרים הכהן מן המנחה את אזכרתה והקטיר המזבחה אשׁה ריח ניחח ליהוה׃ ¹⁰ והנותרת מן המנחה לאהרן ולבניו קדשׁ קדשׁים מאשׁי יהוה׃ ¹¹ כל המנחה אשׁר תקריבו ליהוה לא תעשׂה חמץ כי כל שׂאר וכל דבשׁ לא תקטירו ממנו אשׁה ליהוה׃ ¹² קרבן ראשׁית תקריבו אתם ליהוה ואל המזבח לא יעלו לריח ניחח׃ ¹³ וכל קרבן מנחתך במלח תמלח ולא תשׁבית מלח ברית אלהיך מעל מנחתך על כל קרבנך תקריב מלח׃ ¹⁴ ואם תקריב מנחת בכורים ליהוה אביב קלוי באשׁ גרשׂ כרמל תקריב את מנחת בכוריך׃ ¹⁵ ונתת עליה שׁמן ושׂמת עליה לבנה מנחה הוא׃ ¹⁶ והקטיר הכהן את אזכרתה מגרשׂה ומשׁמנה על כל לבנתה אשׁה ליהוה׃³ ¹ ואם זבח שׁלמים קרבנו אם מן הבקר הוא מקריב אם זכר אם נקבה תמים יקריבנו לפני יהוה׃ ² וסמך ידו על ראשׁ קרבנו ושׁחטו פתח אהל מועד וזרקו בני אהרן הכהנים את הדם על המזבח סביב׃ ³ והקריב מזבח השׁלמים אשׁה ליהוה את החלב המכסה את הקרב ואת כל החלב אשׁר על הקרב׃ ⁴ ואת שׁתי הכלית ואת החלב אשׁר עלהן אשׁר על הכסלים ואת היתרת על הכבד על הכליות יסירנה׃ ⁵ והקטירו אתו בני אהרן המזבחה על העלה אשׁר על העצים אשׁר על האשׁ אשׁה ריח ניחח ליהוה׃ ⁶ ואם מן הצאן קרבנו לזבח שׁלמים ליהוה זכר או נקבה תמים יקריבנו׃ ⁷ אם כשׂב הוא מקריב את קרבנו והקריב אתו לפני יהוה׃ ⁸ וסמך את ידו על ראשׁ קרבנו ושׁחט אתו לפני אהל מועד וזרקו בני אהרן את דמו על המזבח סביב׃ ⁹ והקריב מזבח השׁלמים אשׁה ליהוה חלבו האליה תמימה לעמת העצה יסירנה ואת החלב המכסה את הקרב ואת כל החלב אשׁר על הקרב׃ ¹⁰ ואת שׁתי הכלית ואת החלב אשׁר עלהן אשׁר על הכסלים ואת היתרת על הכבד על הכלית יסירנה׃ ¹¹ והקטירו הכהן המזבחה לחם אשׁה ליהוה׃ ¹² ואם עז קרבנו והקריבו לפני יהוה׃ ¹³ וסמך את ידו על ראשׁו ושׁחט אתו לפני אהל מועד וזרקו בני אהרן את דמו על המזבח סביב׃ ¹⁴ והקריב ממנו קרבנו אשׁה ליהוה את החלב המכסה את הקרב ואת כל החלב אשׁר על הקרב׃ ¹⁵ ואת שׁתי הכלית ואת החלב אשׁר עלהן אשׁר על הכסלים ואת היתרת על הכבד על הכלית יסירנה׃ ¹⁶ והקטירם הכהן המזבחה לחם אשׁה לריח ניחח כל חלב ליהוה׃ ¹⁷ חקת עולם לדרתיכם בכל מושׁבתיכם כל חלב וכל דם לא תאכלו׃⁴ ¹ וידבר יהוה אל משׁה לאמר׃ ² דבר אל בני ישׂראל לאמר נפשׁ כי תחטא בשׁגגה מכל מצות יהוה אשׁר לא תעשׂינה ועשׂה מאחת מהנה׃ ³ אם הכהן המשׁיח יחטא לאשׁמת העם והקריב על חטאתו אשׁר חטא פר בן בקר תמים ליהוה לחטאת׃ ⁴ והביא את הפר אל פתח אהל מועד לפני יהוה וסמך את ידו על ראשׁ הפר ושׁחט את הפר לפני יהוה׃ ⁵ ולקח הכהן המשׁיח מדם הפר והביא אתו אל אהל מועד׃ ⁶ וטבל הכהן את אצבעו בדם והזה מן הדם שׁבע פעמים לפני יהוה את פני פרכת הקדשׁ׃ ⁷ ונתן הכהן מן הדם על קרנות מזבח קטרת הסמים לפני יהוה אשׁר באהל מועד ואת כל דם הפר ישׁפך אל יסוד מזבח העלה אשׁר פתח אהל מועד׃ ⁸ ואת כל חלב פר החטאת ירים ממנו את החלב המכסה על הקרב ואת כל החלב אשׁר על הקרב׃ ⁹ ואת שׁתי הכלית ואת החלב אשׁר עליהן אשׁר על הכסלים ואת היתרת על הכבד על הכליות יסירנה׃ ¹⁰ כאשׁר יורם משׁור זבח השׁלמים והקטירם הכהן על מזבח העלה׃ ¹¹ ואת עור הפר ואת כל בשׂרו על ראשׁו ועל כרעיו וקרבו ופרשׁו׃ ¹² והוציא את כל הפר אל מחוץ למחנה אל מקום טהור אל שׁפך הדשׁן ושׂרף אתו על עצים באשׁ על שׁפך הדשׁן ישׂרף׃ ¹³ ואם כל עדת ישׂראל ישׁגו ונעלם דבר מעיני הקהל ועשׂו אחת מכל מצות יהוה אשׁר לא תעשׂינה ואשׁמו׃ ¹⁴ ונודעה החטאת אשׁר חטאו עליה והקריבו הקהל פר בן בקר לחטאת והביאו אתו לפני אהל מועד׃ ¹⁵ וסמכו זקני העדה את ידיהם על ראשׁ הפר לפני יהוה ושׁחט את הפר לפני יהוה׃ ¹⁶ והביא הכהן המשׁיח מדם הפר אל אהל מועד׃ ¹⁷ וטבל הכהן אצבעו מן הדם והזה שׁבע פעמים לפני יהוה את פני הפרכת׃ ¹⁸ ומן הדם יתן על קרנת המזבח אשׁר לפני יהוה אשׁר באהל מועד ואת כל הדם ישׁפך אל יסוד מזבח העלה אשׁר פתח אהל מועד׃ ¹⁹ ואת כל חלבו ירים ממנו והקטיר המזבחה׃ ²⁰ ועשׂה לפר כאשׁר עשׂה לפר החטאת כן יעשׂה לו וכפר עלהם הכהן ונסלח להם׃ ²¹ והוציא את הפר אל מחוץ למחנה ושׂרף אתו כאשׁר שׂרף את הפר הראשׁון חטאת הקהל הוא׃ ²² אשׁר נשׂיא יחטא ועשׂה אחת מכל מצות יהוה אלהיו אשׁר לא תעשׂינה בשׁגגה ואשׁם׃ ²³ או הודע אליו חטאתו אשׁר חטא בה והביא את קרבנו שׂעיר עזים זכר תמים׃ ²⁴ וסמך ידו על ראשׁ השׂעיר ושׁחט אתו במקום אשׁר ישׁחט את העלה לפני יהוה חטאת הוא׃ ²⁵ ולקח הכהן מדם החטאת באצבעו ונתן על קרנת מזבח העלה ואת דמו ישׁפך אל יסוד מזבח העלה׃ ²⁶ ואת כל חלבו יקטיר המזבחה כחלב זבח השׁלמים וכפר עליו הכהן מחטאתו ונסלח׃ ²⁷ ואם נפשׁ אחת תחטא בשׁגגה מעם הארץ בעשׂתה אחת ממצות יהוה אשׁר לא תעשׂינה ואשׁם׃ ²⁸ או הודע אליו חטאתו אשׁר חטא והביא קרבנו שׂעירת עזים תמימה נקבה על חטאתו אשׁר חטא׃ ²⁹ וסמך את ידו על ראשׁ החטאת ושׁחט את החטאת במקום העלה׃ ³⁰ ולקח הכהן מדמה באצבעו ונתן על קרנת מזבח העלה ואת כל דמה ישׁפך אל יסוד המזבח׃ ³¹ ואת כל חלבה יסיר כאשׁר הוסר חלב מעל זבח השׁלמים והקטיר הכהן המזבחה לריח ניחח ליהוה וכפר עליו הכהן ונסלח׃ ³² ואם כבשׂ יביא קרבנו לחטאת נקבה תמימה יביאנה׃ ³³ וסמך את ידו על ראשׁ החטאת ושׁחט אתה לחטאת במקום אשׁר ישׁחט את העלה׃ ³⁴ ולקח הכהן מדם החטאת באצבעו ונתן על קרנת מזבח העלה ואת כל דמה ישׁפך אל יסוד המזבח׃ ³⁵ ואת כל חלבה יסיר כאשׁר יוסר חלב הכשׂב מזבח השׁלמים והקטיר הכהן אתם המזבחה על אשׁי יהוה וכפר עליו הכהן על חטאתו אשׁר חטא ונסלח׃⁵ ¹ ונפשׁ כי תחטא ושׁמעה קול אלה והוא עד או ראה או ידע אם לוא יגיד ונשׂא עונו׃ ² או נפשׁ אשׁר תגע בכל דבר טמא או בנבלת חיה טמאה או בנבלת בהמה טמאה או בנבלת שׁרץ טמא ונעלם ממנו והוא טמא ואשׁם׃ ³ או כי יגע בטמאת אדם לכל טמאתו אשׁר יטמא בה ונעלם ממנו והוא ידע ואשׁם׃ ⁴ או נפשׁ כי תשׁבע לבטא בשׂפתים להרע או להיטיב לכל אשׁר יבטא האדם בשׁבעה ונעלם ממנו והוא ידע ואשׁם לאחת מאלה׃ ⁵ והיה כי יאשׁם לאחת מאלה והתודה אשׁר חטא עליה׃ ⁶ והביא את אשׁמו ליהוה על חטאתו אשׁר חטא נקבה מן הצאן כשׂבה או שׂעירת עזים לחטאת וכפר עליו הכהן מחטאתו׃