Leviticus 14:18-57 והנותר בשׁמן אשׁר על כף הכהן יתן על ראשׁ המטהר וכפר עליו הכהן לפני יהוה׃

HOT⁽ⁱ⁾ ¹⁸ והנותר בשׁמן אשׁר על כף הכהן יתן על ראשׁ המטהר וכפר עליו הכהן לפני יהוה׃ ¹⁹ ועשׂה הכהן את החטאת וכפר על המטהר מטמאתו ואחר ישׁחט את העלה׃ ²⁰ והעלה הכהן את העלה ואת המנחה המזבחה וכפר עליו הכהן וטהר׃ ²¹ ואם דל הוא ואין ידו משׂגת ולקח כבשׂ אחד אשׁם לתנופה לכפר עליו ועשׂרון סלת אחד בלול בשׁמן למנחה ולג שׁמן׃ ²² ושׁתי תרים או שׁני בני יונה אשׁר תשׂיג ידו והיה אחד חטאת והאחד עלה׃ ²³ והביא אתם ביום השׁמיני לטהרתו אל הכהן אל פתח אהל מועד לפני יהוה׃ ²⁴ ולקח הכהן את כבשׂ האשׁם ואת לג השׁמן והניף אתם הכהן תנופה לפני יהוה׃ ²⁵ ושׁחט את כבשׂ האשׁם ולקח הכהן מדם האשׁם ונתן על תנוך אזן המטהר הימנית ועל בהן ידו הימנית ועל בהן רגלו הימנית׃ ²⁶ ומן השׁמן יצק הכהן על כף הכהן השׂמאלית׃ ²⁷ והזה הכהן באצבעו הימנית מן השׁמן אשׁר על כפו השׂמאלית שׁבע פעמים לפני יהוה׃ ²⁸ ונתן הכהן מן השׁמן אשׁר על כפו על תנוך אזן המטהר הימנית ועל בהן ידו הימנית ועל בהן רגלו הימנית על מקום דם האשׁם׃ ²⁹ והנותר מן השׁמן אשׁר על כף הכהן יתן על ראשׁ המטהר לכפר עליו לפני יהוה׃ ³⁰ ועשׂה את האחד מן התרים או מן בני היונה מאשׁר תשׂיג ידו׃ ³¹ את אשׁר תשׂיג ידו את האחד חטאת ואת האחד עלה על המנחה וכפר הכהן על המטהר לפני יהוה׃ ³² זאת תורת אשׁר בו נגע צרעת אשׁר לא תשׂיג ידו בטהרתו׃ ³³ וידבר יהוה אל משׁה ואל אהרן לאמר׃ ³⁴ כי תבאו אל ארץ כנען אשׁר אני נתן לכם לאחזה ונתתי נגע צרעת בבית ארץ אחזתכם׃ ³⁵ ובא אשׁר לו הבית והגיד לכהן לאמר כנגע נראה לי בבית׃ ³⁶ וצוה הכהן ופנו את הבית בטרם יבא הכהן לראות את הנגע ולא יטמא כל אשׁר בבית ואחר כן יבא הכהן לראות את הבית׃ ³⁷ וראה את הנגע והנה הנגע בקירת הבית שׁקערורת ירקרקת או אדמדמת ומראיהן שׁפל מן הקיר׃ ³⁸ ויצא הכהן מן הבית אל פתח הבית והסגיר את הבית שׁבעת ימים׃ ³⁹ ושׁב הכהן ביום השׁביעי וראה והנה פשׂה הנגע בקירת הבית׃ ⁴⁰ וצוה הכהן וחלצו את האבנים אשׁר בהן הנגע והשׁליכו אתהן אל מחוץ לעיר אל מקום טמא׃ ⁴¹ ואת הבית יקצע מבית סביב ושׁפכו את העפר אשׁר הקצו אל מחוץ לעיר אל מקום טמא׃ ⁴² ולקחו אבנים אחרות והביאו אל תחת האבנים ועפר אחר יקח וטח את הבית׃ ⁴³ ואם ישׁוב הנגע ופרח בבית אחר חלץ את האבנים ואחרי הקצות את הבית ואחרי הטוח׃ ⁴⁴ ובא הכהן וראה והנה פשׂה הנגע בבית צרעת ממארת הוא בבית טמא הוא׃ ⁴⁵ ונתץ את הבית את אבניו ואת עציו ואת כל עפר הבית והוציא אל מחוץ לעיר אל מקום טמא׃ ⁴⁶ והבא אל הבית כל ימי הסגיר אתו יטמא עד הערב׃ ⁴⁷ והשׁכב בבית יכבס את בגדיו והאכל בבית יכבס את בגדיו׃ ⁴⁸ ואם בא יבא הכהן וראה והנה לא פשׂה הנגע בבית אחרי הטח את הבית וטהר הכהן את הבית כי נרפא הנגע׃ ⁴⁹ ולקח לחטא את הבית שׁתי צפרים ועץ ארז ושׁני תולעת ואזב׃ ⁵⁰ ושׁחט את הצפר האחת אל כלי חרשׂ על מים חיים׃ ⁵¹ ולקח את עץ הארז ואת האזב ואת שׁני התולעת ואת הצפר החיה וטבל אתם בדם הצפר השׁחוטה ובמים החיים והזה אל הבית שׁבע פעמים׃ ⁵² וחטא את הבית בדם הצפור ובמים החיים ובצפר החיה ובעץ הארז ובאזב ובשׁני התולעת׃ ⁵³ ושׁלח את הצפר החיה אל מחוץ לעיר אל פני השׂדה וכפר על הבית וטהר׃ ⁵⁴ זאת התורה לכל נגע הצרעת ולנתק׃ ⁵⁵ ולצרעת הבגד ולבית׃ ⁵⁶ ולשׂאת ולספחת ולבהרת׃ ⁵⁷ להורת ביום הטמא וביום הטהר זאת תורת הצרעת׃