Isaiah 32 הן לצדק ימלך מלך ולשׂרים למשׁפט ישׂרו׃

HOT⁽ⁱ⁾ ¹ הן לצדק ימלך מלך ולשׂרים למשׁפט ישׂרו׃ ² והיה אישׁ כמחבא רוח וסתר זרם כפלגי מים בציון כצל סלע כבד בארץ עיפה׃ ³ ולא תשׁעינה עיני ראים ואזני שׁמעים תקשׁבנה׃ ⁴ ולבב נמהרים יבין לדעת ולשׁון עלגים תמהר לדבר צחות׃ ⁵ לא יקרא עוד לנבל נדיב ולכילי לא יאמר שׁוע׃ ⁶ כי נבל נבלה ידבר ולבו יעשׂה און לעשׂות חנף ולדבר אל יהוה תועה להריק נפשׁ רעב ומשׁקה צמא יחסיר׃ ⁷ וכלי כליו רעים הוא זמות יעץ לחבל ענוים באמרי שׁקר ובדבר אביון משׁפט׃ ⁸ ונדיב נדיבות יעץ והוא על נדיבות יקום׃ ⁹ נשׁים שׁאננות קמנה שׁמענה קולי בנות בטחות האזנה אמרתי׃ ¹⁰ ימים על שׁנה תרגזנה בטחות כי כלה בציר אסף בלי יבוא׃ ¹¹ חרדו שׁאננות רגזה בטחות פשׁטה וערה וחגורה על חלצים׃ ¹² על שׁדים ספדים על שׂדי חמד על גפן פריה׃ ¹³ על אדמת עמי קוץ שׁמיר תעלה כי על כל בתי משׂושׂ קריה עליזה׃ ¹⁴ כי ארמון נטשׁ המון עיר עזב עפל ובחן היה בעד מערות עד עולם משׂושׂ פראים מרעה עדרים׃ ¹⁵ עד יערה עלינו רוח ממרום והיה מדבר לכרמל וכרמל ליער יחשׁב׃ ¹⁶ ושׁכן במדבר משׁפט וצדקה בכרמל תשׁב׃ ¹⁷ והיה מעשׂה הצדקה שׁלום ועבדת הצדקה השׁקט ובטח עד עולם׃ ¹⁸ וישׁב עמי בנוה שׁלום ובמשׁכנות מבטחים ובמנוחת שׁאננות׃ ¹⁹ וברד ברדת היער ובשׁפלה תשׁפל העיר׃ ²⁰ אשׁריכם זרעי על כל מים משׁלחי רגל השׁור והחמור׃