John 4

WestSaxon990^{(i) 1} Ða se hælend wyste. þt þa pharisei gehyrdon þt he hæfde ma leorning-cnihta þonne iohannes. ² þeah se hælend ne fullode. Ac his leorning-cnihtas; ³ Ða forlet he iudea land. & for eft on galilëa. ⁴ him gebyrode þt he sceolde faran þurh samaria land. ⁵ witodlice he cöm on samärian cestre þe is genemned sichär. neah þam tune þe iacob sealde iösepe his suna ⁶ þær wæs iacobes wyl; [Note: Ðys sceal on frige-dæg on þære. iii. lengten wucan. Iesus fatigatus ex itenere sedebat sic. A. Iesus fatigatus ex itere (sic) sedebat sic super fontem. B. ] Se hælend sæt æt ðam wylle. þa he wæs werig gegän. & hit wæs mid-dæg. ⁷ þa com þær an wif of samäria wolde wæter feccan; Ða cwæð se hælend to hyre. syle me drincan; ⁸ His leorning-cnihtas ferdon þa to þære ceastre woldon him mete bicgan. ⁹ þa cwæð þt samaritanisce wïf to him; Hu-meta bitst þu æt me drincan þonne ðu eart iudeisc. & ic eom samaritanisc wïf. ne brucað iudeas. & samaritanisce metes ætgædere; ¹⁰ Ða &swarode se hælend & cwæð to hyre; Gif þu wistest godes gyfe. & hwæt së is þe cwið to þe syle me drincan. witodlice þu bæde hine þt he sealde þe lïfes wæter; ¹¹ Ða cwæð þt wïf to him. leof ne ðu næfst nan þing mid to hladene. & þes pyt is dëop. hwanon hæfst þu lifes wæter ¹² cwyst ðu. þt þu si mærra þonne üre fæder iacöb; Se ðe us þisne pytt sealde & he & his bearn & his nytenu of ðam druncon. ¹³ Ða &swarode se hælend & cwæþ to hyre. ælcne ðara þyrst eft þe of ðyson wætere dringð; ¹⁴ Witodlice ælc þara þe drincð of þam wætere þe ic him sylle [...] bið on him will forð-ræsendes wætres on ece lïf; ¹⁵ Ða cwæð þt wif to him. hläford. syle me þt wæter þt me ne þyrste. ne ic ne ðurfe her feccan; ¹⁶ Ða cwæþ se hælend to hyre. ga clypa þinne ceorl. & cum hider; ¹⁷ Ða &wurde þt wïf. & cwæð. næbbe ic nanne ceorl; Ða cwæð se hælend to hyre. wel þu cwæde þt þu næfst ceorl. ¹⁸ witodlice þu hæfst fif ceorlas. & se ðe ðu nu hæfst nis ðin ceorl æt þam þu sædest soð; ¹⁹ Ða cwæð þt wif to him. leof. þæs me ðingþ þu eart witega. ²⁰ ure fæderas hig gebædon on þissere dune. & ge secgað þt on ierusalem sy seo stow. þt man on gebidde; ²¹ Ða cwæð se hælend to hyre. la wïf gelyf me. þt seo tid cymð þonne ge ne gebiddaþ fæder ne on þisse dune ne on gerusalem; ²² Ge gebiddað þt ge nyton. we gebiddaþ þt we witon. forþam þe hæl is of iudeum. ²³ ac seo tid cymð & nu is þonne soþe gebed-men gebiddaþ fæder on gaste. & on soðfæstnesse. witodlice fæder secþ swylce þe hyne gebiddon. ²⁴ gast is god. & þam þe hyne gebiddað gebyrað þt hig gebiddon. on gaste and on soðfæstnesse; ²⁵ Ðæt wïf cwæþ to him ic wat þt messias cymð þe is genemned crist. þonne he cymð he cyð us ealle ðing; ²⁶ Se hælend cwæð to hyre. ic hit eom. þe wið þe sprece. ²⁷ & þær-rihte comon his leorning-cnihtas. & hig wundredon þt he wiþ þt wïf spræc þeah hyra nan ne cwæð. hwæt segst (sic) þu oððe hwæt sprycst þu wið hig; ²⁸ Witodlice þt wïf for-let hyre wæter-fæt. & eode to þære byrig & cwæð to þam mannum; ²⁹ Cumað & geseoð þone man þe me sæde. ealle [þa] þing þe ic dyde. cweðe ge is he crist; ³⁰ Ða eodon hi ut of ðære byrig & comon to him. ³¹ on gemang þam his leorning-cnihtas hine bædon. & þus cwædon lareow et. ³² Ða cwæð he to him. ic hæbbe þone mete to etene þe ge nyton; ³³ Ða cwædon his leorning-cnihtas him betwynan hwæðer ænig man him mete brohte; ³⁴ Ða cwæð se hælend to him. min mete is þt ic wyrce þæs willan ðe me sende. þt ic full-fremme his weorc; ³⁵ Hv ne [Note: Corp. MS. has Hyne, altered Hv ne. ] secge ge þt nu gyt synt feowur monðas ær man ripan mæge nu ic eow secge hebbað upp eowre eagan & geseoð þas eardas þt hig synt scire to ripene. ³⁶ & se ðe ripð nimð mede & gaderaþ wæstm on ecum life þt æt-gædere geblission se þe sæwþ. & se ðe ripð. ³⁷ on þyson is witodlice soð word forðam oþer is se ðe sæwþ oþer is se ðe ripþ; ³⁸ Ic sende eow to ripene þt þt ge ne be-swuncon oðre swuncon & ge eodun on hyra geswinc; ³⁹ Witodlice manige samaritanisce of ðære ceastre gelyfdon on hyne for þæs wïfes wordon þe be him cyþde þt he sæde me ealle þa þing þe ic dyde; ⁴⁰ Ða þa [Note: miswritten þæge. ] samaritaniscean comon to him hig gebædon hine þt he wunode ðæra (sic). & he wunode þær twegen dagas. ⁴¹ & mycle ma gelyfdon for his spæce. ⁴² & cwædon to þam wife. ne gelyfe we na for ðinre spræce. we sylfe gehyrdon. & we witon þt he is soþ middan-eardes hælynd; ⁴³ Soðlice æfter twam dagon he ferde þanone. & for to galilea; ⁴⁴ Se hælend sylf cyþde gewitnesse þt nan witega næfð nanne wurð-scype on hys agenum earde. ⁴⁵ þa he com to galileam þa under-fengon hi hine þa hi gesawon ealle þa þing þe he worhte on ierusalem on freols-dæge. & hi comun to þam freols-dæge ⁴⁶ & he com eft to chanaäa galilee. þær he worhte þt wïn of wætere; [Note: Ðys godspel gebyrað ofer pentecosten on þære an & twentygoðan wucan on sunnan-dæg. Erat quidam regulus cuius filius infirmabatur. A. Erat quidam regulus cuius filius infirmabatur [capha]rnaum. B. ] Sum under-cyning wæs. þæs sunu wæs gesyclod on capharnaum. ⁴⁷ þa þa se gehyrde þt se hælend for fram iudea to galilëa he com to him & bæd hine þt he före & gehælde his sunu; Soðlice he læg æt forð-fore. ⁴⁸ Ða cwæþ se hælend to him. buton ge tacna & fore-beacna geseon. ne gelyfe ge; ⁴⁹ Ða cwæð se under-cing to him. drihten. far ær min sunu swelte. ⁵⁰ & se hælend cwæð. Gä þin sunu leofað; Ða eode he & gelyfde þære spræce þe se hælend him sæde; ⁵¹ Ða he for þa urnon his þeowas ongean hyne & sædon þt his sunu leofode; ⁵² Ða axode he to hwylcon timan him bet wære. & hi sædon him gyrstan-dæg to þære seofoþan tide se fefor hine forlet; ⁵³ Ða ongeat se fæder þt hit wæs on þære tide ðe se hælend cwæð þin sunu leofað. & he gelyfde & eall his hiw-ræden; ⁵⁴ Se hælend worhte þis täcen eft oþre siþe þa he com fram iudea lande to galilea;

WestSaxon1175^{(i) 1} Ða se hælend wiste þt þa pharisei ge-hyrden. þæt he hæfdee (sic) ma leorning-cnihta þonne Iohannes ² þeah se hælend ne fullode. ac hys leorning-cnihtas. ³ Ða for-let he iudea land. & for eft on galilea. ⁴ hym ge-byrode þæt he scolde faran þurh samaria länd. ⁵ Witelice he com on samarian cestre. þe ys ge-nemneð sichar. neah þam tune þe Iacob sealde Iosepe hys sune. ⁶ þær wæs Iacobes wylle. [Note: Iesus fatigatus ex itinere. sedebat sic super fontem. ] Se hælend sæt æt þam welle. þa he wæs weri ge-gan. & hyt wæs mid-dayg. ⁷ Ða com þær an wif of samaria wolde water feccan. Ða cwæð se hælend to hyre; gyf me drincan. ⁸ Hys leorning-cnihtes ferdon þa to þare ceastre. woldon heom mete beggen. ⁹ Ða cwæð þæt samaritanisse wif to hym. Hu-mete bydst þu at me drinken. þonne þu ert Iudeisc. & ic em samaritanisc wyf. Ne brucað Iudeas & samaritanissce metes æt-gadere. ¹⁰ Ða answerede se halend & cwæð to hyre. Gif þu wistes godes gyfe. & hwæt se ys þe cwæð to þe sele me drinken. witodlice þu bede hyne þæt he sealde þe lyfes wæter. ¹¹ Þa cwæð þæt wif to hym. Leof ne þu næfst nan þing mid to hladene. & þes pet ys deop. hwanen hafst þu lifes wæter. ¹² cwest ðu þt þu mare sy þonne ure fader iacob. Se þe us þisne pyt sealde. & he & hys bearn. & hys nytanu of þam druncan. ¹³ Ða answerede se hælend. & cwæð to hire. Ælc þare þerst eft þe of þisse wætere drinkeð. ¹⁴ Witodlice ælc þare þe drincð of þam watere þe ic hym sylle; [...] beoð on hym wyll forð-ræsendes wæteres on ece lyf. ¹⁵ Þa cwæð þæt wif to him. Hlaford sele me þæt wæter þæt me ne þerste. ne ic ne þurfe her water fecchan. ¹⁶ Þa cwæð se halend to hire. Ga & clype þinne cheorl. & cum hider. ¹⁷ Þa hym answerede þus þæt wif. & cwæð. nabbe ic nænne cheorl. Þa cwæð se halend to hyre. wel þu cweðe þæt þu næst ceorl. ¹⁸ witodlice þu hafst fif cheorles. End se þe þu nu hast nis þin ceorl. æt þam þu segdest soð. ¹⁹ Ða cwæð þæt wif to hym. Leof þas me þincð þu ert witega; ²⁰ ure faderes hyo ge-beden on þissere dune. & ge secgeð þæt on ierusalem syo stow þe þæt man on ge-bydde. ²¹ Ða cwæð se hælend to hire. La wif ge-lef me. þæt seo tid cymð. þonne ge ne biddeð þam fader ne on þisse dune ne on ierusalem. ²² Ge ge-biddeð þæt ge nyten. we ge-biddeð þæt we witon. for-þam þe hale ys of iudeum. ²³ ac seo tid cymð; & nu ys. þonne soðe ge-bedmen biddeð þonne fader on gaste. & on sodfæstnysse. Witodlice se fader secð swilce; þe hyne ge-biddeð. ²⁴ gast ys god. & þam þe hine biddeð. ge-byred þæt hyo ge-bidden on gaste. & on soðfæstnysse. ²⁵ Ðæt wif cwæð to him. ic wat þæt messias cymð þæt ys ge-nemned crist. þonne he cymð he cyð us ealle þing. ²⁶ Se hælend cwæð to hyre. Ic hyt em. þe wið þe sprece. ²⁷ & þær-rihte comen hys leorning-cnihtas. & hyo wundreden þæt he wið þæt wif s[p]rec. þeh; hire nan ne cwæð; hwæt secst þu. oððe hwæt sprecst þu wið hyo. ²⁸ Witoðlice þæt wif for-let hire water-fet & eode to þare berig. & cwæð to þam mannen. ²⁹ Cumæd & ge-seod þonne man þe me sægde ealle þa þing þe ic dede. cweðe ge is he crist. ³⁰ Ða eoden hyo ut of þare berig & comen to hym. ³¹ on ge-mang þam his leorning-cnihtes hine bædon. & þus cwæðen. lareow et. ³² þa cwæð he to heom. Ic hæbbe þonne mete to etene þe ge nytan. ³³ Ða cwæðen hys leorning-cnihtes heom be-twoxen hwæðer anig man hym mete brohte. ³⁴ Ða cwæð se hælend to heom. Min mete ys þæt ic werche þas willen þe me sende. þæt ic ful-fremie me hys werces. ³⁵ Hu ne segge ge þæt nu gyt sint feor monðes ær me ripen mægen. nu ic segge eow. hæbbað up eowre eagen. & ge-seð þas eardes þt hyo synde scyre to ripene. ³⁶ & se þe ripð nemd mede. & gadereð wæstme on echen lyfe. þæt æt-gadere ge-blyssien se þe sawð & se þe ripeð. ³⁷ on þison is witodlice soð word. forþam oðer is þe sawð. oþer ys se ðe ripð. ³⁸ Ic sende eow to ripene. þæt þæt ge ne be-swuncen. oðre swuncon & ge eoden on heora swenc. ³⁹ Witodlice manige samaritanyssce of þare cestre ge-lefdon on hyne. for þas wifes worden. þe be hym kydde þæt he segde me ealle þa þing þe ic dede. ⁴⁰ Ða þa samaritanisscen comen to hym. hyo ge-bæden hine þæt he wunede þære. & he wunede þære twegen dages. ⁴¹ & micele mä ge-lefden for hys spræce. ⁴² & cwæðen to þam wife. ne ge-lefe we na for þire spræce. we sylfe ge-hirdon. & we witen ðæt he ys soð middan-eardes hælend. ⁴³ Soðlice æfter twam dagon he ferde þanone. & for to galilea. ⁴⁴ Se hælend self kydde ge-wytnesse þæt nan witega nefð nenne wurðscipe on hys agenen earde. ⁴⁵ þa he com to galileam. ða under-fengan hyo hine. þa hyo ge-sæwan ealle ða þing þe he worhte on ierusalem on freols-dæge. & hyo comen to þam freols-dæge. ⁴⁶ & he com eft to chanää galilëë. þær he worhte þæt win of wætere. [Note: Erat quidam regulus cuius filius infirmabatur capharnaum. ] Sum under-kyning wæs. þæs sunu wæs ge-sieclod on capharnaum. ⁴⁷ Ða ða se ge-hyrde þæt se hælend for fram iudea to galilea he com to hym. & bed hine þæt he fore ænd hælde hys sune. Soðlice he læg æt forð-fore. ⁴⁸ Ða cwæð se halend to hym. buton ge tacne & fore-bæcne ge-seon. ne ge-lyfe ge. ⁴⁹ Ða cwæð se under-cyning to hym; drihten far ær min sune swelte. ⁵⁰ & se hælend cwæð. Ga þin sune leofað. Ða eode he. & ge-lefde ðare spræce þe se hælend hym sægde. ⁵¹ Þa he for; þa urnen hys þeowes hym to-geanes & sægdon þæt hys sune leofede. ⁵² Ða axode he to hwilcan timan hym bet wære. & hyo sægdon hym. gystendaig to þa seofeðe tide; se feofer hyne for-let. ⁵³ Þa on-geat se fæder ðæt hyt wæs on þare tide þe se hælend cwæð; þin sune leofað. & he ge-lefde & eall his heowrædon. ⁵⁴ Se halend worhte þis taken eft oþre syðe þa he com fram iudea lande to galilea.