Psalms 1:1-30:12

Vulgate^{(i) 1} beatus vir qui non abiit in consilio impiorum et in via peccatorum non stetit in cathedra derisorum non sedit ² sed in lege Domini voluntas eius et in lege eius meditabitur die ac nocte ³ et erit tamquam lignum transplantatum iuxta rivulos aquarum quod fructum suum dabit in tempore suo et folium eius non defluet et omne quod fecerit prosperabitur ⁴ non sic impii sed tamquam pulvis quem proicit ventus ⁵ propterea non resurgent impii in iudicio neque peccatores in congregatione iustorum ⁶ quoniam novit Dominus viam iustorum et iter impiorum peribit ^{2 1} quare turbabuntur gentes et tribus meditabuntur inania ² consurgent reges terrae et principes tractabunt pariter adversum Dominum et adversum christum eius ³ disrumpamus vincula eorum et proiciamus a nobis laqueos eorum ⁴ habitator caeli ridebit Dominus subsannabit eos ⁵ tunc loquetur ad eos in ira sua et in furore suo conturbabit eos ⁶ ego autem orditus sum regem meum super Sion montem sanctum suum adnuntiabo Dei praeceptum ⁷ Dominus dixit ad me filius meus es tu ego hodie genui te ⁸ postula a me et dabo tibi gentes hereditatem tuam et possessionem tuam terminos terrae ⁹ pasces eos in virga ferrea ut vas figuli conteres eos ¹⁰ nunc ergo reges intellegite erudimini iudices terrae ¹¹ servite Domino in timore et exultate in tremore ¹² adorate pure ne forte irascatur et pereatis de via cum exarserit post paululum furor eius beati omnes qui sperant in eum ^{3 1} canticum David cum fugeret a facie Abessalon filii sui Domine quare multiplicati sunt hostes mei multi consurgunt adversus me ² multi dicunt animae meae non est salus huic in Deo semper ³ tu autem Domine clipeus circa me gloria mea et exaltans caput meum ⁴ voce mea ad Dominum clamabo et exaudiet me de monte sancto suo semper ⁵ ego dormivi et soporatus sum evigilavi quia Dominus sustentavit me ⁶ non timebo milia populi quae circumdederunt me surge Domine salvum me fac Deus meus ⁷ quia percussisti omnium inimicorum meorum maxillam dentes impiorum confregisti ⁸ Domini est salus super populum tuum benedictio tua semper ^{4 1} victori in psalmis canticum David invocante me exaudi me Deus iustitiae meae in tribulatione dilatasti mihi miserere mei et exaudi orationem meam ² filii viri usquequo incliti mei ignominiose diligitis vanitatem quaerentes mendacium semper ³ et cognoscite quoniam mirabilem reddidit Dominus sanctum suum Dominus exaudiet cum clamavero ad eum ⁴ irascimini et nolite peccare loquimini in cordibus vestris super cubilia vestra et tacete semper ⁵ sacrificate sacrificium iustitiae et fidite in Domino multi dicunt quis ostendit nobis bonum ⁶ leva super nos lucem vultus tui Domine dedisti laetitiam in corde meo ⁷ in tempore frumentum et vinum eorum multiplicata sunt ⁸ in pace simul requiescam et dormiam quia tu Domine specialiter securum habitare fecisti me ^{5 1} victori pro hereditatibus canticum David verba mea audi Domine intellege murmur meum ² rex meus et Deus meus ³ quia te deprecor Domine mane audies vocem meam ⁴ mane praeparabor ad te et contemplabor quoniam non es deus volens iniquitatem tu ⁵ nec habitabit iuxta te malignus non stabunt iniqui in conspectu oculorum tuorum ⁶ odisti omnes operantes iniquitatem perdes loquentes mendacium virum sanguinum et dolosum abominabitur Dominus ⁷ ego autem in multitudine misericordiae tuae introibo in domum tuam adorabo in templo sancto tuo in timore tuo ⁸ Domine deduc me in iustitia tua propter insidiatores meos dirige ante faciem meam viam tuam ⁹ non est enim in ore eorum rectum interiora eorum insidiae ¹⁰ sepulchrum patens guttur eorum linguam suam levificant condemna eos Deus decidant a consiliis suis iuxta multitudinem scelerum eorum expelle eos quoniam provocaverunt te ¹¹ et laetentur omnes qui sperant in te in perpetuum laudabunt et proteges eos et laetabuntur in te qui diligunt nomen tuum ¹² quia tu benedices iusto Domine ut scuto placabilitatis coronabis eum ^{6 1} victori in psalmis super octava canticum David Domine ne in furore tuo arguas me neque in ira tua corripias me ² miserere mei Domine quoniam infirmus sum sana me Domine quoniam conturbata sunt ossa mea ³ et anima mea turbata est valde et tu Domine usquequo ⁴ revertere Domine erue animam meam salva me propter misericordiam tuam ⁵ quoniam non est in morte recordatio tui in inferno quis confitebitur tibi ⁶ laboravi in gemitu meo natare faciam tota nocte lectulum meum lacrimis meis stratum meum rigabo ⁷ caligavit prae amaritudine oculus meus consumptus sum ab universis hostibus meis ⁸ recedite a me omnes qui operamini iniquitatem quia audivit Dominus vocem fletus mei ⁹ audivit Dominus deprecationem meam Dominus orationem meam suscipiet ¹⁰ confundantur et conturbentur vehementer omnes inimici mei revertantur et confundantur subito ^{7 1} pro ignoratione David quod cecinit Domino super verbis Aethiopis filii Iemini Domine Deus meus in te speravi salva me ab omnibus persequentibus me et libera me ² ne forte capiat ut leo animam meam laceret et non sit qui eruat ³ Domine Deus meus si feci istud si est iniquitas in manibus meis ⁴ si reddidi retribuentibus mihi malum et dimisi hostes meos vacuos ⁵ persequatur inimicus animam meam et adprehendat et conculcet in terra vitam meam et gloriam meam in pulverem conlocet semper ⁶ surge Domine in furore tuo elevare indignans super hostes meos et consurge ad me iudicio quod mandasti ⁷ et congregatio tribuum circumdet te et pro hac in altum revertere ⁸ Dominus iudicabit populos iudica me Domine secundum iustitiam meam et secundum simplicitatem meam quae est in me ⁹ consumatur malum iniquorum et confirmetur iustitia probator cordis et renum Deus iustus ¹⁰ clipeus meus in Deo qui salvat rectos corde ¹¹ Deus iudex iustus et fortis comminans tota die ¹² non convertenti gladium suum acuet arcum suum tetendit et paravit illum ¹³ et in ipso praeparavit vasa mortis sagittas suas ad conburendum operatus est ¹⁴ ecce parturit iniquitatem et concepto dolore peperit mendacium ¹⁵ lacum aperuit et effodit eum et incidet in interitum quem operatus est ¹⁶ revertetur dolor suus in caput eius et super verticem eius iniquitas sua descendet ¹⁷ confitebor Domino secundum iustitiam eius et cantabo nomini Domini altissimi ^{8 1} victori pro torcularibus canticum David Domine Dominator noster quam grande est nomen tuum in universa terra qui posuisti gloriam tuam super caelos ² ex ore infantium et lactantium perfecisti laudem propter adversarios meos ut quiescat inimicus et ultor ³ videbo enim caelos tuos opera digitorum tuorum lunam et stellas quae fundasti ⁴ quid est homo quoniam recordaris eius vel filius hominis quoniam visitas eum ⁵ minues eum paulo minus a Deo gloria et decore coronabis eum ⁶ dabis ei potestatem super opera manuum tuarum ⁷ cuncta posuisti sub pedibus eius oves et armenta omnia insuper et animalia agri ⁸ aves caeli et pisces maris qui pertranseunt semitas ponti ⁹ Domine Dominator noster quam grande est nomen tuum in universa terra ^{9 1} victori pro morte filii canticum David confitebor Domino in toto corde meo narrabo omnia mirabilia tua ² laetabor et gaudebo in te canam nomini tuo Altissimi ³ cum ceciderint inimici mei retrorsum et corruerint et perierint a facie tua ⁴ fecisti enim iudicium meum et causam meam sedisti super solium iudex iustitiae ⁵ increpuisti gentes periit impius nomen eorum delisti in sempiternum et iugiter ⁶ conpletae sunt solitudines in finem et civitates subvertisti periit memoria eorum cum ipsis ⁷ Dominus autem in sempiternum sedebit stabilivit ad iudicandum solium suum ⁸ et ipse iudicat orbem in iustitia iudicat populos in aequitatibus ⁹ et erit Dominus elevatio oppresso elevatio oportuna in angustia ¹⁰ et confident in te qui noverunt nomen tuum quoniam non dereliquisti quaerentes te Domine ¹¹ cantate Domino habitatori Sion adnuntiate in populis commutationes eius ¹² quoniam quaerens sanguinem eorum recordatus est nec oblitus est clamoris pauperum ¹³ misertus est mei Dominus vidit adflictionem meam ex inimicis meis ¹⁴ qui exaltat me de portis mortis ut narrem omnes laudes tuas in portis filiae Sion ¹⁵ exultabo in salutari tuo demersae sunt gentes in interitu quem fecerunt in rete quod absconderant captus est pes eorum ¹⁶ agnitus est Dominus iudicium faciens in opere manuum suarum corruit impius sonitu sempiterno ¹⁷ convertantur impii in infernum omnes gentes quae oblitae sunt Deum ¹⁸ quoniam non in aeternum oblivioni erit pauper expectatio pauperum non peribit in perpetuum ¹⁹ surge Domine non confortetur homo iudicentur gentes ante faciem tuam ²⁰ pone Domine terrorem eis sciant gentes homines se esse semper ^{10 1} quare Domine stas a longe dispicis in temporibus angustiae ² in superbia impii ardet pauper capiantur in sceleribus quae cogitaverunt ³ quia laudavit impius desiderium animae suae et avarus adplaudens sibi ⁴ blasphemavit Dominum impius secundum altitudinem furoris sui non requiret ⁵ nec est Deus in omnibus cogitationibus eius parturiunt viae eius in omni tempore longe sunt iudicia tua a facie eius omnes inimicos suos dispicit ⁶ loquitur in corde suo non movebor in generatione et generatione ero sine malo ⁷ maledictione os eius plenum est et dolis et avaritia sub lingua eius dolor et iniquitas ⁸ sedet insidians iuxta vestibula in absconditis ut interficiat innocentem ⁹ oculi eius robustos tuos circumspiciunt insidiatur in abscondito quasi leo in cubili insidiatur ut rapiat pauperem rapiet pauperem cum adtraxerit eum ad rete suum ¹⁰ et confractum subiciet et inruet viribus suis valenter ¹¹ dixit in corde suo oblitus est Deus abscondit faciem suam non respiciet in perpetuum ¹² surge Domine Deus leva manum tuam noli oblivisci pauperum ¹³ quare blasphemat impius Deum dicens in corde suo quod non requirat ¹⁴ vides quia tu laborem et furorem respicis ut detur in manu tua tibi relinquuntur fortes tui pupillo tu es factus adiutor ¹⁵ contere brachium impii et maligni quaeres impietatem eius et non invenies ¹⁶ Dominus rex saeculi et aeternitatis perierunt gentes de terra eius ¹⁷ desiderium pauperum audit Dominus praeparasti ut cor eorum audiat auris tua ¹⁸ ut iudices pupillum et oppressum et nequaquam ultra superbiat homo de terra ^{11 1} victori David in Domino speravi quomodo dicitis animae meae transvola in montem ut avis ² quia ecce impii tetenderunt arcum posuerunt sagittam suam super nervum ut sagittent in abscondito rectos corde ³ quia leges dissipatae sunt iustus quid operatus est ⁴ Dominus in templo sancto suo Dominus in caelo thronus eius oculi eius vident palpebrae eius probant filios hominum ⁵ Dominus iustum probat impium autem et diligentem iniquitatem odit anima eius ⁶ pluet super peccatores laqueos ignis et sulphur et spiritus tempestatum pars calicis eorum ⁷ quoniam iustus Dominus iustitias dilexit rectum videbunt facies eorum ^{12 1} victori pro octava canticum David salva Domine quoniam defecit sanctus quoniam inminuti sunt fideles a filiis hominum ² frustra loquuntur unusquisque proximo suo labium subdolum in corde et corde locuti sunt ³ disperdat Dominus omnia labia dolosa linguam magniloquam ⁴ qui dixerunt linguam nostram roboremus labia nostra nobiscum sunt quis dominus noster est ⁵ propter vastitatem inopum et gemitum pauperum nunc consurgam dicit Dominus ponam in salutari auxilium eorum ⁶ eloquia Domini eloquia munda argentum igne probatum separatum a terra colatum septuplum ⁷ tu Domine custodies ea servabis nos a generatione hac in aeternum ⁸ in circuitu impii ambulabunt cum exaltati fuerint vilissimi filiorum hominum ^{13 1} victori canticum David usquequo Domine oblivisceris mei penitus usquequo abscondes faciem tuam a me ² usquequo ponam consilia in anima mea dolorem in corde meo per diem ³ usquequo exaltabitur inimicus meus super me ⁴ convertere exaudi me Domine Deus meus inlumina oculos meos ne umquam obdormiam in mortem ⁵ nequando dicat inimicus meus praevalui adversus eum hostes mei exultabunt cum motus fuero ⁶ ego autem in misericordia tua confido exultabit cor meum in salutari tuo cantabo Domino quia reddidit mihi ^{14 1} victori David dixit stultus in corde suo non est Deus ² corrupti sunt et abominabiles facti sunt studiose non est qui faciat bonum ³ Dominus de caelo prospexit super filios hominum ut videret si esset intellegens requirens Deum ⁴ omnes recesserunt simul conglutinati sunt non est qui faciat bonum non est usque ad unum ⁵ nonne cognoscent omnes qui operantur iniquitatem qui devorant populum meum ut cibum panis ⁶ Dominum non invocaverunt ibi timebunt formidine ⁷ quoniam Deus in generatione iusta est consilium pauperum confudistis quoniam Dominus spes eius est ^{15 1} quis dabit de Sion salutem Israhel quando reduxerit Dominus captivitatem populi sui exultabit Iacob et laetabitur Israhel ² canticum David Domine quis peregrinabitur in tentorio tuo et quis habitabit in monte sancto tuo ³ qui ingreditur sine macula et operatur iustitiam ⁴ loquiturque veritatem in corde suo qui non est facilis in lingua sua neque fecit amico suo malum et obprobrium non sustinuit super vicino suo ⁵ dispicitur oculis eius inprobus timentes autem Dominum glorificat iurat ut se adfligat et non mutat ^{16 1} pecuniam suam non dedit ad usuram et munera adversum innoxium non accepit qui facit haec non movebitur in aeternum ² humilis et simplicis David custodi me Deus quoniam speravi in te ³ dicens Deo Dominus meus es tu bene mihi non est sine te ⁴ sanctis qui in terra sunt et magnificis omnis voluntas mea in eis ⁵ multiplicabuntur idola eorum post tergum sequentium non litabo libamina eorum de sanguine neque adsumam nomina eorum in labiis meis ⁶ Dominus pars hereditatis meae et calicis mei tu possessor sortis meae ⁷ lineae ceciderunt mihi in pulcherrimis et hereditas speciosissima mea est ⁸ benedicam Domino qui dedit consilium mihi insuper et noctibus erudierunt me renes mei ⁹ proponebam in conspectu meo semper quia a dextris meis est ne commovear ¹⁰ propterea laetatum est cor meum et exultavit gloria mea et caro mea habitavit confidenter ¹¹ non enim derelinques animam meam in inferno nec dabis sanctum tuum videre corruptionem ostendes mihi semitam vitae plenitudinem laetitiarum ante vultum tuum decores in dextera tua aeternos ^{17 1} oratio David audi Deus iustum intende deprecationem meam auribus percipe orationem meam absque labiis mendacii ² de vultu tuo iudicium meum prodeat oculi tui videant aequitates ³ probasti cor meum visitasti nocte conflasti me et non invenisti ⁴ cogitationes meas transire os meum in opere hominum propter verbum labiorum tuorum ego observavi vias latronis ⁵ sustenta gressus meos in callibus tuis et non labentur vestigia mea ⁶ ego invocavi te quia exaudies me Deus inclina aurem tuam mihi audi eloquium meum ⁷ mirabilem fac misericordiam tuam salvator sperantium ⁸ a resistentibus dexterae tuae custodi me quasi pupillam intus in oculo in umbra alarum tuarum protege me ⁹ a facie impiorum vastantium me inimici mei animam meam circumdederunt ¹⁰ adipe suo concluserunt et ore locuti sunt superbe ¹¹ incedentes adversum me nunc circumdederunt me oculos suos posuerunt declinare in terram ¹² similitudo eius quasi leonis desiderantis praedam et quasi catuli leonis sedentis in absconditis ¹³ surge Domine praeveni faciem eius incurva eum salva animam meam ab impio qui est gladius tuus ¹⁴ a viris manus tuae Domine qui mortui sunt in profundo quorum pars in vita et quorum de absconditis tuis replesti ventrem qui satiabuntur filiis et dimittent reliquias suas parvulis eorum ¹⁵ ego in iustitia videbo faciem tuam implebor cum evigilavero similitudine tua ^{18 1} victori servo Domini David quae locutus est Domino verba cantici huius in die qua liberavit eum Dominus de manu omnium inimicorum suorum et de manu Saul et ait diligam te Domine fortitudo mea ² Domine petra mea et robur meum et salvator meus Deus meus fortis meus sperabo in eo scutum meum et cornu salutis meae susceptor meus ³ laudatum invocabo Dominum et ab inimicis meis salvus ero ⁴ circumdederunt me funes mortis et torrentes diabuli terruerunt me ⁵ funes inferi circumdederunt me praevenerunt me laquei mortis ⁶ in tribulatione mea invocabo Dominum et ad Deum meum clamabo exaudiet de templo suo vocem meam et clamor meus ante faciem eius veniet in aures eius ⁷ commota est et contremuit terra et fundamenta montium concussa sunt et conquassata quoniam iratus est ⁸ ascendit fumus de furore eius et ignis ex ore eius devorans carbones incensi sunt ab eo ⁹ inclinavit caelos et descendit et caligo sub pedibus eius ¹⁰ et ascendit super cherub et volavit super pinnas venti ¹¹ posuit tenebras latibulum suum in circuitu eius tabernaculum eius tenebrosas aquas in nubibus aetheris ¹² prae fulgore in conspectu eius nubes transierunt grando et carbones ignis ¹³ et intonuit de caelo Dominus et Altissimus dedit vocem suam grandinem et carbones ignis ¹⁴ et emisit sagittas suas et dissipavit eos fulgora multiplicavit et conturbavit illos ¹⁵ et apparuerunt effusiones aquarum et revelata sunt fundamenta orbis ab increpatione tua Domine ab inspiratione spiritus furoris tui ¹⁶ misit de alto et accepit me extraxit me de aquis multis ¹⁷ liberavit me de inimicis meis potentissimis et de his qui oderant me quoniam robustiores me erant ¹⁸ praevenerunt me in die adflictionis meae et factus est Dominus firmamentum meum ¹⁹ et eduxit me in latitudinem liberavit me quia placuit ei ²⁰ retribuit mihi Dominus secundum iustitiam meam et secundum munditiam manuum mearum reddidit mihi ²¹ quia custodivi vias Domini et non egi impie a Deo meo ²² omnia enim iudicia eius in conspectu meo et praecepta eius non amovi a me ²³ et fui inmaculatus cum eo et custodivi me ab iniquitate mea ²⁴ et restituit Dominus mihi secundum iustitiam meam et secundum munditiam manuum mearum in conspectu oculorum eius ²⁵ cum sancto sanctus eris cum viro innocente innocenter ages ²⁶ cum electo electus eris et cum perverso pervertes ²⁷ quia tu populum pauperem salvabis et oculos excelsos humiliabis ²⁸ quia tu inluminabis lucernam meam Domine Deus meus inlustrabis tenebras meas ²⁹ in te enim curram accinctus et in Deo meo transiliam murum ³⁰ Deus inmaculata via eius eloquium Domini igne examinatum scutum est omnium sperantium in se ³¹ quis est deus praeter Dominum et quis fortis praeter Deum nostrum ³² Deus qui accingit me fortitudine et posuit inmaculatam viam meam ³³ coaequans pedes meos cervis et super excelsa statuens me ³⁴ docens manus meas ad proelium et conponens quasi arcum aereum brachia mea ³⁵ dedisti mihi clipeum salutis tuae et dextera tua confortavit me et mansuetudo tua multiplicavit me ³⁶ dilatabis gressus meos subtus me et non deficient tali mei ³⁷ persequar inimicos meos et adprehendam et non revertar donec consumam eos ³⁸ caedam eos et non poterunt surgere cadent sub pedibus meis ³⁹ accinxisti me fortitudine ad proelium incurvabis resistentes mihi sub me ⁴⁰ inimicorum meorum dedisti mihi dorsum et odientes me disperdidisti ⁴¹ clamabunt et non erit qui salvet ad Dominum et non exaudiet eos ⁴² delebo eos ut pulverem ante faciem venti ut lutum platearum proiciam eos ⁴³ salvabis me a contradictionibus populi pones me in caput gentium ⁴⁴ populus quem ignoravi serviet mihi auditione auris oboediet mihi ⁴⁵ filii alieni mentientur mihi filii alieni defluent et contrahentur in angustiis suis ⁴⁶ vivit Dominus et benedictus Deus meus et exaltabitur Deus salutis meae ⁴⁷ Deus qui das vindictas mihi et congregas populos sub me qui servas me ab inimicis meis ⁴⁸ et a resistentibus mihi elevas me a viro iniquo libera me ⁴⁹ propterea confitebor tibi in gentibus Domine et nomini tuo cantabo ⁵⁰ magnificanti salutes regis sui et facienti misericordiam christo suo David et semini eius usque in aeternum ^{19 1} victori canticum David caeli enarrant gloriam Dei et opus manus eius adnuntiat firmamentum ² dies diei eructat verbum et nox nocti indicat scientiam ³ non est sermo et non sunt verba quibus non audiatur vox eorum ⁴ in universam terram exivit sonus eorum et in finibus orbis verba eorum ⁵ soli posuit tabernaculum in eis et ipse quasi sponsus procedens de thalamo suo exultavit ut fortis ad currendam viam ⁶ a summitate caeli egressus eius et cursus eius usque ad summitatem illius nec est qui se abscondat a calore eius ⁷ lex Domini inmaculata convertens animam testimonium Domini fidele sapientiam praestans parvulis ⁸ praecepta Domini recta laetificantia cor mandatum Domini lucidum inluminans oculos ⁹ timor Domini mundus perseverans in saecula iudicia Domini vera iustificata in semet ipsis ¹⁰ desiderabilia super aurum et lapidem pretiosum multum et dulciora super mel et favum redundantem ¹¹ unde et servus tuus docebit ea in custodiendis eis fructus multus ¹² errores quis intelleget ab occultis munda me ¹³ a superbis quoque libera servum tuum si non fuerint dominati mei tunc inmaculatus ero et mundabor a delicto maximo ¹⁴ sint placentes sermones oris mei meditatio cordis mei in conspectu tuo Domine fortitudo mea et redemptor meus ^{20 1} victori canticum David exaudiat te Dominus in die tribulationis protegat te nomen Dei Iacob ² mittat tibi auxilium de sancto et de Sion roboret te ³ memor sit omnis sacrificii tui et holocaustum tuum pingue fiat semper ⁴ det tibi secundum cor tuum et omnem voluntatem tuam impleat ⁵ laudabimus in salutari tuo et in nomine Dei nostri ducemus choros ⁶ impleat Dominus omnes petitiones tuas nunc scio quoniam salvabit Dominus christum suum exaudiet eum de caelo sancto suo in fortitudine salutis dexterae suae ⁷ hii in curribus et hii in equis nos autem nominis Domini Dei nostri recordabimur ⁸ ipsi incurvati sunt et ceciderunt nos autem resurreximus et erecti sumus ⁹ Domine salva rex exaudiet nos in die qua invocaverimus ^{21 1} victori canticum David Domine in fortitudine tua laetabitur rex et in salutari tuo exultabit vehementer ² desiderium cordis eius dedisti ei et voluntate labiorum eius non fraudasti eum semper ³ quoniam praevenies eum benedictionibus bonitatis pones in capite eius coronam de lapide pretioso ⁴ vitam petivit te et dedisti ei longitudinem dierum in saeculum et in aeternum ⁵ magna gloria eius in salutari tuo gloriam et decorem pones super eum ⁶ pones enim eum benedictionem sempiternam et hilarabis eum laetitia apud vultum tuum ⁷ quia rex confidet in Domino et in misericordia Excelsi non decipietur ⁸ inveniet manus tua omnes inimicos tuos dextera tua inveniet odientes te ⁹ pones eos ut clibanum ignis in tempore vultus tui Dominus in furore suo praecipitabit eos et devorabit eos ignis ¹⁰ fructum eorum de terra perdes et semen eorum de filiis hominum ¹¹ quoniam inclinaverunt super te malum cogitaverunt scelus quod non potuerunt ¹² quia pones eos umerum funes tuos firmabis contra facies eorum ¹³ exaltare Domine in fortitudine tua cantabimus et psallemus fortitudines tuas ^{22 1} victori pro cervo matutino canticum Deus Deus meus quare dereliquisti me longe a salute mea verba rugitus mei ² Deus meus clamabo per diem et non exaudies et nocte nec est silentium mihi ³ et tu sancte habitator Laus Israhel ⁴ in te confisi sunt patres nostri confisi sunt et salvasti eos ⁵ ad te clamaverunt et salvati sunt in te confisi sunt et non sunt confusi ⁶ ego autem sum vermis et non homo obprobrium hominum et dispectio plebis ⁷ omnes videntes me subsannant me dimittunt labium movent caput ⁸ confugit ad Dominum salvet eum liberet eum quoniam vult eum ⁹ tu autem propugnator meus ex utero fiducia mea ab uberibus matris meae ¹⁰ in te proiectus sum ex vulva de ventre matris meae Deus meus es tu ¹¹ ne longe fias a me quoniam tribulatio proxima est quoniam non est adiutor ¹² circumdederunt me vituli multi tauri pingues vallaverunt me ¹³ aperuerunt super me os suum quasi leo capiens et rugiens ¹⁴ sicut aqua effusus sum et separata sunt omnia ossa mea factum est cor meum sicut cera liquefacta in medio ventris mei ¹⁵ aruit velut testa fortitudo mea et lingua mea adhesit palato meo et in pulverem mortis detraxisti me ¹⁶ circumdederunt me venatores concilium pessimorum vallavit me vinxerunt manus meas et pedes meos ¹⁷ numeravi omnia ossa mea quae ipsi respicientes viderunt in me ¹⁸ diviserunt vestimenta mea sibi et super vestimentum meum miserunt sortem ¹⁹ tu autem Domine ne longe fias fortitudo mea in auxilium meum festina ²⁰ erue a gladio animam meam de manu canis solitariam meam ²¹ salva me ex ore leonis et de cornibus unicornium exaudi me ²² narrabo nomen tuum fratribus meis in medio ecclesiae laudabo te ²³ qui timetis Dominum laudate eum omne semen Iacob glorificate eum ²⁴ et metuite eum universum semen Israhel quoniam non dispexit neque contempsit modestiam pauperis et non abscondit faciem suam ab eo et cum clamaret ad eum audivit ²⁵ apud te laus mea in ecclesia multa vota mea reddam in conspectu timentium eum ²⁶ comedent mites et saturabuntur laudabunt Dominum quaerentes eum vivet cor vestrum in sempiternum ²⁷ recordabuntur et convertentur ad Dominum omnes fines terrae et adorabunt coram eo universae cognationes gentium ²⁸ quia Domini est regnum et dominabitur gentibus ²⁹ comederunt et adoraverunt omnes pingues terrae ante faciem eius curvabunt genu universi qui descendunt in pulverem ³⁰ et anima eius ipsi vivet semen serviet ei ³¹ narrabitur Domino in generatione venient et adnuntiabunt iustitias eius populo qui nascetur quas fecit ^{23 1} canticum David Dominus pascit me nihil mihi deerit ² in pascuis herbarum adclinavit me super aquas refectionis enutrivit me ³ animam meam refecit duxit me per semitas iustitiae propter nomen suum ⁴ sed et si ambulavero in valle mortis non timebo malum quoniam tu mecum es virga tua et baculus tuus ipsa consolabuntur me ⁵ pones coram me mensam ex adverso hostium meorum inpinguasti oleo caput meum calix meus inebrians ⁶ sed et benignitas et misericordia subsequetur me omnibus diebus vitae meae et habitabo in domo Domini in longitudine dierum ^{24 1} David canticum Domini est terra et plenitudo eius orbis et habitatores eius ² quia ipse super maria fundavit eum et super flumina stabilivit illum ³ quis ascendet in montem Domini et quis stabit in loco sancto eius ⁴ innocens manibus et mundo corde qui non exaltavit frustra animam suam et non iuravit dolose ⁵ accipiet benedictionem a Domino et iustitiam a Deo salutari suo ⁶ haec generatio quaerentium eum quaerentium faciem tuam Iacob semper ⁷ levate portae capita vestra et elevamini ianuae sempiternae et ingrediatur rex gloriae ⁸ quis est iste rex gloriae Dominus fortis et potens Dominus fortis in proelio ⁹ levate portae capita vestra et erigite ianuae sempiternae et ingrediatur rex gloriae ¹⁰ quis est iste rex gloriae Dominus exercituum ipse est rex gloriae semper ^{25 1} David ad te Domine animam meam levabo ² Deus meus in te confisus sum ne confundar ³ ne laetentur inimici mei sed et universi qui sperant in te non confundantur ⁴ confundantur qui iniqua gerunt frustra vias tuas Domine ostende mihi semitas tuas doce me ⁵ deduc me in veritate tua et doce me quia tu Deus salvator meus te expectavi tota die ⁶ recordare miserationum tuarum Domine et misericordiarum tuarum quia ex sempiterno sunt ⁷ peccatorum adulescentiae meae et scelerum meorum ne memineris secundum misericordiam tuam recordare mei propter bonitatem tuam Domine ⁸ bonus et rectus Dominus propterea docebit peccatores in via ⁹ deducet mansuetos in iudicio et docebit modestos viam suam ¹⁰ omnes semitae Domini misericordia et veritas his qui custodiunt pactum eius et testificationem eius ¹¹ propter nomen tuum propitiare iniquitati meae quoniam grandis est ¹² quis est iste vir timens Dominum quem docebit in via quam elegerit ¹³ anima eius in bono commorabitur et semen eius hereditabit terram ¹⁴ secretum Domini timentibus eum et pactum suum ostendet eis ¹⁵ oculi mei semper ad Dominum quia ipse educet de rete pedes meos ¹⁶ respice in me et miserere mei quoniam solus et pauper sum ego ¹⁷ tribulationes cordis mei multiplicatae sunt de angustiis meis educ me ¹⁸ vide adflictionem meam et laborem meum et porta omnia peccata mea ¹⁹ vide inimicos meos quia multiplicati sunt et odio iniquo oderunt me ²⁰ custodi animam meam et libera me non confundar quia speravi in te ²¹ simplicitas et aequitas servabunt me quia expectavi te ²² redime Deus Israhelem ex omnibus angustiis suis ^{26 1} David iudica me Deus quoniam ego in simplicitate mea ambulavi et in Domino confidens non deficiam ² proba me Domine et tempta me ure renes meos et cor meum ³ quia misericordia tua in conspectu oculorum meorum est et ambulabo in veritate tua ⁴ non sedi cum viris vanitatis et cum superbis non ingrediar ⁵ odivi ecclesiam pessimorum et cum iniquis non sedebo ⁶ lavabo in innocentia manus meas et circuibo altare tuum Domine ⁷ ut clara voce praedicem laudem et narrem omnia mirabilia tua ⁸ Domine dilexi habitaculum domus tuae et locum tabernaculi gloriae tuae ⁹ ne auferas cum peccatoribus animam meam cum viris sanguinum vitam meam ¹⁰ in quorum manibus scelus est et dextera eorum repleta est muneribus ¹¹ ego autem in simplicitate mea gradiar redime me et miserere mei ¹² pes meus stetit in recto in ecclesiis benedicam Domino ^{27 1} David Dominus lux mea et salutare meum quem timebo Dominus fortitudo vitae meae quem formidabo ² cum adpropinquarent mihi maligni ut comederent carnem meam hostes mei et inimici mei ipsi inpigerunt et ceciderunt ³ si steterint adversus me castra non timebit cor meum si surrexerit contra me bellum in hoc ego confidam ⁴ unum petivi a Domino hoc requiram ut habitem in domo Domini omnibus diebus vitae meae ut videam pulchritudinem Domini et adtendam templum eius ⁵ abscondet enim me in umbra sua in die pessima abscondet me in secreto tabernaculi sui ⁶ in petra exaltabit me nunc quoque exaltabit caput meum super inimicos meos qui sunt in circuitu meo et immolabo in tabernaculo eius hostias iubili cantabo et psallam Domino ⁷ audi Domine vocem meam invocantis miserere mei et exaudi me ⁸ tibi dixit cor meum quaesivit vultus meus faciem tuam Domine et requiram ⁹ ne abscondas faciem tuam a me ne declines in furore tuo a servo tuo auxilium meum fuisti ne derelinquas me et ne dimittas me Deus salvator meus ¹⁰ pater enim meus et mater mea dereliquerunt me Dominus autem collegit me ¹¹ ostende mihi Domine viam tuam et deduc me in semita recta propter insidiatores meos ¹² ne tradas me Domine animae tribulantium me quoniam surrexerunt contra me testes falsi et apertum mendacium ¹³ ego autem credo quod videam bona Domini in terra viventium ¹⁴ expecta Dominum confortare et roboretur cor tuum et sustine Dominum ^{28 1} David ad te Domine clamabo Fortis meus ne obsurdescas mihi ne forte tacente te mihi conparer his qui descendunt in lacum ² audi Domine deprecationem meam cum clamavero ad te cum levavero manus meas ad oraculum sanctum tuum ³ ne trahas me cum impiis et cum operantibus iniquitatem qui loquuntur pacem cum amicis suis et est malum in corde eorum ⁴ da eis secundum opus suum et secundum malum adinventionum suarum iuxta opus manuum suarum da eis redde retributionem suam illis ⁵ quoniam non intellegunt opera Domini et opus manuum eius destrues eos et non aedificabis ⁶ benedictus Dominus qui audivit vocem deprecationis meae ⁷ Dominus fortitudo mea et scutum meum in ipso confisum est cor meum et habui adiutorium gavisum est cor meum et in cantico meo confitebor illi ⁸ Dominus fortitudo mea et robur salutarium christi sui est ⁹ salva populum tuum et benedic hereditati tuae et pasce eos et subleva eos usque in sempiternum ^{29 1} canticum David adferte Domino filios arietum ² adferte Domino gloriam et imperium adferte Domino gloriam nomini eius adorate Dominum in decore sancto ³ vox Domini super aquas Deus gloriae intonuit Dominus super aquas multas ⁴ vox Domini in fortitudine vox Domini in decore ⁵ vox Domini confringentis cedros et confringet Dominus cedros Libani ⁶ et disperget eas quasi vitulus Libani et Sarion quasi filius rinocerotis ⁷ vox Domini dividens flammas ignis ⁸ vox Domini parturire faciens desertum Cades ⁹ vox Domini obsetricans cervis et revelans saltus et in templo eius omnis loquetur gloriam ¹⁰ Dominus diluvium inhabitat et sedebit Dominus rex in aeternum ¹¹ Dominus fortitudinem populo suo dabit Dominus benedicet populo suo in pace ^{30 1} psalmus cantici pro dedicatione domus David exaltabo te Domine quoniam salvasti me et non delectasti inimicos meos super me ² Domine Deus meus clamavi ad te et sanasti me ³ Domine eduxisti de inferno animam meam vivificasti me ne descenderem in lacum ⁴ cantate Domino sancti eius et confitemini memoriae sanctitatis eius ⁵ quoniam ad momentum est ira eius et vita in repropitiatione eius ad vesperum commorabitur fletus et in matutino laus ⁶ ego autem dixi in abundantia mea non commovebor in sempiternum ⁷ Domine in voluntate tua posuisti monti meo fortitudinem abscondisti faciem tuam et factus sum conturbatus ⁸ ad Dominum clamabo et Dominum deprecabor ⁹ quae est utilitas in sanguine meo cum descendero in corruptionem numquid confitebitur tibi pulvis aut adnuntiabit veritatem tuam ¹⁰ audi Domine et miserere mei Domine esto adiutor ¹¹ convertisti planctum meum in chorum mihi solvisti saccum meum et accinxisti me laetitia ¹² ut laudet te gloria et non taceat Domine Deus meus in sempiternum confitebor tibi