HOT(i)
38 (89:39) ואתה זנחת ותמאס התעברת עם משׁיחך׃ 39 (89:40) נארתה ברית עבדך חללת לארץ נזרו׃ 40 (89:41) פרצת כל גדרתיו שׂמת מבצריו מחתה׃ 41 (89:42) שׁסהו כל עברי דרך היה חרפה לשׁכניו׃ 42 (89:43) הרימות ימין צריו השׂמחת כל אויביו׃ 43 (89:44) אף תשׁיב צור חרבו ולא הקימתו במלחמה׃ 44 (89:45) השׁבת מטהרו וכסאו לארץ מגרתה׃ 45 (89:46) הקצרת ימי עלומיו העטית עליו בושׁה סלה׃ 46 (89:47) עד מה יהוה תסתר לנצח תבער כמו אשׁ חמתך׃ 47 (89:48) זכר אני מה חלד על מה שׁוא בראת כל בני אדם׃ 48 (89:49) מי גבר יחיה ולא יראה מות ימלט נפשׁו מיד שׁאול סלה׃ 49 (89:50) איה חסדיך הראשׁנים אדני נשׁבעת לדוד באמונתך׃ 50 (89:51) זכר אדני חרפת עבדיך שׂאתי בחיקי כל רבים עמים׃ 51 (89:52) אשׁר חרפו אויביך יהוה אשׁר חרפו עקבות משׁיחך׃ 52 (89:53) ברוך יהוה לעולם אמן ואמן׃