HOT(i)
1 מזמור לדוד יהוה קראתיך חושׁה לי האזינה קולי בקראי׃ 2 תכון תפלתי קטרת לפניך משׂאת כפי מנחת ערב׃ 3 שׁיתה יהוה שׁמרה לפי נצרה על דל שׂפתי׃ 4 אל תט לבי לדבר רע להתעולל עללות ברשׁע את אישׁים פעלי און ובל אלחם במנעמיהם׃ 5 יהלמני צדיק חסד ויוכיחני שׁמן ראשׁ אל יני ראשׁי כי עוד ותפלתי ברעותיהם׃ 6 נשׁמטו בידי סלע שׁפטיהם ושׁמעו אמרי כי נעמו׃ 7 כמו פלח ובקע בארץ נפזרו עצמינו לפי שׁאול׃ 8 כי אליך יהוה אדני עיני בכה חסיתי אל תער נפשׁי׃ 9 שׁמרני מידי פח יקשׁו לי ומקשׁות פעלי און׃ 10 יפלו במכמריו רשׁעים יחד אנכי עד אעבור׃