HOT(i)
21 ויאמר אלעזר הכהן אל אנשׁי הצבא הבאים למלחמה זאת חקת התורה אשׁר צוה יהוה את משׁה׃ 22 אך את הזהב ואת הכסף את הנחשׁת את הברזל את הבדיל ואת העפרת׃ 23 כל דבר אשׁר יבא באשׁ תעבירו באשׁ וטהר אך במי נדה יתחטא וכל אשׁר לא יבא באשׁ תעבירו במים׃ 24 וכבסתם בגדיכם ביום השׁביעי וטהרתם ואחר תבאו אל המחנה׃ 25 ויאמר יהוה אל משׁה לאמר׃ 26 שׂא את ראשׁ מלקוח השׁבי באדם ובבהמה אתה ואלעזר הכהן וראשׁי אבות העדה׃ 27 וחצית את המלקוח בין תפשׂי המלחמה היצאים לצבא ובין כל העדה׃ 28 והרמת מכס ליהוה מאת אנשׁי המלחמה היצאים לצבא אחד נפשׁ מחמשׁ המאות מן האדם ומן הבקר ומן החמרים ומן הצאן׃ 29 ממחציתם תקחו ונתתה לאלעזר הכהן תרומת יהוה׃ 30 וממחצת בני ישׂראל תקח אחד אחז מן החמשׁים מן האדם מן הבקר מן החמרים ומן הצאן מכל הבהמה ונתתה אתם ללוים שׁמרי משׁמרת משׁכן יהוה׃ 31 ויעשׂ משׁה ואלעזר הכהן כאשׁר צוה יהוה את משׁה׃