Nahum 1

HOT^{(i) 1} משׂא נינוה ספר חזון נחום האלקשׁי׃ ² אל קנוא ונקם יהוה נקם יהוה ובעל חמה נקם יהוה לצריו ונוטר הוא לאיביו׃ ³ יהוה ארך אפים וגדול כח ונקה לא ינקה יהוה בסופה ובשׂערה דרכו וענן אבק רגליו׃ ⁴ גוער בים ויבשׁהו וכל הנהרות החריב אמלל בשׁן וכרמל ופרח לבנון אמלל׃ ⁵ הרים רעשׁו ממנו והגבעות התמגגו ותשׂא הארץ מפניו ותבל וכל ישׁבי׃ ⁶ לפני זעמו מי יעמוד ומי יקום בחרון אפו חמתו נתכה כאשׁ והצרים נתצו ממנו׃ ⁷ טוב יהוה למעוז ביום צרה וידע חסי׃ ⁸ ובשׁטף עבר כלה יעשׂה מקומה ואיביו ירדף חשׁך׃ ⁹ מה תחשׁבון אל יהוה כלה הוא עשׂה לא תקום פעמים צרה׃ ¹⁰ כי עד סירים סבכים וכסבאם סבואים אכלו כקשׁ יבשׁ מלא׃ ¹¹ ממך יצא חשׁב על יהוה רעה יעץ בליעל׃ ¹² כה אמר יהוה אם שׁלמים וכן רבים וכן נגזו ועבר וענתך לא אענך עוד׃ ¹³ ועתה אשׁבר מטהו מעליך ומוסרתיך אנתק׃ ¹⁴ וצוה עליך יהוה לא יזרע משׁמך עוד מבית אלהיך אכרית פסל ומסכה אשׂים קברך כי קלות׃ ¹⁵ (2:1) הנה על ההרים רגלי מבשׂר משׁמיע שׁלום חגי יהודה חגיך שׁלמי נדריך כי לא יוסיף עוד לעבור בך בליעל כלה נכרת׃