Leviticus 13:2-14:57 אדם כי יהיה בעור בשׂרו שׂאת או ספחת או בהרת והיה בעור בשׂרו לנגע צרעת והובא אל אהרן הכהן או אל אחד מבניו הכהנים׃

HOT⁽ⁱ⁾ ² אדם כי יהיה בעור בשׂרו שׂאת או ספחת או בהרת והיה בעור בשׂרו לנגע צרעת והובא אל אהרן הכהן או אל אחד מבניו הכהנים׃ ³ וראה הכהן את הנגע בעור הבשׂר ושׂער בנגע הפך לבן ומראה הנגע עמק מעור בשׂרו נגע צרעת הוא וראהו הכהן וטמא אתו׃ ⁴ ואם בהרת לבנה הוא בעור בשׂרו ועמק אין מראה מן העור ושׂערה לא הפך לבן והסגיר הכהן את הנגע שׁבעת ימים׃ ⁵ וראהו הכהן ביום השׁביעי והנה הנגע עמד בעיניו לא פשׂה הנגע בעור והסגירו הכהן שׁבעת ימים שׁנית׃ ⁶ וראה הכהן אתו ביום השׁביעי שׁנית והנה כהה הנגע ולא פשׂה הנגע בעור וטהרו הכהן מספחת הוא וכבס בגדיו וטהר׃ ⁷ ואם פשׂה תפשׂה המספחת בעור אחרי הראתו אל הכהן לטהרתו ונראה שׁנית אל הכהן׃ ⁸ וראה הכהן והנה פשׂתה המספחת בעור וטמאו הכהן צרעת הוא׃ ⁹ נגע צרעת כי תהיה באדם והובא אל הכהן׃ ¹⁰ וראה הכהן והנה שׂאת לבנה בעור והיא הפכה שׂער לבן ומחית בשׂר חי בשׂאת׃ ¹¹ צרעת נושׁנת הוא בעור בשׂרו וטמאו הכהן לא יסגרנו כי טמא הוא׃ ¹² ואם פרוח תפרח הצרעת בעור וכסתה הצרעת את כל עור הנגע מראשׁו ועד רגליו לכל מראה עיני הכהן׃ ¹³ וראה הכהן והנה כסתה הצרעת את כל בשׂרו וטהר את הנגע כלו הפך לבן טהור הוא׃ ¹⁴ וביום הראות בו בשׂר חי יטמא׃ ¹⁵ וראה הכהן את הבשׂר החי וטמאו הבשׂר החי טמא הוא צרעת הוא׃ ¹⁶ או כי ישׁוב הבשׂר החי ונהפך ללבן ובא אל הכהן׃ ¹⁷ וראהו הכהן והנה נהפך הנגע ללבן וטהר הכהן את הנגע טהור הוא׃ ¹⁸ ובשׂר כי יהיה בו בערו שׁחין ונרפא׃ ¹⁹ והיה במקום השׁחין שׂאת לבנה או בהרת לבנה אדמדמת ונראה אל הכהן׃ ²⁰ וראה הכהן והנה מראה שׁפל מן העור ושׂערה הפך לבן וטמאו הכהן נגע צרעת הוא בשׁחין פרחה׃ ²¹ ואם יראנה הכהן והנה אין בה שׂער לבן ושׁפלה איננה מן העור והיא כהה והסגירו הכהן שׁבעת ימים׃ ²² ואם פשׂה תפשׂה בעור וטמא הכהן אתו נגע הוא׃ ²³ ואם תחתיה תעמד הבהרת לא פשׂתה צרבת השׁחין הוא וטהרו הכהן׃ ²⁴ או בשׂר כי יהיה בערו מכות אשׁ והיתה מחית המכוה בהרת לבנה אדמדמת או לבנה׃ ²⁵ וראה אתה הכהן והנה נהפך שׂער לבן בבהרת ומראה עמק מן העור צרעת הוא במכוה פרחה וטמא אתו הכהן נגע צרעת הוא׃ ²⁶ ואם יראנה הכהן והנה אין בבהרת שׂער לבן ושׁפלה איננה מן העור והוא כהה והסגירו הכהן שׁבעת ימים׃ ²⁷ וראהו הכהן ביום השׁביעי אם פשׂה תפשׂה בעור וטמא הכהן אתו נגע צרעת הוא׃ ²⁸ ואם תחתיה תעמד הבהרת לא פשׂתה בעור והוא כהה שׂאת המכוה הוא וטהרו הכהן כי צרבת המכוה הוא׃ ²⁹ ואישׁ או אשׁה כי יהיה בו נגע בראשׁ או בזקן׃ ³⁰ וראה הכהן את הנגע והנה מראהו עמק מן העור ובו שׂער צהב דק וטמא אתו הכהן נתק הוא צרעת הראשׁ או הזקן הוא׃ ³¹ וכי יראה הכהן את נגע הנתק והנה אין מראהו עמק מן העור ושׂער שׁחר אין בו והסגיר הכהן את נגע הנתק שׁבעת ימים׃ ³² וראה הכהן את הנגע ביום השׁביעי והנה לא פשׂה הנתק ולא היה בו שׂער צהב ומראה הנתק אין עמק מן העור׃ ³³ והתגלח ואת הנתק לא יגלח והסגיר הכהן את הנתק שׁבעת ימים שׁנית׃ ³⁴ וראה הכהן את הנתק ביום השׁביעי והנה לא פשׂה הנתק בעור ומראהו איננו עמק מן העור וטהר אתו הכהן וכבס בגדיו וטהר׃ ³⁵ ואם פשׂה יפשׂה הנתק בעור אחרי טהרתו׃ ³⁶ וראהו הכהן והנה פשׂה הנתק בעור לא יבקר הכהן לשׂער הצהב טמא הוא׃ ³⁷ ואם בעיניו עמד הנתק ושׂער שׁחר צמח בו נרפא הנתק טהור הוא וטהרו הכהן׃ ³⁸ ואישׁ או אשׁה כי יהיה בעור בשׂרם בהרת בהרת לבנת׃ ³⁹ וראה הכהן והנה בעור בשׂרם בהרת כהות לבנת בהק הוא פרח בעור טהור הוא׃ ⁴⁰ ואישׁ כי ימרט ראשׁו קרח הוא טהור הוא׃ ⁴¹ ואם מפאת פניו ימרט ראשׁו גבח הוא טהור הוא׃ ⁴² וכי יהיה בקרחת או בגבחת נגע לבן אדמדם צרעת פרחת הוא בקרחתו או בגבחתו׃ ⁴³ וראה אתו הכהן והנה שׂאת הנגע לבנה אדמדמת בקרחתו או בגבחתו כמראה צרעת עור בשׂר׃ ⁴⁴ אישׁ צרוע הוא טמא הוא טמא יטמאנו הכהן בראשׁו נגעו׃ ⁴⁵ והצרוע אשׁר בו הנגע בגדיו יהיו פרמים וראשׁו יהיה פרוע ועל שׂפם יעטה וטמא טמא יקרא׃ ⁴⁶ כל ימי אשׁר הנגע בו יטמא טמא הוא בדד ישׁב מחוץ למחנה מושׁבו׃ ⁴⁷ והבגד כי יהיה בו נגע צרעת בבגד צמר או בבגד פשׁתים׃ ⁴⁸ או בשׁתי או בערב לפשׁתים ולצמר או בעור או בכל מלאכת עור׃ ⁴⁹ והיה הנגע ירקרק או אדמדם בבגד או בעור או בשׁתי או בערב או בכל כלי עור נגע צרעת הוא והראה את הכהן׃ ⁵⁰ וראה הכהן את הנגע והסגיר את הנגע שׁבעת ימים׃ ⁵¹ וראה את הנגע ביום השׁביעי כי פשׂה הנגע בבגד או בשׁתי או בערב או בעור לכל אשׁר יעשׂה העור למלאכה צרעת ממארת הנגע טמא הוא׃ ⁵² ושׂרף את הבגד או את השׁתי או את הערב בצמר או בפשׁתים או את כל כלי העור אשׁר יהיה בו הנגע כי צרעת ממארת הוא באשׁ תשׂרף׃ ⁵³ ואם יראה הכהן והנה לא פשׂה הנגע בבגד או בשׁתי או בערב או בכל כלי עור׃ ⁵⁴ וצוה הכהן וכבסו את אשׁר בו הנגע והסגירו שׁבעת ימים שׁנית׃ ⁵⁵ וראה הכהן אחרי הכבס את הנגע והנה לא הפך הנגע את עינו והנגע לא פשׂה טמא הוא באשׁ תשׂרפנו פחתת הוא בקרחתו או בגבחתו׃ ⁵⁶ ואם ראה הכהן והנה כהה הנגע אחרי הכבס אתו וקרע אתו מן הבגד או מן העור או מן השׁתי או מן הערב׃ ⁵⁷ ואם תראה עוד בבגד או בשׁתי או בערב או בכל כלי עור פרחת הוא באשׁ תשׂרפנו את אשׁר בו הנגע׃ ⁵⁸ והבגד או השׁתי או הערב או כל כלי העור אשׁר תכבס וסר מהם הנגע וכבס שׁנית וטהר׃ ⁵⁹ זאת תורת נגע צרעת בגד הצמר או הפשׁתים או השׁתי או הערב או כל כלי עור לטהרו או לטמאו׃¹⁴ ¹ וידבר יהוה אל משׁה לאמר׃ ² זאת תהיה תורת המצרע ביום טהרתו והובא אל הכהן׃ ³ ויצא הכהן אל מחוץ למחנה וראה הכהן והנה נרפא נגע הצרעת מן הצרוע׃ ⁴ וצוה הכהן ולקח למטהר שׁתי צפרים חיות טהרות ועץ ארז ושׁני תולעת ואזב׃ ⁵ וצוה הכהן ושׁחט את הצפור האחת אל כלי חרשׂ על מים חיים׃ ⁶ את הצפר החיה יקח אתה ואת עץ הארז ואת שׁני התולעת ואת האזב וטבל אותם ואת הצפר החיה בדם הצפר השׁחטה על המים החיים׃ ⁷ והזה על המטהר מן הצרעת שׁבע פעמים וטהרו ושׁלח את הצפר החיה על פני השׂדה׃ ⁸ וכבס המטהר את בגדיו וגלח את כל שׂערו ורחץ במים וטהר ואחר יבוא אל המחנה וישׁב מחוץ לאהלו שׁבעת ימים׃ ⁹ והיה ביום השׁביעי יגלח את כל שׂערו את ראשׁו ואת זקנו ואת גבת עיניו ואת כל שׂערו יגלח וכבס את בגדיו ורחץ את בשׂרו במים וטהר׃ ¹⁰ וביום השׁמיני יקח שׁני כבשׂים תמימם וכבשׂה אחת בת שׁנתה תמימה ושׁלשׁה עשׂרנים סלת מנחה בלולה בשׁמן ולג אחד שׁמן׃ ¹¹ והעמיד הכהן המטהר את האישׁ המטהר ואתם לפני יהוה פתח אהל מועד׃ ¹² ולקח הכהן את הכבשׂ האחד והקריב אתו לאשׁם ואת לג השׁמן והניף אתם תנופה לפני יהוה׃ ¹³ ושׁחט את הכבשׂ במקום אשׁר ישׁחט את החטאת ואת העלה במקום הקדשׁ כי כחטאת האשׁם הוא לכהן קדשׁ קדשׁים הוא׃ ¹⁴ ולקח הכהן מדם האשׁם ונתן הכהן על תנוך אזן המטהר הימנית ועל בהן ידו הימנית ועל בהן רגלו הימנית׃ ¹⁵ ולקח הכהן מלג השׁמן ויצק על כף הכהן השׂמאלית׃ ¹⁶ וטבל הכהן את אצבעו הימנית מן השׁמן אשׁר על כפו השׂמאלית והזה מן השׁמן באצבעו שׁבע פעמים לפני יהוה׃ ¹⁷ ומיתר השׁמן אשׁר על כפו יתן הכהן על תנוך אזן המטהר הימנית ועל בהן ידו הימנית ועל בהן רגלו הימנית על דם האשׁם׃ ¹⁸ והנותר בשׁמן אשׁר על כף הכהן יתן על ראשׁ המטהר וכפר עליו הכהן לפני יהוה׃ ¹⁹ ועשׂה הכהן את החטאת וכפר על המטהר מטמאתו ואחר ישׁחט את העלה׃ ²⁰ והעלה הכהן את העלה ואת המנחה המזבחה וכפר עליו הכהן וטהר׃ ²¹ ואם דל הוא ואין ידו משׂגת ולקח כבשׂ אחד אשׁם לתנופה לכפר עליו ועשׂרון סלת אחד בלול בשׁמן למנחה ולג שׁמן׃ ²² ושׁתי תרים או שׁני בני יונה אשׁר תשׂיג ידו והיה אחד חטאת והאחד עלה׃ ²³ והביא אתם ביום השׁמיני לטהרתו אל הכהן אל פתח אהל מועד לפני יהוה׃ ²⁴ ולקח הכהן את כבשׂ האשׁם ואת לג השׁמן והניף אתם הכהן תנופה לפני יהוה׃ ²⁵ ושׁחט את כבשׂ האשׁם ולקח הכהן מדם האשׁם ונתן על תנוך אזן המטהר הימנית ועל בהן ידו הימנית ועל בהן רגלו הימנית׃ ²⁶ ומן השׁמן יצק הכהן על כף הכהן השׂמאלית׃ ²⁷ והזה הכהן באצבעו הימנית מן השׁמן אשׁר על כפו השׂמאלית שׁבע פעמים לפני יהוה׃ ²⁸ ונתן הכהן מן השׁמן אשׁר על כפו על תנוך אזן המטהר הימנית ועל בהן ידו הימנית ועל בהן רגלו הימנית על מקום דם האשׁם׃ ²⁹ והנותר מן השׁמן אשׁר על כף הכהן יתן על ראשׁ המטהר לכפר עליו לפני יהוה׃ ³⁰ ועשׂה את האחד מן התרים או מן בני היונה מאשׁר תשׂיג ידו׃ ³¹ את אשׁר תשׂיג ידו את האחד חטאת ואת האחד עלה על המנחה וכפר הכהן על המטהר לפני יהוה׃ ³² זאת תורת אשׁר בו נגע צרעת אשׁר לא תשׂיג ידו בטהרתו׃ ³³ וידבר יהוה אל משׁה ואל אהרן לאמר׃ ³⁴ כי תבאו אל ארץ כנען אשׁר אני נתן לכם לאחזה ונתתי נגע צרעת בבית ארץ אחזתכם׃ ³⁵ ובא אשׁר לו הבית והגיד לכהן לאמר כנגע נראה לי בבית׃ ³⁶ וצוה הכהן ופנו את הבית בטרם יבא הכהן לראות את הנגע ולא יטמא כל אשׁר בבית ואחר כן יבא הכהן לראות את הבית׃ ³⁷ וראה את הנגע והנה הנגע בקירת הבית שׁקערורת ירקרקת או אדמדמת ומראיהן שׁפל מן הקיר׃ ³⁸ ויצא הכהן מן הבית אל פתח הבית והסגיר את הבית שׁבעת ימים׃ ³⁹ ושׁב הכהן ביום השׁביעי וראה והנה פשׂה הנגע בקירת הבית׃ ⁴⁰ וצוה הכהן וחלצו את האבנים אשׁר בהן הנגע והשׁליכו אתהן אל מחוץ לעיר אל מקום טמא׃ ⁴¹ ואת הבית יקצע מבית סביב ושׁפכו את העפר אשׁר הקצו אל מחוץ לעיר אל מקום טמא׃ ⁴² ולקחו אבנים אחרות והביאו אל תחת האבנים ועפר אחר יקח וטח את הבית׃ ⁴³ ואם ישׁוב הנגע ופרח בבית אחר חלץ את האבנים ואחרי הקצות את הבית ואחרי הטוח׃ ⁴⁴ ובא הכהן וראה והנה פשׂה הנגע בבית צרעת ממארת הוא בבית טמא הוא׃ ⁴⁵ ונתץ את הבית את אבניו ואת עציו ואת כל עפר הבית והוציא אל מחוץ לעיר אל מקום טמא׃ ⁴⁶ והבא אל הבית כל ימי הסגיר אתו יטמא עד הערב׃ ⁴⁷ והשׁכב בבית יכבס את בגדיו והאכל בבית יכבס את בגדיו׃ ⁴⁸ ואם בא יבא הכהן וראה והנה לא פשׂה הנגע בבית אחרי הטח את הבית וטהר הכהן את הבית כי נרפא הנגע׃ ⁴⁹ ולקח לחטא את הבית שׁתי צפרים ועץ ארז ושׁני תולעת ואזב׃ ⁵⁰ ושׁחט את הצפר האחת אל כלי חרשׂ על מים חיים׃ ⁵¹ ולקח את עץ הארז ואת האזב ואת שׁני התולעת ואת הצפר החיה וטבל אתם בדם הצפר השׁחוטה ובמים החיים והזה אל הבית שׁבע פעמים׃ ⁵² וחטא את הבית בדם הצפור ובמים החיים ובצפר החיה ובעץ הארז ובאזב ובשׁני התולעת׃ ⁵³ ושׁלח את הצפר החיה אל מחוץ לעיר אל פני השׂדה וכפר על הבית וטהר׃ ⁵⁴ זאת התורה לכל נגע הצרעת ולנתק׃ ⁵⁵ ולצרעת הבגד ולבית׃ ⁵⁶ ולשׂאת ולספחת ולבהרת׃ ⁵⁷ להורת ביום הטמא וביום הטהר זאת תורת הצרעת׃