Judges 18 בימים ההם אין מלך בישׂראל ובימים ההם שׁבט הדני מבקשׁ לו נחלה לשׁבת כי לא נפלה לו עד היום ההוא בתוך שׁבטי ישׂראל בנחלה׃

HOT⁽ⁱ⁾ ¹ בימים ההם אין מלך בישׂראל ובימים ההם שׁבט הדני מבקשׁ לו נחלה לשׁבת כי לא נפלה לו עד היום ההוא בתוך שׁבטי ישׂראל בנחלה׃ ² וישׁלחו בני דן ממשׁפחתם חמשׁה אנשׁים מקצותם אנשׁים בני חיל מצרעה ומאשׁתאל לרגל את הארץ ולחקרה ויאמרו אלהם לכו חקרו את הארץ ויבאו הר אפרים עד בית מיכה וילינו שׁם׃ ³ המה עם בית מיכה והמה הכירו את קול הנער הלוי ויסורו שׁם ויאמרו לו מי הביאך הלם ומה אתה עשׂה בזה ומה לך פה׃ ⁴ ויאמר אלהם כזה וכזה עשׂה לי מיכה וישׂכרני ואהי לו לכהן׃ ⁵ ויאמרו לו שׁאל נא באלהים ונדעה התצליח דרכנו אשׁר אנחנו הלכים עליה׃ ⁶ ויאמר להם הכהן לכו לשׁלום נכח יהוה דרככם אשׁר תלכו׃ ⁷ וילכו חמשׁת האנשׁים ויבאו לישׁה ויראו את העם אשׁר בקרבה יושׁבת לבטח כמשׁפט צדנים שׁקט ובטח ואין מכלים דבר בארץ יורשׁ עצר ורחקים המה מצדנים ודבר אין להם עם אדם׃ ⁸ ויבאו אל אחיהם צרעה ואשׁתאל ויאמרו להם אחיהם מה אתם׃ ⁹ ויאמרו קומה ונעלה עליהם כי ראינו את הארץ והנה טובה מאד ואתם מחשׁים אל תעצלו ללכת לבא לרשׁת את הארץ׃ ¹⁰ כבאכם תבאו אל עם בטח והארץ רחבת ידים כי נתנה אלהים בידכם מקום אשׁר אין שׁם מחסור כל דבר אשׁר בארץ׃ ¹¹ ויסעו משׁם ממשׁפחת הדני מצרעה ומאשׁתאל שׁשׁ מאות אישׁ חגור כלי מלחמה׃ ¹² ויעלו ויחנו בקרית יערים ביהודה על כן קראו למקום ההוא מחנה דן עד היום הזה הנה אחרי קרית יערים׃ ¹³ ויעברו משׁם הר אפרים ויבאו עד בית מיכה׃ ¹⁴ ויענו חמשׁת האנשׁים ההלכים לרגל את הארץ לישׁ ויאמרו אל אחיהם הידעתם כי ישׁ בבתים האלה אפוד ותרפים ופסל ומסכה ועתה דעו מה תעשׂו׃ ¹⁵ ויסורו שׁמה ויבאו אל בית הנער הלוי בית מיכה וישׁאלו לו לשׁלום׃ ¹⁶ ושׁשׁ מאות אישׁ חגורים כלי מלחמתם נצבים פתח השׁער אשׁר מבני דן׃ ¹⁷ ויעלו חמשׁת האנשׁים ההלכים לרגל את הארץ באו שׁמה לקחו את הפסל ואת האפוד ואת התרפים ואת המסכה והכהן נצב פתח השׁער ושׁשׁ מאות האישׁ החגור כלי המלחמה׃ ¹⁸ ואלה באו בית מיכה ויקחו את פסל האפוד ואת התרפים ואת המסכה ויאמר אליהם הכהן מה אתם עשׂים׃ ¹⁹ ויאמרו לו החרשׁ שׂים ידך על פיך ולך עמנו והיה לנו לאב ולכהן הטוב היותך כהן לבית אישׁ אחד או היותך כהן לשׁבט ולמשׁפחה בישׂראל׃ ²⁰ וייטב לב הכהן ויקח את האפוד ואת התרפים ואת הפסל ויבא בקרב העם׃ ²¹ ויפנו וילכו וישׂימו את הטף ואת המקנה ואת הכבודה לפניהם׃ ²² המה הרחיקו מבית מיכה והאנשׁים אשׁר בבתים אשׁר עם בית מיכה נזעקו וידביקו את בני דן׃ ²³ ויקראו אל בני דן ויסבו פניהם ויאמרו למיכה מה לך כי נזעקת׃ ²⁴ ויאמר את אלהי אשׁר עשׂיתי לקחתם ואת הכהן ותלכו ומה לי עוד ומה זה תאמרו אלי מה׃ ²⁵ ויאמרו אליו בני דן אל תשׁמע קולך עמנו פן יפגעו בכם אנשׁים מרי נפשׁ ואספתה נפשׁך ונפשׁ ביתך׃ ²⁶ וילכו בני דן לדרכם וירא מיכה כי חזקים המה ממנו ויפן וישׁב אל ביתו׃ ²⁷ והמה לקחו את אשׁר עשׂה מיכה ואת הכהן אשׁר היה לו ויבאו על לישׁ על עם שׁקט ובטח ויכו אותם לפי חרב ואת העיר שׂרפו באשׁ׃ ²⁸ ואין מציל כי רחוקה היא מצידון ודבר אין להם עם אדם והיא בעמק אשׁר לבית רחוב ויבנו את העיר וישׁבו׃ ²⁹ ויקראו שׁם העיר דן בשׁם דן אביהם אשׁר יולד לישׂראל ואולם לישׁ שׁם העיר לראשׁנה׃ ³⁰ ויקימו להם בני דן את הפסל ויהונתן בן גרשׁם בן מנשׁה הוא ובניו היו כהנים לשׁבט הדני עד יום גלות הארץ׃ ³¹ וישׂימו להם את פסל מיכה אשׁר עשׂה כל ימי היות בית האלהים בשׁלה׃