HOT(i)
6 ובני ישׂראל ויהודה היושׁבים בערי יהודה גם הם מעשׂר בקר וצאן ומעשׂר קדשׁים המקדשׁים ליהוה אלהיהם הביאו ויתנו ערמות ערמות׃ 7 בחדשׁ השׁלשׁי החלו הערמות ליסוד ובחדשׁ השׁביעי כלו׃ 8 ויבאו יחזקיהו והשׂרים ויראו את הערמות ויברכו את יהוה ואת עמו ישׂראל׃ 9 וידרשׁ יחזקיהו על הכהנים והלוים על הערמות׃ 10 ויאמר אליו עזריהו הכהן הראשׁ לבית צדוק ויאמר מהחל התרומה לביא בית יהוה אכול ושׂבוע והותר עד לרוב כי יהוה ברך את עמו והנותר את ההמון הזה׃