Psalms 78:12-72

Vulgate^{(i) 12} et duxit eos in nube per diem et tota nocte in lumine ignis ¹³ scidit petram in deserto et potum dedit quasi de abyssis magnis ¹⁴ et eduxit rivos de petra et elicuit quasi flumina aquas ¹⁵ et addiderunt ultra peccare ei ut provocarent Excelsum in invio ¹⁶ et temptaverunt Deum in cordibus suis petentes cibum animae suae ¹⁷ et loquentes contra Deum dicebant numquid poterit Deus ponere mensam in solitudine ¹⁸ ecce percussit petram et fluxerunt aquae et torrentes inundaverunt numquid et panem poterit dare aut praeparare carnem populo suo ¹⁹ ideo audivit Dominus et non distulit et ignis accensus est in Iacob et furor ascendit in Israhel ²⁰ quia non crediderunt Deo nec habuerunt fiduciam in salutari eius ²¹ et praecepit nubibus desuper et portas caeli aperuit ²² et pluit super eos man ut comederent et triticum caeli dedit eis ²³ panem fortium comedit vir cibaria misit eis in saturitatem ²⁴ abstulit eurum de caelo et induxit in fortitudine sua africum ²⁵ et pluit super eos quasi pulverem carnes et quasi harenam maris volatilia pinnata ²⁶ et ceciderunt in medio castrorum eius in circuitu tabernaculorum eius ²⁷ et comederunt et saturati sunt nimis et desiderium eorum adtulit eis ²⁸ non indiguerunt de cupiditate sua cum adhuc cibus esset in ore eorum ²⁹ furor ergo Dei ascendit super eos et occidit pingues eorum et electos Israhel incurvavit ³⁰ in omnibus his peccaverunt ultra et non crediderunt mirabilibus eius ³¹ et consumpsit in vanitate dies eorum et annos eorum velociter ³² si occidebat eos tunc requirebant eum et convertebantur et diluculo consurgebant ad Deum ³³ et recordabantur quia Deus fortitudo eorum et Deus excelsus redemptor eorum ³⁴ et lactaverunt eum in ore suo et lingua sua mentiti sunt ei ³⁵ cor autem eorum non erat firmum cum eo nec permanserunt in pacto eius ³⁶ ipse vero misericors propitiabitur iniquitati et non disperdet multumque avertit iram suam et non suscitavit totum furorem suum ³⁷ sed recordatus est quia caro essent spiritus vadens et non revertens ³⁸ quotiens provocaverunt eum in deserto adflixerunt eum in solitudine ³⁹ et conversi sunt et temptaverunt Deum et Sanctum Israhel concitaverunt ⁴⁰ non sunt recordati manus eius diei qua redemit eos a tribulante ⁴¹ qui fecit in Aegypto signa sua et ostenta sua in regione Taneos ⁴² qui convertit in sanguine fluvios eorum et rivos eorum ut non biberent ⁴³ qui inmisit eis genus omne muscarum ut comederent eos et ranas ut disperderent eos ⁴⁴ qui dedit brucho germen eorum et laborem eorum lucustae ⁴⁵ qui occidit in grandine vineas eorum et sycomoros eorum in frigore ⁴⁶ qui tradidit grandini pascua eorum et iumenta eorum volucribus ⁴⁷ qui misit in eos iram furoris sui indignationem et comminationem et angustiam inmissionem angelorum malorum ⁴⁸ munivit semitam furori suo non pepercit morti animae eorum et animantia eorum pesti tradidit ⁴⁹ et percussit omne primogenitum in Aegypto principium partus in tabernaculis Cham ⁵⁰ et tulit veluti oves populum suum et minavit eos sicut gregem in deserto ⁵¹ et duxit eos cum fiducia et absque timore inimicos autem eorum operuit mare ⁵² et adduxit eos ad terminum sanctificatum suum montem istum quem possedit dextera eius et eiecit a facie eorum gentes et possidere eos fecit in funiculo hereditatem ⁵³ et conlocavit in tabernaculis eorum tribus Israhel ⁵⁴ et temptaverunt et provocaverunt Deum excelsum et testimonia eius non custodierunt ⁵⁵ et aversi sunt et praevaricati sunt ut patres eorum incurvati sunt quasi arcus inutilis ⁵⁶ et provocaverunt eum in excelsis suis et in sculptilibus suis ad aemulandum concitaverunt ⁵⁷ audivit Deus et non distulit et proiecit vehementer Israhel ⁵⁸ et reliquit tabernaculum Selo tentorium quod conlocavit inter homines ⁵⁹ tradidit in captivitatem gloriam suam et decorem suum in manu hostis ⁶⁰ et conclusit in gladio populum suum et in hereditate sua non distulit ⁶¹ iuvenes eius devoravit ignis et virgines eius nemo luxit ⁶² sacerdotes eius gladio ceciderunt et viduae eius non sunt fletae ⁶³ et evigilavit quasi dormiens Dominus quasi fortis post crapulam vini ⁶⁴ et percussit hostes suos retrorsum obprobrium sempiternum dedit eos ⁶⁵ et proiecit tabernaculum Ioseph et tribum Efraim non elegit ⁶⁶ sed elegit tribum Iuda montem Sion quem dilexit ⁶⁷ et aedificavit in similitudinem monoceroton sanctuarium suum quasi terram fundavit illud in saeculum ⁶⁸ et elegit David servum suum et tulit eum de gregibus ovium sequentem fetas adduxit eum ⁶⁹ ut pasceret Iacob populum eius et Israhel hereditatem eius ⁷⁰ qui pavit eos in simplicitate cordis sui et in prudentia manuum suarum dux eorum fuit ⁷¹ canticum Asaph Deus venerunt gentes in hereditatem tuam polluerunt templum sanctum tuum posuerunt Hierusalem in acervis lapidum ⁷² dederunt cadavera servorum tuorum escam volatilibus caeli carnes sanctorum tuorum bestiis terrae