Luke 5:27-38 Mi geffeɣ Sidna Ɛisa, iwala yiwen umekkas isem-is Lewwi yeqqim di texxamt anda țxelliṣen tabzert ( leɣṛama), iqeṛṛeb ɣuṛ-es yenna-yas : Ddu yid-i.

Kabyle⁽ⁱ⁾ ²⁷ Mi geffeɣ Sidna Ɛisa, iwala yiwen umekkas isem-is Lewwi yeqqim di texxamt anda țxelliṣen tabzert ( leɣṛama), iqeṛṛeb ɣuṛ-es yenna-yas : Ddu yid-i. ²⁸ Lewwi yekker, yeǧǧa kullec yedda yid-es. ²⁹ Lewwi yeɛṛeḍ Sidna Ɛisa ɣer wexxam-is, ihegga-yas imensi. Aṭas n yimekkasen d yemdanen nniḍen i geqqimen yid-sen ad ččen. ³⁰ Ifariziyen d lɛulama n ukabar-nsen iɣaḍ-iten lḥal, nnan i yinelmaden is : Acuɣeṛ i tețțem, tessem akk-d imekkasen imakaren d imednuben ? ³¹ Sidna Ɛisa yerra-yasen : Mačči d wid iṣeḥḥan i geḥwaǧen ṭṭbib, i t-iḥwaǧen d imuḍan. ³² Ur d-usiɣ ara ad ssiwleɣ i iḥeqqiyen, usiɣ-ed ɣer yimednuben iwakken a d-uɣalen ɣer webrid. ³³ Nnan-as daɣen : Inelmaden n Yeḥya d wid n ifariziyen țțuẓummen acḥal d abrid yerna țẓallan, ma d inelmaden-ik tețțen tessen. ³⁴ Sidna Ɛisa yenna yasen : Eɛni tzemrem a sen-tinim i yinebgawen n yesli ad uẓummen ass n tmeɣṛa ? Ur tezmirem ara! ³⁵ Ad asen wussan i deg ara sen-ițwakkes yesli, ass-nni ad uẓummen. ³⁶ Yerna-yasen-d lemtel-agi : Yiwen ur d-itekkes tafaweț si llebsa tajdiṭ iwakken a ț-ixiḍ ɣef llebsa taqdimt, neɣ m'ulac llebsa-nni tajdiṭ aț-țcerreg; tafaweț-nni tajdiṭ ur d-țezgay ara ɣef llebsa-nni taqdimt. ³⁷ Daɣen yiwen ur ismaray ccṛab ajdid ɣer yiyeddiden iqdimen, neɣ m'ulac ccṛab-nni ajdid ad icerreg iyeddiden nni; ur d-ițɣimi ccṛab ur d-țɣimin iyeddiden. ³⁸ Ihi ccṛab ajdid, ilaq a t-nesmir ɣer iyeddiden ijdiden.