HOT(i)
1 הנך יפה רעיתי הנך יפה עיניך יונים מבעד לצמתך שׂערך כעדר העזים שׁגלשׁו מהר גלעד׃ 2 שׁניך כעדר הקצובות שׁעלו מן הרחצה שׁכלם מתאימות ושׁכלה אין׃ 3 כחוט השׁני שׂפתתיך ומדבריך נאוה כפלח הרמון רקתך מבעד לצמתך׃ 4 כמגדל דויד צוארך בנוי לתלפיות אלף המגן תלוי עליו כל שׁלטי הגבורים׃ 5 שׁני שׁדיך כשׁני עפרים תאומי צביה הרועים בשׁושׁנים׃ 6 עד שׁיפוח היום ונסו הצללים אלך לי אל הר המור ואל גבעת הלבונה׃ 7 כלך יפה רעיתי ומום אין׃