HOT(i)
1 משׂכיל לאסף האזינה עמי תורתי הטו אזנכם לאמרי פי׃ 2 אפתחה במשׁל פי אביעה חידות מני קדם׃ 3 אשׁר שׁמענו ונדעם ואבותינו ספרו׃ 4 לא נכחד מבניהם לדור אחרון מספרים תהלות יהוה ועזוזו ונפלאותיו אשׁר עשׂה׃ 5 ויקם עדות ביעקב ותורה שׂם בישׂראל אשׁר צוה את אבותינו להודיעם לבניהם׃ 6 למען ידעו דור אחרון בנים יולדו יקמו ויספרו לבניהם׃ 7 וישׂימו באלהים כסלם ולא ישׁכחו מעללי אל ומצותיו ינצרו׃