Leviticus 13:1-46 וידבר יהוה אל משׁה ואל אהרן לאמר׃

HOT⁽ⁱ⁾ ¹ וידבר יהוה אל משׁה ואל אהרן לאמר׃ ² אדם כי יהיה בעור בשׂרו שׂאת או ספחת או בהרת והיה בעור בשׂרו לנגע צרעת והובא אל אהרן הכהן או אל אחד מבניו הכהנים׃ ³ וראה הכהן את הנגע בעור הבשׂר ושׂער בנגע הפך לבן ומראה הנגע עמק מעור בשׂרו נגע צרעת הוא וראהו הכהן וטמא אתו׃ ⁴ ואם בהרת לבנה הוא בעור בשׂרו ועמק אין מראה מן העור ושׂערה לא הפך לבן והסגיר הכהן את הנגע שׁבעת ימים׃ ⁵ וראהו הכהן ביום השׁביעי והנה הנגע עמד בעיניו לא פשׂה הנגע בעור והסגירו הכהן שׁבעת ימים שׁנית׃ ⁶ וראה הכהן אתו ביום השׁביעי שׁנית והנה כהה הנגע ולא פשׂה הנגע בעור וטהרו הכהן מספחת הוא וכבס בגדיו וטהר׃ ⁷ ואם פשׂה תפשׂה המספחת בעור אחרי הראתו אל הכהן לטהרתו ונראה שׁנית אל הכהן׃ ⁸ וראה הכהן והנה פשׂתה המספחת בעור וטמאו הכהן צרעת הוא׃ ⁹ נגע צרעת כי תהיה באדם והובא אל הכהן׃ ¹⁰ וראה הכהן והנה שׂאת לבנה בעור והיא הפכה שׂער לבן ומחית בשׂר חי בשׂאת׃ ¹¹ צרעת נושׁנת הוא בעור בשׂרו וטמאו הכהן לא יסגרנו כי טמא הוא׃ ¹² ואם פרוח תפרח הצרעת בעור וכסתה הצרעת את כל עור הנגע מראשׁו ועד רגליו לכל מראה עיני הכהן׃ ¹³ וראה הכהן והנה כסתה הצרעת את כל בשׂרו וטהר את הנגע כלו הפך לבן טהור הוא׃ ¹⁴ וביום הראות בו בשׂר חי יטמא׃ ¹⁵ וראה הכהן את הבשׂר החי וטמאו הבשׂר החי טמא הוא צרעת הוא׃ ¹⁶ או כי ישׁוב הבשׂר החי ונהפך ללבן ובא אל הכהן׃ ¹⁷ וראהו הכהן והנה נהפך הנגע ללבן וטהר הכהן את הנגע טהור הוא׃ ¹⁸ ובשׂר כי יהיה בו בערו שׁחין ונרפא׃ ¹⁹ והיה במקום השׁחין שׂאת לבנה או בהרת לבנה אדמדמת ונראה אל הכהן׃ ²⁰ וראה הכהן והנה מראה שׁפל מן העור ושׂערה הפך לבן וטמאו הכהן נגע צרעת הוא בשׁחין פרחה׃ ²¹ ואם יראנה הכהן והנה אין בה שׂער לבן ושׁפלה איננה מן העור והיא כהה והסגירו הכהן שׁבעת ימים׃ ²² ואם פשׂה תפשׂה בעור וטמא הכהן אתו נגע הוא׃ ²³ ואם תחתיה תעמד הבהרת לא פשׂתה צרבת השׁחין הוא וטהרו הכהן׃ ²⁴ או בשׂר כי יהיה בערו מכות אשׁ והיתה מחית המכוה בהרת לבנה אדמדמת או לבנה׃ ²⁵ וראה אתה הכהן והנה נהפך שׂער לבן בבהרת ומראה עמק מן העור צרעת הוא במכוה פרחה וטמא אתו הכהן נגע צרעת הוא׃ ²⁶ ואם יראנה הכהן והנה אין בבהרת שׂער לבן ושׁפלה איננה מן העור והוא כהה והסגירו הכהן שׁבעת ימים׃ ²⁷ וראהו הכהן ביום השׁביעי אם פשׂה תפשׂה בעור וטמא הכהן אתו נגע צרעת הוא׃ ²⁸ ואם תחתיה תעמד הבהרת לא פשׂתה בעור והוא כהה שׂאת המכוה הוא וטהרו הכהן כי צרבת המכוה הוא׃ ²⁹ ואישׁ או אשׁה כי יהיה בו נגע בראשׁ או בזקן׃ ³⁰ וראה הכהן את הנגע והנה מראהו עמק מן העור ובו שׂער צהב דק וטמא אתו הכהן נתק הוא צרעת הראשׁ או הזקן הוא׃ ³¹ וכי יראה הכהן את נגע הנתק והנה אין מראהו עמק מן העור ושׂער שׁחר אין בו והסגיר הכהן את נגע הנתק שׁבעת ימים׃ ³² וראה הכהן את הנגע ביום השׁביעי והנה לא פשׂה הנתק ולא היה בו שׂער צהב ומראה הנתק אין עמק מן העור׃ ³³ והתגלח ואת הנתק לא יגלח והסגיר הכהן את הנתק שׁבעת ימים שׁנית׃ ³⁴ וראה הכהן את הנתק ביום השׁביעי והנה לא פשׂה הנתק בעור ומראהו איננו עמק מן העור וטהר אתו הכהן וכבס בגדיו וטהר׃ ³⁵ ואם פשׂה יפשׂה הנתק בעור אחרי טהרתו׃ ³⁶ וראהו הכהן והנה פשׂה הנתק בעור לא יבקר הכהן לשׂער הצהב טמא הוא׃ ³⁷ ואם בעיניו עמד הנתק ושׂער שׁחר צמח בו נרפא הנתק טהור הוא וטהרו הכהן׃ ³⁸ ואישׁ או אשׁה כי יהיה בעור בשׂרם בהרת בהרת לבנת׃ ³⁹ וראה הכהן והנה בעור בשׂרם בהרת כהות לבנת בהק הוא פרח בעור טהור הוא׃ ⁴⁰ ואישׁ כי ימרט ראשׁו קרח הוא טהור הוא׃ ⁴¹ ואם מפאת פניו ימרט ראשׁו גבח הוא טהור הוא׃ ⁴² וכי יהיה בקרחת או בגבחת נגע לבן אדמדם צרעת פרחת הוא בקרחתו או בגבחתו׃ ⁴³ וראה אתו הכהן והנה שׂאת הנגע לבנה אדמדמת בקרחתו או בגבחתו כמראה צרעת עור בשׂר׃ ⁴⁴ אישׁ צרוע הוא טמא הוא טמא יטמאנו הכהן בראשׁו נגעו׃ ⁴⁵ והצרוע אשׁר בו הנגע בגדיו יהיו פרמים וראשׁו יהיה פרוע ועל שׂפם יעטה וטמא טמא יקרא׃ ⁴⁶ כל ימי אשׁר הנגע בו יטמא טמא הוא בדד ישׁב מחוץ למחנה מושׁבו׃