Job 19

HOT^{(i) 1} ויען איוב ויאמר׃ ² עד אנה תוגיון נפשׁי ותדכאונני במלים׃ ³ זה עשׂר פעמים תכלימוני לא תבשׁו תהכרו׃ ⁴ ואף אמנם שׁגיתי אתי תלין משׁוגתי׃ ⁵ אם אמנם עלי תגדילו ותוכיחו עלי חרפתי׃ ⁶ דעו אפו כי אלוה עותני ומצודו עלי הקיף׃ ⁷ הן אצעק חמס ולא אענה אשׁוע ואין משׁפט׃ ⁸ ארחי גדר ולא אעבור ועל נתיבותי חשׁך ישׂים׃ ⁹ כבודי מעלי הפשׁיט ויסר עטרת ראשׁי׃ ¹⁰ יתצני סביב ואלך ויסע כעץ תקותי׃ ¹¹ ויחר עלי אפו ויחשׁבני לו כצריו׃ ¹² יחד יבאו גדודיו ויסלו עלי דרכם ויחנו סביב לאהלי׃ ¹³ אחי מעלי הרחיק וידעי אך זרו ממני׃ ¹⁴ חדלו קרובי ומידעי שׁכחוני׃ ¹⁵ גרי ביתי ואמהתי לזר תחשׁבני נכרי הייתי בעיניהם׃ ¹⁶ לעבדי קראתי ולא יענה במו פי אתחנן׃ ¹⁷ רוחי זרה לאשׁתי וחנתי לבני בטני׃ ¹⁸ גם עוילים מאסו בי אקומה וידברו׃ ¹⁹ תעבוני כל מתי סודי וזה אהבתי נהפכו׃ ²⁰ בעורי ובבשׂרי דבקה עצמי ואתמלטה בעור שׁני׃ ²¹ חנני חנני אתם רעי כי יד אלוה נגעה׃ ²² למה תרדפני כמו אל ומבשׂרי לא תשׂבעו׃ ²³ מי יתן אפו ויכתבון מלי מי יתן בספר ויחקו׃ ²⁴ בעט ברזל ועפרת לעד בצור יחצבון׃ ²⁵ ואני ידעתי גאלי חי ואחרון על עפר יקום׃ ²⁶ ואחר עורי נקפו זאת ומבשׂרי אחזה אלוה׃ ²⁷ אשׁר אני אחזה לי ועיני ראו ולא זר כלו כליתי בחקי׃ ²⁸ כי תאמרו מה נרדף לו ושׁרשׁ דבר נמצא׃ ²⁹ גורו לכם מפני חרב כי חמה עונות חרב למען תדעון שׁדין׃