Isaiah 23:1-18

HOT^{(i) 1} משׂא צר הילילו אניות תרשׁישׁ כי שׁדד מבית מבוא מארץ כתים נגלה׃ ² דמו ישׁבי אי סחר צידון עבר ים מלאוך׃ ³ ובמים רבים זרע שׁחר קציר יאור תבואתה ותהי סחר גוים׃ ⁴ בושׁי צידון כי אמר ים מעוז הים לאמר לא חלתי ולא ילדתי ולא גדלתי בחורים רוממתי בתולות׃ ⁵ כאשׁר שׁמע למצרים יחילו כשׁמע צר׃ ⁶ עברו תרשׁישׁה הילילו ישׁבי אי׃ ⁷ הזאת לכם עליזה מימי קדם קדמתה יבלוה רגליה מרחוק לגור׃ ⁸ מי יעץ זאת על צר המעטירה אשׁר סחריה שׂרים כנעניה נכבדי ארץ׃ ⁹ יהוה צבאות יעצה לחלל גאון כל צבי להקל כל נכבדי ארץ׃ ¹⁰ עברי ארצך כיאר בת תרשׁישׁ אין מזח עוד׃ ¹¹ ידו נטה על הים הרגיז ממלכות יהוה צוה אל כנען לשׁמד מעזניה׃ ¹² ויאמר לא תוסיפי עוד לעלוז המעשׁקה בתולת בת צידון כתיים קומי עברי גם שׁם לא ינוח׃ ¹³ הן ארץ כשׂדים זה העם לא היה אשׁור יסדה לציים הקימו בחיניו עררו ארמנותיה שׂמה למפלה׃ ¹⁴ הילילו אניות תרשׁישׁ כי שׁדד מעזכן׃ ¹⁵ והיה ביום ההוא ונשׁכחת צר שׁבעים שׁנה כימי מלך אחד מקץ שׁבעים שׁנה יהיה לצר כשׁירת הזונה׃ ¹⁶ קחי כנור סבי עיר זונה נשׁכחה היטיבי נגן הרבי שׁיר למען תזכרי׃ ¹⁷ והיה מקץ שׁבעים שׁנה יפקד יהוה את צר ושׁבה לאתננה וזנתה את כל ממלכות הארץ על פני האדמה׃ ¹⁸ והיה סחרה ואתננה קדשׁ ליהוה לא יאצר ולא יחסן כי לישׁבים לפני יהוה יהיה סחרה לאכל לשׂבעה ולמכסה עתיק׃