Isaiah 23:1 Cross References - HOT

¹ משׂא צר הילילו אניות תרשׁישׁ כי שׁדד מבית מבוא מארץ כתים נגלה׃

Numbers 24:24

²⁴ וצים מיד כתים וענו אשׁור וענו עבר וגם הוא עדי אבד׃

Joshua 19:29

²⁹ ושׁב הגבול הרמה ועד עיר מבצר צר ושׁב הגבול חסה ויהיו תצאתיו הימה מחבל אכזיבה׃

1 Kings 5:1

¹ (5:15) וישׁלח חירם מלך צור את עבדיו אל שׁלמה כי שׁמע כי אתו משׁחו למלך תחת אביהו כי אהב היה חירם לדוד כל הימים׃

1 Kings 10:22

²² כי אני תרשׁישׁ למלך בים עם אני חירם אחת לשׁלשׁ שׁנים תבוא אני תרשׁישׁ נשׂאת זהב וכסף שׁנהבים וקפים ותכיים׃

1 Kings 22:48

⁴⁸ (22:49) יהושׁפט עשׂר אניות תרשׁישׁ ללכת אופירה לזהב ולא הלך כי נשׁברה אניות בעציון גבר׃

2 Chronicles 9:21

²¹ כי אניות למלך הלכות תרשׁישׁ עם עבדי חורם אחת לשׁלושׁ שׁנים תבואנה אניות תרשׁישׁ נשׂאות זהב וכסף שׁנהבים וקופים ותוכיים׃

Isaiah 2:16

¹⁶ ועל כל אניות תרשׁישׁ ועל כל שׂכיות החמדה׃

Isaiah 15:1-2

¹ משׂא מואב כי בליל שׁדד ער מואב נדמה כי בליל שׁדד קיר מואב נדמה׃² עלה הבית ודיבן הבמות לבכי על נבו ועל מידבא מואב ייליל בכל ראשׁיו קרחה כל זקן גרועה׃

Isaiah 15:8

⁸ כי הקיפה הזעקה את גבול מואב עד אגלים יללתה ובאר אילים יללתה׃

Isaiah 23:12

¹² ויאמר לא תוסיפי עוד לעלוז המעשׁקה בתולת בת צידון כתיים קומי עברי גם שׁם לא ינוח׃

Isaiah 60:9

⁹ כי לי איים יקוו ואניות תרשׁישׁ בראשׁנה להביא בניך מרחוק כספם וזהבם אתם לשׁם יהוה אלהיך ולקדושׁ ישׂראל כי פארך׃

Jeremiah 2:10

¹⁰ כי עברו איי כתיים וראו וקדר שׁלחו והתבוננו מאד וראו הן היתה כזאת׃

Jeremiah 25:10-11

¹⁰ והאבדתי מהם קול שׂשׂון וקול שׂמחה קול חתן וקול כלה קול רחים ואור נר׃¹¹ והיתה כל הארץ הזאת לחרבה לשׁמה ועבדו הגוים האלה את מלך בבל שׁבעים שׁנה׃

Jeremiah 25:15

¹⁵ כי כה אמר יהוה אלהי ישׂראל אלי קח את כוס היין החמה הזאת מידי והשׁקיתה אתו את כל הגוים אשׁר אנכי שׁלח אותך אליהם׃

Jeremiah 25:22

²² ואת כל מלכי צר ואת כל מלכי צידון ואת מלכי האי אשׁר בעבר הים׃

Jeremiah 47:4

⁴ על היום הבא לשׁדוד את כל פלשׁתים להכרית לצר ולצידון כל שׂריד עזר כי שׁדד יהוה את פלשׁתים שׁארית אי כפתור׃

¹ ויהי בעשׁתי עשׂרה שׁנה באחד לחדשׁ היה דבר יהוה אלי לאמר׃² בן אדם יען אשׁר אמרה צר על ירושׁלם האח נשׁברה דלתות העמים נסבה אלי אמלאה החרבה׃³ לכן כה אמר אדני יהוה הנני עליך צר והעליתי עליך גוים רבים כהעלות הים לגליו׃⁴ ושׁחתו חמות צר והרסו מגדליה וסחיתי עפרה ממנה ונתתי אותה לצחיח סלע׃⁵ משׁטח חרמים תהיה בתוך הים כי אני דברתי נאם אדני יהוה והיתה לבז לגוים׃⁶ ובנותיה אשׁר בשׂדה בחרב תהרגנה וידעו כי אני יהוה׃⁷ כי כה אמר אדני יהוה הנני מביא אל צר נבוכדראצר מלך בבל מצפון מלך מלכים בסוס וברכב ובפרשׁים וקהל ועם רב׃⁸ בנותיך בשׂדה בחרב יהרג ונתן עליך דיק ושׁפך עליך סללה והקים עליך צנה׃⁹ ומחי קבלו יתן בחמותיך ומגדלתיך יתץ בחרבותיו׃¹⁰ משׁפעת סוסיו יכסך אבקם מקול פרשׁ וגלגל ורכב תרעשׁנה חומותיך בבאו בשׁעריך כמבואי עיר מבקעה׃¹¹ בפרסות סוסיו ירמס את כל חוצותיך עמך בחרב יהרג ומצבות עזך לארץ תרד׃¹² ושׁללו חילך ובזזו רכלתך והרסו חומותיך ובתי חמדתך יתצו ואבניך ועציך ועפרך בתוך מים ישׂימו׃¹³ והשׁבתי המון שׁיריך וקול כנוריך לא ישׁמע עוד׃¹⁴ ונתתיך לצחיח סלע משׁטח חרמים תהיה לא תבנה עוד כי אני יהוה דברתי נאם אדני יהוה׃¹⁵ כה אמר אדני יהוה לצור הלא מקול מפלתך באנק חלל בהרג הרג בתוכך ירעשׁו האיים׃¹⁶ וירדו מעל כסאותם כל נשׂיאי הים והסירו את מעיליהם ואת בגדי רקמתם יפשׁטו חרדות ילבשׁו על הארץ ישׁבו וחרדו לרגעים ושׁממו עליך׃¹⁷ ונשׂאו עליך קינה ואמרו לך איך אבדת נושׁבת מימים העיר ההללה אשׁר היתה חזקה בים היא וישׁביה אשׁר נתנו חתיתם לכל יושׁביה׃¹⁸ עתה יחרדו האין יום מפלתך ונבהלו האיים אשׁר בים מצאתך׃¹⁹ כי כה אמר אדני יהוה בתתי אתך עיר נחרבת כערים אשׁר לא נושׁבו בהעלות עליך את תהום וכסוך המים הרבים׃²⁰ והורדתיך את יורדי בור אל עם עולם והושׁבתיך בארץ תחתיות כחרבות מעולם את יורדי בור למען לא תשׁבי ונתתי צבי בארץ חיים׃²¹ בלהות אתנך ואינך ותבקשׁי ולא תמצאי עוד לעולם נאם אדני יהוה׃

Ezekiel 27:1-28:24

¹ ויהי דבר יהוה אלי לאמר׃² ואתה בן אדם שׂא על צר קינה׃³ ואמרת לצור הישׁבתי על מבואת ים רכלת העמים אל איים רבים כה אמר אדני יהוה צור את אמרת אני כלילת יפי׃⁴ בלב ימים גבוליך בניך כללו יפיך׃⁵ ברושׁים משׂניר בנו לך את כל לחתים ארז מלבנון לקחו לעשׂות תרן עליך׃⁶ אלונים מבשׁן עשׂו משׁוטיך קרשׁך עשׂו שׁן בת אשׁרים מאיי כתים׃⁷ שׁשׁ ברקמה ממצרים היה מפרשׂך להיות לך לנס תכלת וארגמן מאיי אלישׁה היה מכסך׃⁸ ישׁבי צידון וארוד היו שׁטים לך חכמיך צור היו בך המה חבליך׃⁹ זקני גבל וחכמיה היו בך מחזיקי בדקך כל אניות הים ומלחיהם היו בך לערב מערבך׃¹⁰ פרס ולוד ופוט היו בחילך אנשׁי מלחמתך מגן וכובע תלו בך המה נתנו הדרך׃¹¹ בני ארוד וחילך על חומותיך סביב וגמדים במגדלותיך היו שׁלטיהם תלו על חומותיך סביב המה כללו יפיך׃¹² תרשׁישׁ סחרתך מרב כל הון בכסף ברזל בדיל ועופרת נתנו עזבוניך׃¹³ יון תבל ומשׁך המה רכליך בנפשׁ אדם וכלי נחשׁת נתנו מערבך׃¹⁴ מבית תוגרמה סוסים ופרשׁים ופרדים נתנו עזבוניך׃¹⁵ בני דדן רכליך איים רבים סחרת ידך קרנות שׁן והובנים השׁיבו אשׁכרך׃¹⁶ ארם סחרתך מרב מעשׂיך בנפך ארגמן ורקמה ובוץ וראמת וכדכד נתנו בעזבוניך׃¹⁷ יהודה וארץ ישׂראל המה רכליך בחטי מנית ופנג ודבשׁ ושׁמן וצרי נתנו מערבך׃¹⁸ דמשׂק סחרתך ברב מעשׂיך מרב כל הון ביין חלבון וצמר צחר׃¹⁹ ודן ויון מאוזל בעזבוניך נתנו ברזל עשׁות קדה וקנה במערבך היה׃²⁰ דדן רכלתך בבגדי חפשׁ לרכבה׃²¹ ערב וכל נשׂיאי קדר המה סחרי ידך בכרים ואילים ועתודים בם סחריך׃²² רכלי שׁבא ורעמה המה רכליך בראשׁ כל בשׂם ובכל אבן יקרה וזהב נתנו עזבוניך׃²³ חרן וכנה ועדן רכלי שׁבא אשׁור כלמד רכלתך׃²⁴ המה רכליך במכללים בגלומי תכלת ורקמה ובגנזי ברמים בחבלים חבשׁים וארזים במרכלתך׃

Ezekiel 28:1-24

¹ ויהי דבר יהוה אלי לאמר׃² בן אדם אמר לנגיד צר כה אמר אדני יהוה יען גבה לבך ותאמר אל אני מושׁב אלהים ישׁבתי בלב ימים ואתה אדם ולא אל ותתן לבך כלב אלהים׃³ הנה חכם אתה מדנאל כל סתום לא עממוך׃⁴ בחכמתך ובתבונתך עשׂית לך חיל ותעשׂ זהב וכסף באוצרותיך׃⁵ ברב חכמתך ברכלתך הרבית חילך ויגבה לבבך בחילך׃⁶ לכן כה אמר אדני יהוה יען תתך את לבבך כלב אלהים׃⁷ לכן הנני מביא עליך זרים עריצי גוים והריקו חרבותם על יפי חכמתך וחללו יפעתך׃⁸ לשׁחת יורדוך ומתה ממותי חלל בלב ימים׃⁹ האמר תאמר אלהים אני לפני הרגך ואתה אדם ולא אל ביד מחלליך׃¹⁰ מותי ערלים תמות ביד זרים כי אני דברתי נאם אדני יהוה׃¹¹ ויהי דבר יהוה אלי לאמר׃¹² בן אדם שׂא קינה על מלך צור ואמרת לו כה אמר אדני יהוה אתה חותם תכנית מלא חכמה וכליל יפי׃¹³ בעדן גן אלהים היית כל אבן יקרה מסכתך אדם פטדה ויהלם תרשׁישׁ שׁהם וישׁפה ספיר נפך וברקת וזהב מלאכת תפיך ונקביך בך ביום הבראך כוננו׃¹⁴ את כרוב ממשׁח הסוכך ונתתיך בהר קדשׁ אלהים היית בתוך אבני אשׁ התהלכת׃¹⁵ תמים אתה בדרכיך מיום הבראך עד נמצא עולתה׃¹⁶ ברב רכלתך מלו תוכך חמס ותחטא ואחללך מהר אלהים ואבדך כרוב הסכך מתוך אבני אשׁ׃¹⁷ גבה לבך ביפיך שׁחת חכמתך על יפעתך על ארץ השׁלכתיך לפני מלכים נתתיך לראוה׃¹⁸ מרב עוניך בעול רכלתך חללת מקדשׁיך ואוצא אשׁ מתוכך היא אכלתך ואתנך לאפר על הארץ לעיני כל ראיך׃¹⁹ כל יודעיך בעמים שׁממו עליך בלהות היית ואינך עד עולם׃²⁰ ויהי דבר יהוה אלי לאמר׃²¹ בן אדם שׂים פניך אל צידון והנבא עליה׃²² ואמרת כה אמר אדני יהוה הנני עליך צידון ונכבדתי בתוכך וידעו כי אני יהוה בעשׂותי בה שׁפטים ונקדשׁתי׃²³ ושׁלחתי בה דבר ודם בחוצותיה ונפלל חלל בתוכה בחרב עליה מסביב וידעו כי אני יהוה׃²⁴ ולא יהיה עוד לבית ישׂראל סלון ממאיר וקוץ מכאב מכל סביבתם השׁאטים אותם וידעו כי אני אדני יהוה׃

Daniel 11:30

³⁰ ובאו בו ציים כתים ונכאה ושׁב וזעם על ברית קודשׁ ועשׂה ושׁב ויבן על עזבי ברית קדשׁ׃

Joel 3:4-8

⁴ (4:4) וגם מה אתם לי צר וצידון וכל גלילות פלשׁת הגמול אתם משׁלמים עלי ואם גמלים אתם עלי קל מהרה אשׁיב גמלכם בראשׁכם׃⁵ (4:5) אשׁר כספי וזהבי לקחתם ומחמדי הטבים הבאתם להיכליכם׃⁶ (4:6) ובני יהודה ובני ירושׁלם מכרתם לבני היונים למען הרחיקם מעל גבולם׃⁷ (4:7) הנני מעירם מן המקום אשׁר מכרתם אתם שׁמה והשׁבתי גמלכם בראשׁכם׃⁸ (4:8) ומכרתי את בניכם ואת בנותיכם ביד בני יהודה ומכרום לשׁבאים אל גוי רחוק כי יהוה דבר׃

Amos 1:9-10

⁹ כה אמר יהוה על שׁלשׁה פשׁעי צר ועל ארבעה לא אשׁיבנו על הסגירם גלות שׁלמה לאדום ולא זכרו ברית אחים׃¹⁰ ושׁלחתי אשׁ בחומת צר ואכלה ארמנתיה׃

Zechariah 9:2-4

² וגם חמת תגבל בה צר וצידון כי חכמה מאד׃³ ותבן צר מצור לה ותצבר כסף כעפר וחרוץ כטיט חוצות׃⁴ הנה אדני יורשׁנה והכה בים חילה והיא באשׁ תאכל׃