Ezra 7

HOT^{(i) 1} ואחר הדברים האלה במלכות ארתחשׁסתא מלך פרס עזרא בן שׂריה בן עזריה בן חלקיה׃ ² בן שׁלום בן צדוק בן אחיטוב׃ ³ בן אמריה בן עזריה בן מריות׃ ⁴ בן זרחיה בן עזי בן בקי׃ ⁵ בן אבישׁוע בן פינחס בן אלעזר בן אהרן הכהן הראשׁ׃ ⁶ הוא עזרא עלה מבבל והוא ספר מהיר בתורת משׁה אשׁר נתן יהוה אלהי ישׂראל ויתן לו המלך כיד יהוה אלהיו עליו כל בקשׁתו׃ ⁷ ויעלו מבני ישׂראל ומן הכהנים והלוים והמשׁררים והשׁערים והנתינים אל ירושׁלם בשׁנת שׁבע לארתחשׁסתא המלך׃ ⁸ ויבא ירושׁלם בחדשׁ החמישׁי היא שׁנת השׁביעית למלך׃ ⁹ כי באחד לחדשׁ הראשׁון הוא יסד המעלה מבבל ובאחד לחדשׁ החמישׁי בא אל ירושׁלם כיד אלהיו הטובה עליו׃ ¹⁰ כי עזרא הכין לבבו לדרושׁ את תורת יהוה ולעשׂת וללמד בישׂראל חק ומשׁפט׃ ¹¹ וזה פרשׁגן הנשׁתון אשׁר נתן המלך ארתחשׁסתא לעזרא הכהן הספר ספר דברי מצות יהוה וחקיו על ישׂראל׃ ¹² ארתחשׁסתא מלך מלכיא לעזרא כהנא ספר דתא די אלה שׁמיא גמיר וכענת׃ ¹³ מני שׂים טעם די כל מתנדב במלכותי מן עמה ישׂראל וכהנוהי ולויא למהך לירושׁלם עמך יהך׃ ¹⁴ כל קבל די מן קדם מלכא ושׁבעת יעטהי שׁליח לבקרא על יהוד ולירושׁלם בדת אלהך די בידך׃ ¹⁵ ולהיבלה כסף ודהב די מלכא ויעטוהי התנדבו לאלה ישׂראל די בירושׁלם משׁכנה׃ ¹⁶ וכל כסף ודהב די תהשׁכח בכל מדינת בבל עם התנדבות עמא וכהניא מתנדבין לבית אלההם די בירושׁלם׃ ¹⁷ כל קבל דנה אספרנא תקנא בכספא דנה תורין דכרין אמרין ומנחתהון ונסכיהון ותקרב המו על מדבחה די בית אלהכם די בירושׁלם׃ ¹⁸ ומה די עליך ועל אחיך ייטב בשׁאר כספא ודהבה למעבד כרעות אלהכם תעבדון׃ ¹⁹ ומאניא די מתיהבין לך לפלחן בית אלהך השׁלם קדם אלה ירושׁלם׃ ²⁰ ושׁאר חשׁחות בית אלהך די יפל לך למנתן תנתן מן בית גנזי מלכא׃ ²¹ ומני אנה ארתחשׁסתא מלכא שׂים טעם לכל גזבריא די בעבר נהרה די כל די ישׁאלנכון עזרא כהנה ספר דתא די אלה שׁמיא אספרנא יתעבד׃ ²² עד כסף ככרין מאה ועד חנטין כרין מאה ועד חמר בתין מאה ועד בתין משׁח מאה ומלח די לא כתב׃ ²³ כל די מן טעם אלה שׁמיא יתעבד אדרזדא לבית אלה שׁמיא די למה להוא קצף על מלכות מלכא ובנוהי׃ ²⁴ ולכם מהודעין די כל כהניא ולויא זמריא תרעיא נתיניא ופלחי בית אלהא דנה מנדה בלו והלך לא שׁליט למרמא עליהם׃ ²⁵ ואנת עזרא כחכמת אלהך די בידך מני שׁפטין ודינין די להון דאנין לכל עמה די בעבר נהרה לכל ידעי דתי אלהך ודי לא ידע תהודעון׃ ²⁶ וכל די לא להוא עבד דתא די אלהך ודתא די מלכא אספרנא דינה להוא מתעבד מנה הן למות הן לשׁרשׁו הן לענשׁ נכסין ולאסורין׃ ²⁷ ברוך יהוה אלהי אבותינו אשׁר נתן כזאת בלב המלך לפאר את בית יהוה אשׁר בירושׁלם׃ ²⁸ ועלי הטה חסד לפני המלך ויועציו ולכל שׂרי המלך הגברים ואני התחזקתי כיד יהוה אלהי עלי ואקבצה מישׂראל ראשׁים לעלות עמי׃