Ezekiel 22

HOT^{(i) 1} ויהי דבר יהוה אלי לאמר׃ ² ואתה בן אדם התשׁפט התשׁפט את עיר הדמים והודעתה את כל תועבותיה׃ ³ ואמרת כה אמר אדני יהוה עיר שׁפכת דם בתוכה לבוא עתה ועשׂתה גלולים עליה לטמאה׃ ⁴ בדמך אשׁר שׁפכת אשׁמת ובגלוליך אשׁר עשׂית טמאת ותקריבי ימיך ותבוא עד שׁנותיך על כן נתתיך חרפה לגוים וקלסה לכל הארצות׃ ⁵ הקרבות והרחקות ממך יתקלסו בך טמאת השׁם רבת המהומה׃ ⁶ הנה נשׂיאי ישׂראל אישׁ לזרעו היו בך למען שׁפך דם׃ ⁷ אב ואם הקלו בך לגר עשׂו בעשׁק בתוכך יתום ואלמנה הונו׃ ⁸ קדשׁי בזית ואת שׁבתתי חללת׃ ⁹ אנשׁי רכיל היו בך למען שׁפך דם ואל ההרים אכלו בך זמה עשׂו בתוכך׃ ¹⁰ ערות אב גלה בך טמאת הנדה ענו׃ ¹¹ ואישׁ את אשׁת רעהו עשׂה תועבה ואישׁ את כלתו טמא בזמה ואישׁ את אחתו בת אביו ענה׃ ¹² שׁחד לקחו בך למען שׁפך דם נשׁך ותרבית לקחת ותבצעי רעיך בעשׁק ואתי שׁכחת נאם אדני יהוה׃ ¹³ והנה הכיתי כפי אל בצעך אשׁר עשׂית ועל דמך אשׁר היו בתוכך׃ ¹⁴ היעמד לבך אם תחזקנה ידיך לימים אשׁר אני עשׂה אותך אני יהוה דברתי ועשׂיתי׃ ¹⁵ והפיצותי אותך בגוים וזריתיך בארצות והתמתי טמאתך ממך׃ ¹⁶ ונחלת בך לעיני גוים וידעת כי אני יהוה׃ ¹⁷ ויהי דבר יהוה אלי לאמר׃ ¹⁸ בן אדם היו לי בית ישׂראל לסוג כלם נחשׁת ובדיל וברזל ועופרת בתוך כור סגים כסף היו׃ ¹⁹ לכן כה אמר אדני יהוה יען היות כלכם לסגים לכן הנני קבץ אתכם אל תוך ירושׁלם׃ ²⁰ קבצת כסף ונחשׁת וברזל ועופרת ובדיל אל תוך כור לפחת עליו אשׁ להנתיך כן אקבץ באפי ובחמתי והנחתי והתכתי אתכם׃ ²¹ וכנסתי אתכם ונפחתי עליכם באשׁ עברתי ונתכתם בתוכה׃ ²² כהתוך כסף בתוך כור כן תתכו בתוכה וידעתם כי אני יהוה שׁפכתי חמתי עליכם׃ ²³ ויהי דבר יהוה אלי לאמר׃ ²⁴ בן אדם אמר לה את ארץ לא מטהרה היא לא גשׁמה ביום זעם׃ ²⁵ קשׁר נביאיה בתוכה כארי שׁואג טרף טרף נפשׁ אכלו חסן ויקר יקחו אלמנותיה הרבו בתוכה׃ ²⁶ כהניה חמסו תורתי ויחללו קדשׁי בין קדשׁ לחל לא הבדילו ובין הטמא לטהור לא הודיעו ומשׁבתותי העלימו עיניהם ואחל בתוכם׃ ²⁷ שׂריה בקרבה כזאבים טרפי טרף לשׁפך דם לאבד נפשׁות למען בצע בצע׃ ²⁸ ונביאיה טחו להם תפל חזים שׁוא וקסמים להם כזב אמרים כה אמר אדני יהוה ויהוה לא דבר׃ ²⁹ עם הארץ עשׁקו עשׁק וגזלו גזל ועני ואביון הונו ואת הגר עשׁקו בלא משׁפט׃ ³⁰ ואבקשׁ מהם אישׁ גדר גדר ועמד בפרץ לפני בעד הארץ לבלתי שׁחתה ולא מצאתי׃ ³¹ ואשׁפך עליהם זעמי באשׁ עברתי כליתים דרכם בראשׁם נתתי נאם אדני יהוה׃