2 Kings 13 בשׁנת עשׂרים ושׁלשׁ שׁנה ליואשׁ בן אחזיהו מלך יהודה מלך יהואחז בן יהוא על ישׂראל בשׁמרון שׁבע עשׂרה שׁנה׃

HOT⁽ⁱ⁾ ¹ בשׁנת עשׂרים ושׁלשׁ שׁנה ליואשׁ בן אחזיהו מלך יהודה מלך יהואחז בן יהוא על ישׂראל בשׁמרון שׁבע עשׂרה שׁנה׃ ² ויעשׂ הרע בעיני יהוה וילך אחר חטאת ירבעם בן נבט אשׁר החטיא את ישׂראל לא סר ממנה׃ ³ ויחר אף יהוה בישׂראל ויתנם ביד חזאל מלך ארם וביד בן הדד בן חזאל כל הימים׃ ⁴ ויחל יהואחז את פני יהוה וישׁמע אליו יהוה כי ראה את לחץ ישׂראל כי לחץ אתם מלך ארם׃ ⁵ ויתן יהוה לישׂראל מושׁיע ויצאו מתחת יד ארם וישׁבו בני ישׂראל באהליהם כתמול שׁלשׁום׃ ⁶ אך לא סרו מחטאות בית ירבעם אשׁר החטי את ישׂראל בה הלך וגם האשׁרה עמדה בשׁמרון׃ ⁷ כי לא השׁאיר ליהואחז עם כי אם חמשׁים פרשׁים ועשׂרה רכב ועשׂרת אלפים רגלי כי אבדם מלך ארם וישׂמם כעפר לדשׁ׃ ⁸ ויתר דברי יהואחז וכל אשׁר עשׂה וגבורתו הלוא הם כתובים על ספר דברי הימים למלכי ישׂראל׃ ⁹ וישׁכב יהואחז עם אבתיו ויקברהו בשׁמרון וימלך יואשׁ בנו תחתיו׃ ¹⁰ בשׁנת שׁלשׁים ושׁבע שׁנה ליואשׁ מלך יהודה מלך יהואשׁ בן יהואחז על ישׂראל בשׁמרון שׁשׁ עשׂרה שׁנה׃ ¹¹ ויעשׂה הרע בעיני יהוה לא סר מכל חטאות ירבעם בן נבט אשׁר החטיא את ישׂראל בה הלך׃ ¹² ויתר דברי יואשׁ וכל אשׁר עשׂה וגבורתו אשׁר נלחם עם אמציה מלך יהודה הלוא הם כתובים על ספר דברי הימים למלכי ישׂראל׃ ¹³ וישׁכב יואשׁ עם אבתיו וירבעם ישׁב על כסאו ויקבר יואשׁ בשׁמרון עם מלכי ישׂראל׃ ¹⁴ ואלישׁע חלה את חליו אשׁר ימות בו וירד אליו יואשׁ מלך ישׂראל ויבך על פניו ויאמר אבי אבי רכב ישׂראל ופרשׁיו׃ ¹⁵ ויאמר לו אלישׁע קח קשׁת וחצים ויקח אליו קשׁת וחצים׃ ¹⁶ ויאמר למלך ישׂראל הרכב ידך על הקשׁת וירכב ידו וישׂם אלישׁע ידיו על ידי המלך׃ ¹⁷ ויאמר פתח החלון קדמה ויפתח ויאמר אלישׁע ירה ויור ויאמר חץ תשׁועה ליהוה וחץ תשׁועה בארם והכית את ארם באפק עד כלה׃ ¹⁸ ויאמר קח החצים ויקח ויאמר למלך ישׂראל הך ארצה ויך שׁלשׁ פעמים ויעמד׃ ¹⁹ ויקצף עליו אישׁ האלהים ויאמר להכות חמשׁ או שׁשׁ פעמים אז הכית את ארם עד כלה ועתה שׁלשׁ פעמים תכה את ארם׃ ²⁰ וימת אלישׁע ויקברהו וגדודי מואב יבאו בארץ בא שׁנה׃ ²¹ ויהי הם קברים אישׁ והנה ראו את הגדוד וישׁליכו את האישׁ בקבר אלישׁע וילך ויגע האישׁ בעצמות אלישׁע ויחי ויקם על רגליו׃ ²² וחזאל מלך ארם לחץ את ישׂראל כל ימי יהואחז׃ ²³ ויחן יהוה אתם וירחמם ויפן אליהם למען בריתו את אברהם יצחק ויעקב ולא אבה השׁחיתם ולא השׁליכם מעל פניו עד עתה׃ ²⁴ וימת חזאל מלך ארם וימלך בן הדד בנו תחתיו׃ ²⁵ וישׁב יהואשׁ בן יהואחז ויקח את הערים מיד בן הדד בן חזאל אשׁר לקח מיד יהואחז אביו במלחמה שׁלשׁ פעמים הכהו יואשׁ וישׁב את ערי ישׂראל׃