HOT(i)
12 והמלאך אשׁר הלך לקרא למיכיהו דבר אליו לאמר הנה דברי הנבאים פה אחד טוב אל המלך ויהי נא דברך כאחד מהם ודברת טוב׃ 13 ויאמר מיכיהו חי יהוה כי את אשׁר יאמר אלהי אתו אדבר׃ 14 ויבא אל המלך ויאמר המלך אליו מיכה הנלך אל רמת גלעד למלחמה אם אחדל ויאמר עלו והצליחו וינתנו בידכם׃ 15 ויאמר אליו המלך עד כמה פעמים אני משׁביעך אשׁר לא תדבר אלי רק אמת בשׁם יהוה׃ 16 ויאמר ראיתי את כל ישׂראל נפוצים על ההרים כצאן אשׁר אין להן רעה ויאמר יהוה לא אדנים לאלה ישׁובו אישׁ לביתו בשׁלום׃ 17 ויאמר מלך ישׂראל אל יהושׁפט הלא אמרתי אליך לא יתנבא עלי טוב כי אם לרע׃