1 Kings 16 ויהי דבר יהוה אל יהוא בן חנני על בעשׁא לאמר׃

HOT⁽ⁱ⁾ ¹ ויהי דבר יהוה אל יהוא בן חנני על בעשׁא לאמר׃ ² יען אשׁר הרימתיך מן העפר ואתנך נגיד על עמי ישׂראל ותלך בדרך ירבעם ותחטא את עמי ישׂראל להכעיסני בחטאתם׃ ³ הנני מבעיר אחרי בעשׁא ואחרי ביתו ונתתי את ביתך כבית ירבעם בן נבט׃ ⁴ המת לבעשׁא בעיר יאכלו הכלבים והמת לו בשׂדה יאכלו עוף השׁמים׃ ⁵ ויתר דברי בעשׁא ואשׁר עשׂה וגבורתו הלא הם כתובים על ספר דברי הימים למלכי ישׂראל׃ ⁶ וישׁכב בעשׁא עם אבתיו ויקבר בתרצה וימלך אלה בנו תחתיו׃ ⁷ וגם ביד יהוא בן חנני הנביא דבר יהוה היה אל בעשׁא ואל ביתו ועל כל הרעה אשׁר עשׂה בעיני יהוה להכעיסו במעשׂה ידיו להיות כבית ירבעם ועל אשׁר הכה אתו׃ ⁸ בשׁנת עשׂרים ושׁשׁ שׁנה לאסא מלך יהודה מלך אלה בן בעשׁא על ישׂראל בתרצה שׁנתים׃ ⁹ ויקשׁר עליו עבדו זמרי שׂר מחצית הרכב והוא בתרצה שׁתה שׁכור בית ארצא אשׁר על הבית בתרצה׃ ¹⁰ ויבא זמרי ויכהו וימיתהו בשׁנת עשׂרים ושׁבע לאסא מלך יהודה וימלך תחתיו׃ ¹¹ ויהי במלכו כשׁבתו על כסאו הכה את כל בית בעשׁא לא השׁאיר לו משׁתין בקיר וגאליו ורעהו׃ ¹² וישׁמד זמרי את כל בית בעשׁא כדבר יהוה אשׁר דבר אל בעשׁא ביד יהוא הנביא׃ ¹³ אל כל חטאות בעשׁא וחטאות אלה בנו אשׁר חטאו ואשׁר החטיאו את ישׂראל להכעיס את יהוה אלהי ישׂראל בהבליהם׃ ¹⁴ ויתר דברי אלה וכל אשׁר עשׂה הלוא הם כתובים על ספר דברי הימים למלכי ישׂראל׃ ¹⁵ בשׁנת עשׂרים ושׁבע שׁנה לאסא מלך יהודה מלך זמרי שׁבעת ימים בתרצה והעם חנים על גבתון אשׁר לפלשׁתים׃ ¹⁶ וישׁמע העם החנים לאמר קשׁר זמרי וגם הכה את המלך וימלכו כל ישׂראל את עמרי שׂר צבא על ישׂראל ביום ההוא במחנה׃ ¹⁷ ויעלה עמרי וכל ישׂראל עמו מגבתון ויצרו על תרצה׃ ¹⁸ ויהי כראות זמרי כי נלכדה העיר ויבא אל ארמון בית המלך וישׂרף עליו את בית מלך באשׁ וימת׃ ¹⁹ על חטאתו אשׁר חטא לעשׂות הרע בעיני יהוה ללכת בדרך ירבעם ובחטאתו אשׁר עשׂה להחטיא את ישׂראל׃ ²⁰ ויתר דברי זמרי וקשׁרו אשׁר קשׁר הלא הם כתובים על ספר דברי הימים למלכי ישׂראל׃ ²¹ אז יחלק העם ישׂראל לחצי חצי העם היה אחרי תבני בן גינת להמליכו והחצי אחרי עמרי׃ ²² ויחזק העם אשׁר אחרי עמרי את העם אשׁר אחרי תבני בן גינת וימת תבני וימלך עמרי׃ ²³ בשׁנת שׁלשׁים ואחת שׁנה לאסא מלך יהודה מלך עמרי על ישׂראל שׁתים עשׂרה שׁנה בתרצה מלך שׁשׁ שׁנים׃ ²⁴ ויקן את ההר שׁמרון מאת שׁמר בככרים כסף ויבן את ההר ויקרא את שׁם העיר אשׁר בנה על שׁם שׁמר אדני ההר שׁמרון׃ ²⁵ ויעשׂה עמרי הרע בעיני יהוה וירע מכל אשׁר לפניו׃ ²⁶ וילך בכל דרך ירבעם בן נבט ובחטאתיו אשׁר החטיא את ישׂראל להכעיס את יהוה אלהי ישׂראל בהבליהם׃ ²⁷ ויתר דברי עמרי אשׁר עשׂה וגבורתו אשׁר עשׂה הלא הם כתובים על ספר דברי הימים למלכי ישׂראל׃ ²⁸ וישׁכב עמרי עם אבתיו ויקבר בשׁמרון וימלך אחאב בנו תחתיו׃ ²⁹ ואחאב בן עמרי מלך על ישׂראל בשׁנת שׁלשׁים ושׁמנה שׁנה לאסא מלך יהודה וימלך אחאב בן עמרי על ישׂראל בשׁמרון עשׂרים ושׁתים שׁנה׃ ³⁰ ויעשׂ אחאב בן עמרי הרע בעיני יהוה מכל אשׁר לפניו׃ ³¹ ויהי הנקל לכתו בחטאות ירבעם בן נבט ויקח אשׁה את איזבל בת אתבעל מלך צידנים וילך ויעבד את הבעל וישׁתחו׃ ³² ויקם מזבח לבעל בית הבעל אשׁר בנה בשׁמרון׃ ³³ ויעשׂ אחאב את האשׁרה ויוסף אחאב לעשׂות להכעיס את יהוה אלהי ישׂראל מכל מלכי ישׂראל אשׁר היו לפניו׃ ³⁴ בימיו בנה חיאל בית האלי את יריחה באבירם בכרו יסדה ובשׂגיב צעירו הציב דלתיה כדבר יהוה אשׁר דבר ביד יהושׁע בן נון׃