Psalms 25:1-30:12 לדוד אליך יהוה נפשׁי אשׂא׃

HOT⁽ⁱ⁾ ¹ לדוד אליך יהוה נפשׁי אשׂא׃ ² אלהי בך בטחתי אל אבושׁה אל יעלצו איבי׃ ³ גם כל קויך לא יבשׁו יבשׁו הבוגדים ריקם׃ ⁴ דרכיך יהוה הודיעני ארחותיך למדני׃ ⁵ הדריכני באמתך ולמדני כי אתה אלהי ישׁעי אותך קויתי כל היום׃ ⁶ זכר רחמיך יהוה וחסדיך כי מעולם המה׃ ⁷ חטאות נעורי ופשׁעי אל תזכר כחסדך זכר לי אתה למען טובך יהוה׃ ⁸ טוב וישׁר יהוה על כן יורה חטאים בדרך׃ ⁹ ידרך ענוים במשׁפט וילמד ענוים דרכו׃ ¹⁰ כל ארחות יהוה חסד ואמת לנצרי בריתו ועדתיו׃ ¹¹ למען שׁמך יהוה וסלחת לעוני כי רב הוא׃ ¹² מי זה האישׁ ירא יהוה יורנו בדרך יבחר׃ ¹³ נפשׁו בטוב תלין וזרעו יירשׁ ארץ׃ ¹⁴ סוד יהוה ליראיו ובריתו להודיעם׃ ¹⁵ עיני תמיד אל יהוה כי הוא יוציא מרשׁת רגלי׃ ¹⁶ פנה אלי וחנני כי יחיד ועני אני׃ ¹⁷ צרות לבבי הרחיבו ממצוקותי הוציאני׃ ¹⁸ ראה עניי ועמלי ושׂא לכל חטאותי׃ ¹⁹ ראה אויבי כי רבו ושׂנאת חמס שׂנאוני׃ ²⁰ שׁמרה נפשׁי והצילני אל אבושׁ כי חסיתי׃ ²¹ תם וישׁר יצרוני כי קויתיך׃ ²² פדה אלהים את ישׂראל מכל צרותיו׃²⁶ ¹ לדוד שׁפטני יהוה כי אני בתמי הלכתי וביהוה בטחתי לא אמעד׃ ² בחנני יהוה ונסני צרופה כליותי ולבי׃ ³ כי חסדך לנגד עיני והתהלכתי באמתך׃ ⁴ לא ישׁבתי עם מתי שׁוא ועם נעלמים לא אבוא׃ ⁵ שׂנאתי קהל מרעים ועם רשׁעים לא אשׁב׃ ⁶ ארחץ בנקיון כפי ואסבבה את מזבחך יהוה׃ ⁷ לשׁמע בקול תודה ולספר כל נפלאותיך׃ ⁸ יהוה אהבתי מעון ביתך ומקום משׁכן כבודך׃ ⁹ אל תאסף עם חטאים נפשׁי ועם אנשׁי דמים חיי׃ ¹⁰ אשׁר בידיהם זמה וימינם מלאה שׁחד׃ ¹¹ ואני בתמי אלך פדני וחנני׃ ¹² רגלי עמדה במישׁור במקהלים אברך יהוה׃²⁷ ¹ לדוד יהוה אורי וישׁעי ממי אירא יהוה מעוז חיי ממי אפחד׃ ² בקרב עלי מרעים לאכל את בשׂרי צרי ואיבי לי המה כשׁלו ונפלו׃ ³ אם תחנה עלי מחנה לא יירא לבי אם תקום עלי מלחמה בזאת אני בוטח׃ ⁴ אחת שׁאלתי מאת יהוה אותה אבקשׁ שׁבתי בבית יהוה כל ימי חיי לחזות בנעם יהוה ולבקר בהיכלו׃ ⁵ כי יצפנני בסכה ביום רעה יסתרני בסתר אהלו בצור ירוממני׃ ⁶ ועתה ירום ראשׁי על איבי סביבותי ואזבחה באהלו זבחי תרועה אשׁירה ואזמרה ליהוה׃ ⁷ שׁמע יהוה קולי אקרא וחנני וענני׃ ⁸ לך אמר לבי בקשׁו פני את פניך יהוה אבקשׁ׃ ⁹ אל תסתר פניך ממני אל תט באף עבדך עזרתי היית אל תטשׁני ואל תעזבני אלהי ישׁעי׃ ¹⁰ כי אבי ואמי עזבוני ויהוה יאספני׃ ¹¹ הורני יהוה דרכך ונחני בארח מישׁור למען שׁוררי׃ ¹² אל תתנני בנפשׁ צרי כי קמו בי עדי שׁקר ויפח חמס׃ ¹³ לולא האמנתי לראות בטוב יהוה בארץ חיים׃ ¹⁴ קוה אל יהוה חזק ויאמץ לבך וקוה אל יהוה׃²⁸ ¹ לדוד אליך יהוה אקרא צורי אל תחרשׁ ממני פן תחשׁה ממני ונמשׁלתי עם יורדי בור׃ ² שׁמע קול תחנוני בשׁועי אליך בנשׂאי ידי אל דביר קדשׁך׃ ³ אל תמשׁכני עם רשׁעים ועם פעלי און דברי שׁלום עם רעיהם ורעה בלבבם׃ ⁴ תן להם כפעלם וכרע מעלליהם כמעשׂה ידיהם תן להם השׁב גמולם להם׃ ⁵ כי לא יבינו אל פעלת יהוה ואל מעשׂה ידיו יהרסם ולא יבנם׃ ⁶ ברוך יהוה כי שׁמע קול תחנוני׃ ⁷ יהוה עזי ומגני בו בטח לבי ונעזרתי ויעלז לבי ומשׁירי אהודנו׃ ⁸ יהוה עז למו ומעוז ישׁועות משׁיחו הוא׃ ⁹ הושׁיעה את עמך וברך את נחלתך ורעם ונשׂאם עד העולם׃²⁹ ¹ מזמור לדוד הבו ליהוה בני אלים הבו ליהוה כבוד ועז׃ ² הבו ליהוה כבוד שׁמו השׁתחוו ליהוה בהדרת קדשׁ׃ ³ קול יהוה על המים אל הכבוד הרעים יהוה על מים רבים׃ ⁴ קול יהוה בכח קול יהוה בהדר׃ ⁵ קול יהוה שׁבר ארזים וישׁבר יהוה את ארזי הלבנון׃ ⁶ וירקידם כמו עגל לבנון ושׂרין כמו בן ראמים׃ ⁷ קול יהוה חצב להבות אשׁ׃ ⁸ קול יהוה יחיל מדבר יחיל יהוה מדבר קדשׁ׃ ⁹ קול יהוה יחולל אילות ויחשׂף יערות ובהיכלו כלו אמר כבוד׃ ¹⁰ יהוה למבול ישׁב וישׁב יהוה מלך לעולם׃ ¹¹ יהוה עז לעמו יתן יהוה יברך את עמו בשׁלום׃³⁰ ¹ מזמור שׁיר חנכת הבית לדוד׃ (30:2) ארוממך יהוה כי דליתני ולא שׂמחת איבי ² (30:3) יהוה אלהי שׁועתי אליך ותרפאני׃ ³ (30:4) יהוה העלית מן שׁאול נפשׁי חייתני מיורדי בור׃ ⁴ (30:5) זמרו ליהוה חסידיו והודו לזכר קדשׁו׃ ⁵ (30:6) כי רגע באפו חיים ברצונו בערב ילין בכי ולבקר רנה׃ ⁶ (30:7) ואני אמרתי בשׁלוי בל אמוט לעולם׃ ⁷ (30:8) יהוה ברצונך העמדתה להררי עז הסתרת פניך הייתי נבהל׃ ⁸ (30:9) אליך יהוה אקרא ואל אדני אתחנן׃ ⁹ (30:10) מה בצע בדמי ברדתי אל שׁחת היודך עפר היגיד אמתך׃ ¹⁰ (30:11) שׁמע יהוה וחנני יהוה היה עזר׃ ¹¹ (30:12) הפכת מספדי למחול לי פתחת שׂקי ותאזרני שׂמחה׃ ¹² (30:13) למען יזמרך כבוד ולא ידם יהוה אלהי לעולם אודך׃