Numbers 28:1-29 וידבר יהוה אל משׁה לאמר׃

HOT⁽ⁱ⁾ ¹ וידבר יהוה אל משׁה לאמר׃ ² צו את בני ישׂראל ואמרת אלהם את קרבני לחמי לאשׁי ריח ניחחי תשׁמרו להקריב לי במועדו׃ ³ ואמרת להם זה האשׁה אשׁר תקריבו ליהוה כבשׂים בני שׁנה תמימם שׁנים ליום עלה תמיד׃ ⁴ את הכבשׂ אחד תעשׂה בבקר ואת הכבשׂ השׁני תעשׂה בין הערבים׃ ⁵ ועשׂירית האיפה סלת למנחה בלולה בשׁמן כתית רביעת ההין׃ ⁶ עלת תמיד העשׂיה בהר סיני לריח ניחח אשׁה ליהוה׃ ⁷ ונסכו רביעת ההין לכבשׂ האחד בקדשׁ הסך נסך שׁכר ליהוה׃ ⁸ ואת הכבשׂ השׁני תעשׂה בין הערבים כמנחת הבקר וכנסכו תעשׂה אשׁה ריח ניחח ליהוה׃ ⁹ וביום השׁבת שׁני כבשׂים בני שׁנה תמימם ושׁני עשׂרנים סלת מנחה בלולה בשׁמן ונסכו׃ ¹⁰ עלת שׁבת בשׁבתו על עלת התמיד ונסכה׃ ¹¹ ובראשׁי חדשׁיכם תקריבו עלה ליהוה פרים בני בקר שׁנים ואיל אחד כבשׂים בני שׁנה שׁבעה תמימם׃ ¹² ושׁלשׁה עשׂרנים סלת מנחה בלולה בשׁמן לפר האחד ושׁני עשׂרנים סלת מנחה בלולה בשׁמן לאיל האחד׃ ¹³ ועשׂרן עשׂרון סלת מנחה בלולה בשׁמן לכבשׂ האחד עלה ריח ניחח אשׁה ליהוה׃ ¹⁴ ונסכיהם חצי ההין יהיה לפר ושׁלישׁת ההין לאיל ורביעת ההין לכבשׂ יין זאת עלת חדשׁ בחדשׁו לחדשׁי השׁנה׃ ¹⁵ ושׂעיר עזים אחד לחטאת ליהוה על עלת התמיד יעשׂה ונסכו׃ ¹⁶ ובחדשׁ הראשׁון בארבעה עשׂר יום לחדשׁ פסח ליהוה׃ ¹⁷ ובחמשׁה עשׂר יום לחדשׁ הזה חג שׁבעת ימים מצות יאכל׃ ¹⁸ ביום הראשׁון מקרא קדשׁ כל מלאכת עבדה לא תעשׂו׃ ¹⁹ והקרבתם אשׁה עלה ליהוה פרים בני בקר שׁנים ואיל אחד ושׁבעה כבשׂים בני שׁנה תמימם יהיו׃ ²⁰ ומנחתם סלת בלולה בשׁמן שׁלשׁה עשׂרנים לפר ושׁני עשׂרנים לאיל תעשׂו׃ ²¹ עשׂרון עשׂרון תעשׂה לכבשׂ האחד לשׁבעת הכבשׂים׃ ²² ושׂעיר חטאת אחד לכפר עליכם׃ ²³ מלבד עלת הבקר אשׁר לעלת התמיד תעשׂו את אלה׃ ²⁴ כאלה תעשׂו ליום שׁבעת ימים לחם אשׁה ריח ניחח ליהוה על עולת התמיד יעשׂה ונסכו׃ ²⁵ וביום השׁביעי מקרא קדשׁ יהיה לכם כל מלאכת עבדה לא תעשׂו׃ ²⁶ וביום הבכורים בהקריבכם מנחה חדשׁה ליהוה בשׁבעתיכם מקרא קדשׁ יהיה לכם כל מלאכת עבדה לא תעשׂו׃ ²⁷ והקרבתם עולה לריח ניחח ליהוה פרים בני בקר שׁנים איל אחד שׁבעה כבשׂים בני שׁנה׃ ²⁸ ומנחתם סלת בלולה בשׁמן שׁלשׁה עשׂרנים לפר האחד שׁני עשׂרנים לאיל האחד׃ ²⁹ עשׂרון עשׂרון לכבשׂ האחד לשׁבעת הכבשׂים׃