Leviticus 11:1-47 וידבר יהוה אל משׁה ואל אהרן לאמר אלהם׃

HOT⁽ⁱ⁾ ¹ וידבר יהוה אל משׁה ואל אהרן לאמר אלהם׃ ² דברו אל בני ישׂראל לאמר זאת החיה אשׁר תאכלו מכל הבהמה אשׁר על הארץ׃ ³ כל מפרסת פרסה ושׁסעת שׁסע פרסת מעלת גרה בבהמה אתה תאכלו׃ ⁴ אך את זה לא תאכלו ממעלי הגרה וממפרסי הפרסה את הגמל כי מעלה גרה הוא ופרסה איננו מפריס טמא הוא׃ ⁵ ואת השׁפן כי מעלה גרה הוא ופרסה לא יפריס טמא הוא׃ ⁶ ואת הארנבת כי מעלת גרה הוא ופרסה לא הפריסה טמאה הוא׃ ⁷ ואת החזיר כי מפריס פרסה הוא ושׁסע שׁסע פרסה והוא גרה לא יגר טמא הוא׃ ⁸ מבשׂרם לא תאכלו ובנבלתם לא תגעו טמאים הם׃ ⁹ את זה תאכלו מכל אשׁר במים כל אשׁר לו סנפיר וקשׂקשׂת במים בימים ובנחלים אתם תאכלו׃ ¹⁰ וכל אשׁר אין לו סנפיר וקשׂקשׂת בימים ובנחלים מכל שׁרץ המים ומכל נפשׁ החיה אשׁר במים שׁקץ הם׃ ¹¹ ושׁקץ יהיו לכם מבשׂרם לא תאכלו ואת נבלתם תשׁקצו׃ ¹² כל אשׁר אין לו סנפיר וקשׂקשׂת במים שׁקץ הוא׃ ¹³ ואת אלה תשׁקצו מן העוף לא יאכלו שׁקץ הם את הנשׁר ואת הפרס ואת העזניה׃ ¹⁴ ואת הדאה ואת האיה למינה׃ ¹⁵ את כל ערב למינו׃ ¹⁶ ואת בת היענה ואת התחמס ואת השׁחף ואת הנץ למינהו׃ ¹⁷ ואת הכוס ואת השׁלך ואת הינשׁוף׃ ¹⁸ ואת התנשׁמת ואת הקאת ואת הרחם׃ ¹⁹ ואת החסידה האנפה למינה ואת הדוכיפת ואת העטלף׃ ²⁰ כל שׁרץ העוף ההלך על ארבע שׁקץ הוא׃ ²¹ אך את זה תאכלו מכל שׁרץ העוף ההלך על ארבע אשׁר לא כרעים ממעל לרגליו לנתר בהן על הארץ׃ ²² את אלה מהם תאכלו את הארבה למינו ואת הסלעם למינהו ואת החרגל למינהו ואת החגב למינהו׃ ²³ וכל שׁרץ העוף אשׁר לו ארבע רגלים שׁקץ הוא׃ ²⁴ ולאלה תטמאו כל הנגע בנבלתם יטמא עד הערב׃ ²⁵ וכל הנשׂא מנבלתם יכבס בגדיו וטמא עד הערב׃ ²⁶ לכל הבהמה אשׁר הוא מפרסת פרסה ושׁסע איננה שׁסעת וגרה איננה מעלה טמאים הם לכם כל הנגע בהם יטמא׃ ²⁷ וכל הולך על כפיו בכל החיה ההלכת על ארבע טמאים הם לכם כל הנגע בנבלתם יטמא עד הערב׃ ²⁸ והנשׂא את נבלתם יכבס בגדיו וטמא עד הערב טמאים המה׃ ²⁹ וזה לכם הטמא בשׁרץ השׁרץ על הארץ החלד והעכבר והצב למינהו׃ ³⁰ והאנקה והכח והלטאה והחמט והתנשׁמת׃ ³¹ אלה הטמאים לכם בכל השׁרץ כל הנגע בהם במתם יטמא עד הערב׃ ³² וכל אשׁר יפל עליו מהם במתם יטמא מכל כלי עץ או בגד או עור או שׂק כל כלי אשׁר יעשׂה מלאכה בהם במים יובא וטמא עד הערב וטהר׃ ³³ וכל כלי חרשׂ אשׁר יפל מהם אל תוכו כל אשׁר בתוכו יטמא ואתו תשׁברו׃ ³⁴ מכל האכל אשׁר יאכל אשׁר יבוא עליו מים יטמא וכל משׁקה אשׁר ישׁתה בכל כלי יטמא׃ ³⁵ וכל אשׁר יפל מנבלתם עליו יטמא תנור וכירים יתץ טמאים הם וטמאים יהיו׃ ³⁶ אך מעין ובור מקוה מים יהיה טהור ונגע בנבלתם יטמא׃ ³⁷ וכי יפל מנבלתם על כל זרע זרוע אשׁר יזרע טהור הוא׃ ³⁸ וכי יתן מים על זרע ונפל מנבלתם עליו טמא הוא׃ ³⁹ וכי ימות מן הבהמה אשׁר היא לכם לאכלה הנגע בנבלתה יטמא עד הערב׃ ⁴⁰ והאכל מנבלתה יכבס בגדיו וטמא עד הערב והנשׂא את נבלתה יכבס בגדיו וטמא עד הערב׃ ⁴¹ וכל השׁרץ השׁרץ על הארץ שׁקץ הוא לא יאכל׃ ⁴² כל הולך על גחון וכל הולך על ארבע עד כל מרבה רגלים לכל השׁרץ השׁרץ על הארץ לא תאכלום כי שׁקץ הם׃ ⁴³ אל תשׁקצו את נפשׁתיכם בכל השׁרץ השׁרץ ולא תטמאו בהם ונטמתם׃ ⁴⁴ כי אני יהוה אלהיכם והתקדשׁתם והייתם קדשׁים כי קדושׁ אני ולא תטמאו את נפשׁתיכם בכל השׁרץ הרמשׂ על הארץ׃ ⁴⁵ כי אני יהוה המעלה אתכם מארץ מצרים להית לכם לאלהים והייתם קדשׁים כי קדושׁ אני׃ ⁴⁶ זאת תורת הבהמה והעוף וכל נפשׁ החיה הרמשׂת במים ולכל נפשׁ השׁרצת על הארץ׃ ⁴⁷ להבדיל בין הטמא ובין הטהר ובין החיה הנאכלת ובין החיה אשׁר לא תאכל׃