Leviticus 10 ויקחו בני אהרן נדב ואביהוא אישׁ מחתתו ויתנו בהן אשׁ וישׂימו עליה קטרת ויקריבו לפני יהוה אשׁ זרה אשׁר לא צוה אתם׃

HOT⁽ⁱ⁾ ¹ ויקחו בני אהרן נדב ואביהוא אישׁ מחתתו ויתנו בהן אשׁ וישׂימו עליה קטרת ויקריבו לפני יהוה אשׁ זרה אשׁר לא צוה אתם׃ ² ותצא אשׁ מלפני יהוה ותאכל אותם וימתו לפני יהוה׃ ³ ויאמר משׁה אל אהרן הוא אשׁר דבר יהוה לאמר בקרבי אקדשׁ ועל פני כל העם אכבד וידם אהרן׃ ⁴ ויקרא משׁה אל מישׁאל ואל אלצפן בני עזיאל דד אהרן ויאמר אלהם קרבו שׂאו את אחיכם מאת פני הקדשׁ אל מחוץ למחנה׃ ⁵ ויקרבו וישׂאם בכתנתם אל מחוץ למחנה כאשׁר דבר משׁה׃ ⁶ ויאמר משׁה אל אהרן ולאלעזר ולאיתמר בניו ראשׁיכם אל תפרעו ובגדיכם לא תפרמו ולא תמתו ועל כל העדה יקצף ואחיכם כל בית ישׂראל יבכו את השׂרפה אשׁר שׂרף יהוה׃ ⁷ ומפתח אהל מועד לא תצאו פן תמתו כי שׁמן משׁחת יהוה עליכם ויעשׂו כדבר משׁה׃ ⁸ וידבר יהוה אל אהרן לאמר׃ ⁹ יין ושׁכר אל תשׁת אתה ובניך אתך בבאכם אל אהל מועד ולא תמתו חקת עולם לדרתיכם׃ ¹⁰ ולהבדיל בין הקדשׁ ובין החל ובין הטמא ובין הטהור׃ ¹¹ ולהורת את בני ישׂראל את כל החקים אשׁר דבר יהוה אליהם ביד משׁה׃ ¹² וידבר משׁה אל אהרן ואל אלעזר ואל איתמר בניו הנותרים קחו את המנחה הנותרת מאשׁי יהוה ואכלוה מצות אצל המזבח כי קדשׁ קדשׁים הוא׃ ¹³ ואכלתם אתה במקום קדושׁ כי חקך וחק בניך הוא מאשׁי יהוה כי כן צויתי׃ ¹⁴ ואת חזה התנופה ואת שׁוק התרומה תאכלו במקום טהור אתה ובניך ובנתיך אתך כי חקך וחק בניך נתנו מזבחי שׁלמי בני ישׂראל׃ ¹⁵ שׁוק התרומה וחזה התנופה על אשׁי החלבים יביאו להניף תנופה לפני יהוה והיה לך ולבניך אתך לחק עולם כאשׁר צוה יהוה׃ ¹⁶ ואת שׂעיר החטאת דרשׁ דרשׁ משׁה והנה שׂרף ויקצף על אלעזר ועל איתמר בני אהרן הנותרם לאמר׃ ¹⁷ מדוע לא אכלתם את החטאת במקום הקדשׁ כי קדשׁ קדשׁים הוא ואתה נתן לכם לשׂאת את עון העדה לכפר עליהם לפני יהוה׃ ¹⁸ הן לא הובא את דמה אל הקדשׁ פנימה אכול תאכלו אתה בקדשׁ כאשׁר צויתי׃ ¹⁹ וידבר אהרן אל משׁה הן היום הקריבו את חטאתם ואת עלתם לפני יהוה ותקראנה אתי כאלה ואכלתי חטאת היום הייטב בעיני יהוה׃ ²⁰ וישׁמע משׁה וייטב בעיניו׃