Exodus 30 ועשׂית מזבח מקטר קטרת עצי שׁטים תעשׂה אתו׃

HOT⁽ⁱ⁾ ¹ ועשׂית מזבח מקטר קטרת עצי שׁטים תעשׂה אתו׃ ² אמה ארכו ואמה רחבו רבוע יהיה ואמתים קמתו ממנו קרנתיו׃ ³ וצפית אתו זהב טהור את גגו ואת קירתיו סביב ואת קרנתיו ועשׂית לו זר זהב סביב׃ ⁴ ושׁתי טבעת זהב תעשׂה לו מתחת לזרו על שׁתי צלעתיו תעשׂה על שׁני צדיו והיה לבתים לבדים לשׂאת אתו בהמה׃ ⁵ ועשׂית את הבדים עצי שׁטים וצפית אתם זהב׃ ⁶ ונתתה אתו לפני הפרכת אשׁר על ארן העדת לפני הכפרת אשׁר על העדת אשׁר אועד לך שׁמה׃ ⁷ והקטיר עליו אהרן קטרת סמים בבקר בבקר בהיטיבו את הנרת יקטירנה׃ ⁸ ובהעלת אהרן את הנרת בין הערבים יקטירנה קטרת תמיד לפני יהוה לדרתיכם׃ ⁹ לא תעלו עליו קטרת זרה ועלה ומנחה ונסך לא תסכו עליו׃ ¹⁰ וכפר אהרן על קרנתיו אחת בשׁנה מדם חטאת הכפרים אחת בשׁנה יכפר עליו לדרתיכם קדשׁ קדשׁים הוא ליהוה׃ ¹¹ וידבר יהוה אל משׁה לאמר׃ ¹² כי תשׂא את ראשׁ בני ישׂראל לפקדיהם ונתנו אישׁ כפר נפשׁו ליהוה בפקד אתם ולא יהיה בהם נגף בפקד אתם׃ ¹³ זה יתנו כל העבר על הפקדים מחצית השׁקל בשׁקל הקדשׁ עשׂרים גרה השׁקל מחצית השׁקל תרומה ליהוה׃ ¹⁴ כל העבר על הפקדים מבן עשׂרים שׁנה ומעלה יתן תרומת יהוה׃ ¹⁵ העשׁיר לא ירבה והדל לא ימעיט ממחצית השׁקל לתת את תרומת יהוה לכפר על נפשׁתיכם׃ ¹⁶ ולקחת את כסף הכפרים מאת בני ישׂראל ונתת אתו על עבדת אהל מועד והיה לבני ישׂראל לזכרון לפני יהוה לכפר על נפשׁתיכם׃ ¹⁷ וידבר יהוה אל משׁה לאמר׃ ¹⁸ ועשׂית כיור נחשׁת וכנו נחשׁת לרחצה ונתת אתו בין אהל מועד ובין המזבח ונתת שׁמה מים׃ ¹⁹ ורחצו אהרן ובניו ממנו את ידיהם ואת רגליהם׃ ²⁰ בבאם אל אהל מועד ירחצו מים ולא ימתו או בגשׁתם אל המזבח לשׁרת להקטיר אשׁה ליהוה׃ ²¹ ורחצו ידיהם ורגליהם ולא ימתו והיתה להם חק עולם לו ולזרעו לדרתם׃ ²² וידבר יהוה אל משׁה לאמר׃ ²³ ואתה קח לך בשׂמים ראשׁ מר דרור חמשׁ מאות וקנמן בשׂם מחציתו חמשׁים ומאתים וקנה בשׂם חמשׁים ומאתים׃ ²⁴ וקדה חמשׁ מאות בשׁקל הקדשׁ ושׁמן זית הין׃ ²⁵ ועשׂית אתו שׁמן משׁחת קדשׁ רקח מרקחת מעשׂה רקח שׁמן משׁחת קדשׁ יהיה׃ ²⁶ ומשׁחת בו את אהל מועד ואת ארון העדת׃ ²⁷ ואת השׁלחן ואת כל כליו ואת המנרה ואת כליה ואת מזבח הקטרת׃ ²⁸ ואת מזבח העלה ואת כל כליו ואת הכיר ואת כנו׃ ²⁹ וקדשׁת אתם והיו קדשׁ קדשׁים כל הנגע בהם יקדשׁ׃ ³⁰ ואת אהרן ואת בניו תמשׁח וקדשׁת אתם לכהן׃ ³¹ ואל בני ישׂראל תדבר לאמר שׁמן משׁחת קדשׁ יהיה זה לי לדרתיכם׃ ³² על בשׂר אדם לא ייסך ובמתכנתו לא תעשׂו כמהו קדשׁ הוא קדשׁ יהיה׃ ³³ אישׁ אשׁר ירקח כמהו ואשׁר יתן ממנו על זר ונכרת מעמיו׃ ³⁴ ויאמר יהוה אל משׁה קח לך סמים נטף ושׁחלת וחלבנה סמים ולבנה זכה בד בבד יהיה׃ ³⁵ ועשׂית אתה קטרת רקח מעשׂה רוקח ממלח טהור קדשׁ׃ ³⁶ ושׁחקת ממנה הדק ונתתה ממנה לפני העדת באהל מועד אשׁר אועד לך שׁמה קדשׁ קדשׁים תהיה׃ ³⁷ והקטרת אשׁר תעשׂה במתכנתה לא תעשׂו לכם קדשׁ תהיה לך ליהוה׃ ³⁸ אישׁ אשׁר יעשׂה כמוה להריח בה ונכרת מעמיו׃