HOT(i)
31 ועשׂית מנרת זהב טהור מקשׁה תיעשׂה המנורה ירכה וקנה גביעיה כפתריה ופרחיה ממנה יהיו׃ 32 ושׁשׁה קנים יצאים מצדיה שׁלשׁה קני מנרה מצדה האחד ושׁלשׁה קני מנרה מצדה השׁני׃ 33 שׁלשׁה גבעים משׁקדים בקנה האחד כפתר ופרח ושׁלשׁה גבעים משׁקדים בקנה האחד כפתר ופרח כן לשׁשׁת הקנים היצאים מן המנרה׃ 34 ובמנרה ארבעה גבעים משׁקדים כפתריה ופרחיה׃ 35 וכפתר תחת שׁני הקנים ממנה וכפתר תחת שׁני הקנים ממנה וכפתר תחת שׁני הקנים ממנה לשׁשׁת הקנים היצאים מן המנרה׃ 36 כפתריהם וקנתם ממנה יהיו כלה מקשׁה אחת זהב טהור׃ 37 ועשׂית את נרתיה שׁבעה והעלה את נרתיה והאיר על עבר פניה׃ 38 ומלקחיה ומחתתיה זהב טהור׃