Exodus 25 וידבר יהוה אל משׁה לאמר׃

HOT⁽ⁱ⁾ ¹ וידבר יהוה אל משׁה לאמר׃ ² דבר אל בני ישׂראל ויקחו לי תרומה מאת כל אישׁ אשׁר ידבנו לבו תקחו את תרומתי׃ ³ וזאת התרומה אשׁר תקחו מאתם זהב וכסף ונחשׁת׃ ⁴ ותכלת וארגמן ותולעת שׁני ושׁשׁ ועזים׃ ⁵ וערת אילם מאדמים וערת תחשׁים ועצי שׁטים׃ ⁶ שׁמן למאר בשׂמים לשׁמן המשׁחה ולקטרת הסמים׃ ⁷ אבני שׁהם ואבני מלאים לאפד ולחשׁן׃ ⁸ ועשׂו לי מקדשׁ ושׁכנתי בתוכם׃ ⁹ ככל אשׁר אני מראה אותך את תבנית המשׁכן ואת תבנית כל כליו וכן תעשׂו׃ ¹⁰ ועשׂו ארון עצי שׁטים אמתים וחצי ארכו ואמה וחצי רחבו ואמה וחצי קמתו׃ ¹¹ וצפית אתו זהב טהור מבית ומחוץ תצפנו ועשׂית עליו זר זהב סביב׃ ¹² ויצקת לו ארבע טבעת זהב ונתתה על ארבע פעמתיו ושׁתי טבעת על צלעו האחת ושׁתי טבעת על צלעו השׁנית׃ ¹³ ועשׂית בדי עצי שׁטים וצפית אתם זהב׃ ¹⁴ והבאת את הבדים בטבעת על צלעת הארן לשׂאת את הארן׃ ¹⁵ בטבעת הארן יהיו הבדים לא יסרו ממנו׃ ¹⁶ ונתת אל הארן את העדת אשׁר אתן אליך׃ ¹⁷ ועשׂית כפרת זהב טהור אמתים וחצי ארכה ואמה וחצי רחבה׃ ¹⁸ ועשׂית שׁנים כרבים זהב מקשׁה תעשׂה אתם משׁני קצות הכפרת׃ ¹⁹ ועשׂה כרוב אחד מקצה מזה וכרוב אחד מקצה מזה מן הכפרת תעשׂו את הכרבים על שׁני קצותיו׃ ²⁰ והיו הכרבים פרשׂי כנפים למעלה סככים בכנפיהם על הכפרת ופניהם אישׁ אל אחיו אל הכפרת יהיו פני הכרבים׃ ²¹ ונתת את הכפרת על הארן מלמעלה ואל הארן תתן את העדת אשׁר אתן אליך׃ ²² ונועדתי לך שׁם ודברתי אתך מעל הכפרת מבין שׁני הכרבים אשׁר על ארון העדת את כל אשׁר אצוה אותך אל בני ישׂראל׃ ²³ ועשׂית שׁלחן עצי שׁטים אמתים ארכו ואמה רחבו ואמה וחצי קמתו׃ ²⁴ וצפית אתו זהב טהור ועשׂית לו זר זהב סביב׃ ²⁵ ועשׂית לו מסגרת טפח סביב ועשׂית זר זהב למסגרתו סביב׃ ²⁶ ועשׂית לו ארבע טבעת זהב ונתת את הטבעת על ארבע הפאת אשׁר לארבע רגליו׃ ²⁷ לעמת המסגרת תהיין הטבעת לבתים לבדים לשׂאת את השׁלחן׃ ²⁸ ועשׂית את הבדים עצי שׁטים וצפית אתם זהב ונשׂא בם את השׁלחן׃ ²⁹ ועשׂית קערתיו וכפתיו וקשׂותיו ומנקיתיו אשׁר יסך בהן זהב טהור תעשׂה אתם׃ ³⁰ ונתת על השׁלחן לחם פנים לפני תמיד׃ ³¹ ועשׂית מנרת זהב טהור מקשׁה תיעשׂה המנורה ירכה וקנה גביעיה כפתריה ופרחיה ממנה יהיו׃ ³² ושׁשׁה קנים יצאים מצדיה שׁלשׁה קני מנרה מצדה האחד ושׁלשׁה קני מנרה מצדה השׁני׃ ³³ שׁלשׁה גבעים משׁקדים בקנה האחד כפתר ופרח ושׁלשׁה גבעים משׁקדים בקנה האחד כפתר ופרח כן לשׁשׁת הקנים היצאים מן המנרה׃ ³⁴ ובמנרה ארבעה גבעים משׁקדים כפתריה ופרחיה׃ ³⁵ וכפתר תחת שׁני הקנים ממנה וכפתר תחת שׁני הקנים ממנה וכפתר תחת שׁני הקנים ממנה לשׁשׁת הקנים היצאים מן המנרה׃ ³⁶ כפתריהם וקנתם ממנה יהיו כלה מקשׁה אחת זהב טהור׃ ³⁷ ועשׂית את נרתיה שׁבעה והעלה את נרתיה והאיר על עבר פניה׃ ³⁸ ומלקחיה ומחתתיה זהב טהור׃ ³⁹ ככר זהב טהור יעשׂה אתה את כל הכלים האלה׃ ⁴⁰ וראה ועשׂה בתבניתם אשׁר אתה מראה בהר׃