2 Samuel 7 ויהי כי ישׁב המלך בביתו ויהוה הניח לו מסביב מכל איביו׃

HOT⁽ⁱ⁾ ¹ ויהי כי ישׁב המלך בביתו ויהוה הניח לו מסביב מכל איביו׃ ² ויאמר המלך אל נתן הנביא ראה נא אנכי יושׁב בבית ארזים וארון האלהים ישׁב בתוך היריעה׃ ³ ויאמר נתן אל המלך כל אשׁר בלבבך לך עשׂה כי יהוה עמך׃ ⁴ ויהי בלילה ההוא ויהי דבר יהוה אל נתן לאמר׃ ⁵ לך ואמרת אל עבדי אל דוד כה אמר יהוה האתה תבנה לי בית לשׁבתי׃ ⁶ כי לא ישׁבתי בבית למיום העלתי את בני ישׂראל ממצרים ועד היום הזה ואהיה מתהלך באהל ובמשׁכן׃ ⁷ בכל אשׁר התהלכתי בכל בני ישׂראל הדבר דברתי את אחד שׁבטי ישׂראל אשׁר צויתי לרעות את עמי את ישׂראל לאמר למה לא בניתם לי בית ארזים׃ ⁸ ועתה כה תאמר לעבדי לדוד כה אמר יהוה צבאות אני לקחתיך מן הנוה מאחר הצאן להיות נגיד על עמי על ישׂראל׃ ⁹ ואהיה עמך בכל אשׁר הלכת ואכרתה את כל איביך מפניך ועשׂתי לך שׁם גדול כשׁם הגדלים אשׁר בארץ׃ ¹⁰ ושׂמתי מקום לעמי לישׂראל ונטעתיו ושׁכן תחתיו ולא ירגז עוד ולא יסיפו בני עולה לענותו כאשׁר בראשׁונה׃ ¹¹ ולמן היום אשׁר צויתי שׁפטים על עמי ישׂראל והניחתי לך מכל איביך והגיד לך יהוה כי בית יעשׂה לך יהוה׃ ¹² כי ימלאו ימיך ושׁכבת את אבתיך והקימתי את זרעך אחריך אשׁר יצא ממעיך והכינתי את ממלכתו׃ ¹³ הוא יבנה בית לשׁמי וכננתי את כסא ממלכתו עד עולם׃ ¹⁴ אני אהיה לו לאב והוא יהיה לי לבן אשׁר בהעותו והכחתיו בשׁבט אנשׁים ובנגעי בני אדם׃ ¹⁵ וחסדי לא יסור ממנו כאשׁר הסרתי מעם שׁאול אשׁר הסרתי מלפניך׃ ¹⁶ ונאמן ביתך וממלכתך עד עולם לפניך כסאך יהיה נכון עד עולם׃ ¹⁷ ככל הדברים האלה וככל החזיון הזה כן דבר נתן אל דוד׃ ¹⁸ ויבא המלך דוד וישׁב לפני יהוה ויאמר מי אנכי אדני יהוה ומי ביתי כי הביאתני עד הלם׃ ¹⁹ ותקטן עוד זאת בעיניך אדני יהוה ותדבר גם אל בית עבדך למרחוק וזאת תורת האדם אדני יהוה׃ ²⁰ ומה יוסיף דוד עוד לדבר אליך ואתה ידעת את עבדך אדני יהוה׃ ²¹ בעבור דברך וכלבך עשׂית את כל הגדולה הזאת להודיע את עבדך׃ ²² על כן גדלת אדני יהוה כי אין כמוך ואין אלהים זולתך בכל אשׁר שׁמענו באזנינו׃ ²³ ומי כעמך כישׂראל גוי אחד בארץ אשׁר הלכו אלהים לפדות לו לעם ולשׂום לו שׁם ולעשׂות לכם הגדולה ונראות לארצך מפני עמך אשׁר פדית לך ממצרים גוים ואלהיו׃ ²⁴ ותכונן לך את עמך ישׂראל לך לעם עד עולם ואתה יהוה היית להם לאלהים׃ ²⁵ ועתה יהוה אלהים הדבר אשׁר דברת על עבדך ועל ביתו הקם עד עולם ועשׂה כאשׁר דברת׃ ²⁶ ויגדל שׁמך עד עולם לאמר יהוה צבאות אלהים על ישׂראל ובית עבדך דוד יהיה נכון לפניך׃ ²⁷ כי אתה יהוה צבאות אלהי ישׂראל גליתה את אזן עבדך לאמר בית אבנה לך על כן מצא עבדך את לבו להתפלל אליך את התפלה הזאת׃ ²⁸ ועתה אדני יהוה אתה הוא האלהים ודבריך יהיו אמת ותדבר אל עבדך את הטובה הזאת׃ ²⁹ ועתה הואל וברך את בית עבדך להיות לעולם לפניך כי אתה אדני יהוה דברת ומברכתך יברך בית עבדך לעולם׃