HOT(i)
14 ובהוציאם את הכסף המובא בית יהוה מצא חלקיהו הכהן את ספר תורת יהוה ביד משׁה׃ 15 ויען חלקיהו ויאמר אל שׁפן הסופר ספר התורה מצאתי בבית יהוה ויתן חלקיהו את הספר אל שׁפן׃ 16 ויבא שׁפן את הספר אל המלך וישׁב עוד את המלך דבר לאמר כל אשׁר נתן ביד עבדיך הם עשׂים׃ 17 ויתיכו את הכסף הנמצא בבית יהוה ויתנוהו על יד המפקדים ועל יד עושׂי המלאכה׃ 18 ויגד שׁפן הסופר למלך לאמר ספר נתן לי חלקיהו הכהן ויקרא בו שׁפן לפני המלך׃ 19 ויהי כשׁמע המלך את דברי התורה ויקרע את בגדיו׃