HOT(i)
11 (2:10) ויאמר חורם מלך צר בכתב וישׁלח אל שׁלמה באהבת יהוה את עמו נתנך עליהם מלך׃ 12 (2:11) ויאמר חורם ברוך יהוה אלהי ישׂראל אשׁר עשׂה את השׁמים ואת הארץ אשׁר נתן לדויד המלך בן חכם יודע שׂכל ובינה אשׁר יבנה בית ליהוה ובית למלכותו׃ 13 (2:12) ועתה שׁלחתי אישׁ חכם יודע בינה לחורם אבי׃ 14 (2:13) בן אשׁה מן בנות דן ואביו אישׁ צרי יודע לעשׂות בזהב ובכסף בנחשׁת בברזל באבנים ובעצים בארגמן בתכלת ובבוץ ובכרמיל ולפתח כל פתוח ולחשׁב כל מחשׁבת אשׁר ינתן לו עם חכמיך וחכמי אדני דויד אביך׃ 15 (2:14) ועתה החטים והשׂערים השׁמן והיין אשׁר אמר אדני ישׁלח לעבדיו׃ 16 (2:15) ואנחנו נכרת עצים מן הלבנון ככל צרכך ונביאם לך רפסדות על ים יפו ואתה תעלה אתם ירושׁלם׃