Romans 8:3-13 For that that was vnpossible to the lawe, in what thing it was sijk bi flesch, God sente his sone in to the licknesse of fleisch of synne, and of synne dampnede synne in fleisch;

Wycliffe⁽ⁱ⁾ ³ For that that was vnpossible to the lawe, in what thing it was sijk bi flesch, God sente his sone in to the licknesse of fleisch of synne, and of synne dampnede synne in fleisch; ⁴ that the iustefiyng of the lawe were fulfillid in vs, that goen not aftir the fleisch, but aftir the spirit. ⁵ For thei that ben aftir the fleisch, saueren tho thingis that ben of the fleisch; but thei that ben after the spirit, feelen tho thingis that ben of the spirit. For the prudence of fleisch is deth; ⁶ but the prudence of spirit is lijf and pees. ⁷ For the wisdom of the fleisch is enemye to God; for it is not suget to the lawe of God, for nether it may. ⁸ And thei that ben in fleisch, moun not plese to God. ⁹ But ye ben not in fleisch, but in spirit; if netheles the spirit of God dwellith in you. But if ony hath not the spirit of Crist, this is not his. ¹⁰ For if Crist is in you, the bodi is deed for synne, but the spirit lyueth for iustefiyng. ¹¹ And if the spirit of hym that reiside Jhesu Crist fro deth dwellith in you, he that reiside Jhesu Crist fro deth, shal quykene also youre deedli bodies, for the spirit of hym that dwellith in you. ¹² Therfor, britheren, we ben dettouris, not to the flesch, that we lyuen aftir the flesch. ¹³ For if ye lyuen aftir the fleisch, ye schulen die; but if ye bi the spirit sleen the dedis of the fleisch, ye schulen lyue.