Wycliffe(i)
27 But Y seie to you that heren, loue ye youre enemyes, do ye wel to hem that hatiden you;
28 blesse ye men that cursen you, preye ye for men that defamen you.
29 And to him that smytith thee on o cheeke, schewe also the tothir; and fro hym that takith awei fro thee a cloth, nyle thou forbede the coote.
30 And yyue to eche that axith thee, and if a man takith awei tho thingis that ben thine, axe thou not ayen.