Acts 28:24-28 And summe bileueden to these thingis that weren seid of Poul, summe bileueden not.

Wycliffe⁽ⁱ⁾ ²⁴ And summe bileueden to these thingis that weren seid of Poul, summe bileueden not. ²⁵ And whanne thei weren not consentinge togidir, thei departiden. And Poul seide o word, For the Hooli Goost spak wel bi Ysaye, the profete, to oure fadris, ²⁶ and seide, Go thou to this puple, and seie to hem, With eere ye schulen here, and ye schulen not vndirstonde; and ye seynge schulen se, and ye schulen not biholde. ²⁷ For the herte of this puple is greetli fattid, and with eeris thei herden heuyli, and thei closiden togider her iyen, lest perauenture thei se with iyen, and with eeris here, and bi herte vndurstonde, and be conuertid, and Y hele hem. ²⁸ Therfor be it knowun to you, that this helthe of God is sent to hethen men, and thei schulen here.