2 John 1:1-3 John 1:15 The eldere man, to the chosun ladi, and to her children, whiche Y loue in treuthe; and not Y aloone, but also alle men that knowen treuthe;

Wycliffe⁽ⁱ⁾ ¹ The eldere man, to the chosun ladi, and to her children, whiche Y loue in treuthe; and not Y aloone, but also alle men that knowen treuthe; ² for the treuthe that dwellith in you, and with you schal be with outen ende. ³ Grace be with you, merci, and pees of God the fadir, and of Jhesu Crist, the sone of the fadir, in treuthe and charite. ⁴ I ioiede ful myche, for Y foond of thi sones goynge in treuthe, as we resseyueden maundement of the fadir. ⁵ And now Y preye thee, ladi, not as writinge a newe maundement to thee, but that that we hadden fro the bigynnyng, that we loue ech other. ⁶ And this is charite, that we walke after his maundementis. For this is the comaundement, that as ye herden at the bigynnyng, walke ye in hym. ⁷ For many disseyueris wenten out in to the world, which knoulechen not that Jhesu Crist hath come in fleisch; this is a disseyuere and antecrist. ⁸ Se ye you silf, lest ye lesen the thingis that ye han wrouyt, that ye resseyue ful mede; ⁹ witynge that ech man that goith bifore, and dwellith not in the teching of Crist, hath not God. He that dwellith in the teching, hath bothe the sone and the fadir. ¹⁰ If ony man cometh to you, and bryngith not this teching, nyle ye resseyue hym in to hous, nether seie ye to hym, Heil. ¹¹ For he that seith to hym, Heil, comyneth with hise yuel werkis. Lo! Y biforseide to you, that ye be not confoundid in the dai of oure Lord Jhesu Crist. ¹² Y haue mo thingis to write to you, and Y wolde not bi parchemyn and enke; for Y hope that Y schal come to you, and speke mouth to mouth, that your ioye be ful. ¹³ The sones of thi chosun sistir greten thee wel. The grace of God be with thee. Amen.

3 John

¹ The eldere man to Gayus, most dere brother, whom Y loue in treuthe. ² Most dere brothir, of alle thingis Y make preyer, that thou entre, and fare welefuly, as thi soule doith welefuli. ³ Y ioyede greetli, for britheren camen, and baren witnessing to thi treuthe, `as thou walkist in treuthe. ⁴ Y haue not more grace of these thingis, than that Y here that my sones walke in treuthe. ⁵ Most dere brother, thou doist feithfuli, what euer thou worchist in britheren, and that in to pilgrymys, ⁶ which yeldiden witnessing to thi charite, in the siyt of the chirche; which thou leddist forth, and doist wel worthili to God. ⁷ For thei wenten forth for his name, and token no thing of hethene men. ⁸ Therfor we owen to resseyue siche, that we be euen worcheris of treuthe. ⁹ I hadde write perauenture to the chirche, but this Diotrepes, that loueth to bere primacie in hem, resseyueth not vs. ¹⁰ For this thing, if Y schal come, Y schal moneste hise werkis, whiche he doith, chidinge ayens vs with yuel wordis. And as if these thingis suffisen not to hym, nether he resseyueth britheren, and forbedith hem that resseyuen, and puttith out of the chirche. ¹¹ Moost dere brothir, nyle thou sue yuel thing, but that that is good thing. He that doith wel, is of God; he that doith yuel, seeth not God. ¹² Witnessing is yoldun to Demetrie of alle men, and of treuthe it silf; but also we beren witnessing, and thou knowist, that oure witnessing is trewe. ¹³ Y hadde many thingis to wryte to thee, but Y wolde not write to thee bi enke and penne. ¹⁴ For Y hope soone to se thee, and we schulen speke mouth to mouth. Pees be to thee. Frendis greten thee wel. Greete thou wel frendis bi name.