Zechariah 4

HOT^{(i) 1} וישׁב המלאך הדבר בי ויעירני כאישׁ אשׁר יעור משׁנתו׃ ² ויאמר אלי מה אתה ראה ויאמר ראיתי והנה מנורת זהב כלה וגלה על ראשׁה ושׁבעה נרתיה עליה שׁבעה ושׁבעה מוצקות לנרות אשׁר על ראשׁה׃ ³ ושׁנים זיתים עליה אחד מימין הגלה ואחד על שׂמאלה׃ ⁴ ואען ואמר אל המלאך הדבר בי לאמר מה אלה אדני׃ ⁵ ויען המלאך הדבר בי ויאמר אלי הלוא ידעת מה המה אלה ואמר לא אדני׃ ⁶ ויען ויאמר אלי לאמר זה דבר יהוה אל זרבבל לאמר לא בחיל ולא בכח כי אם ברוחי אמר יהוה צבאות׃ ⁷ מי אתה הר הגדול לפני זרבבל למישׁר והוציא את האבן הראשׁה תשׁאות חן חן׃ ⁸ ויהי דבר יהוה אלי לאמר׃ ⁹ ידי זרבבל יסדו הבית הזה וידיו תבצענה וידעת כי יהוה צבאות שׁלחני אליכם׃ ¹⁰ כי מי בז ליום קטנות ושׂמחו וראו את האבן הבדיל ביד זרבבל שׁבעה אלה עיני יהוה המה משׁוטטים בכל הארץ׃ ¹¹ ואען ואמר אליו מה שׁני הזיתים האלה על ימין המנורה ועל שׂמאולה׃ ¹² ואען שׁנית ואמר אליו מה שׁתי שׁבלי הזיתים אשׁר ביד שׁני צנתרות הזהב המריקים מעליהם הזהב׃ ¹³ ויאמר אלי לאמר הלוא ידעת מה אלה ואמר לא אדני׃ ¹⁴ ויאמר אלה שׁני בני היצהר העמדים על אדון כל הארץ׃