Ezra 10:7-12

HOT^{(i) 7} ויעבירו קול ביהודה וירושׁלם לכל בני הגולה להקבץ ירושׁלם׃ ⁸ וכל אשׁר לא יבוא לשׁלשׁת הימים כעצת השׂרים והזקנים יחרם כל רכושׁו והוא יבדל מקהל הגולה׃ ⁹ ויקבצו כל אנשׁי יהודה ובנימן ירושׁלם לשׁלשׁת הימים הוא חדשׁ התשׁיעי בעשׂרים בחדשׁ וישׁבו כל העם ברחוב בית האלהים מרעידים על הדבר ומהגשׁמים׃ ¹⁰ ויקם עזרא הכהן ויאמר אלהם אתם מעלתם ותשׁיבו נשׁים נכריות להוסיף על אשׁמת ישׂראל׃ ¹¹ ועתה תנו תודה ליהוה אלהי אבתיכם ועשׂו רצונו והבדלו מעמי הארץ ומן הנשׁים הנכריות׃ ¹² ויענו כל הקהל ויאמרו קול גדול כן כדבריך עלינו לעשׂות׃