Ezekiel 24:3-14

HOT^{(i) 3} ומשׁל אל בית המרי משׁל ואמרת אליהם כה אמר אדני יהוה שׁפת הסיר שׁפת וגם יצק בו מים׃ ⁴ אסף נתחיה אליה כל נתח טוב ירך וכתף מבחר עצמים מלא׃ ⁵ מבחר הצאן לקוח וגם דור העצמים תחתיה רתח רתחיה גם בשׁלו עצמיה בתוכה׃ ⁶ לכן כה אמר אדני יהוה אוי עיר הדמים סיר אשׁר חלאתה בה וחלאתה לא יצאה ממנה לנתחיה לנתחיה הוציאה לא נפל עליה גורל׃ ⁷ כי דמה בתוכה היה על צחיח סלע שׂמתהו לא שׁפכתהו על הארץ לכסות עליו עפר׃ ⁸ להעלות חמה לנקם נקם נתתי את דמה על צחיח סלע לבלתי הכסות׃ ⁹ לכן כה אמר אדני יהוה אוי עיר הדמים גם אני אגדיל המדורה׃ ¹⁰ הרבה העצים הדלק האשׁ התם הבשׂר והרקח המרקחה והעצמות יחרו׃ ¹¹ והעמידה על גחליה רקה למען תחם וחרה נחשׁתה ונתכה בתוכה טמאתה תתם חלאתה׃ ¹² תאנים הלאת ולא תצא ממנה רבת חלאתה באשׁ חלאתה׃ ¹³ בטמאתך זמה יען טהרתיך ולא טהרת מטמאתך לא תטהרי עוד עד הניחי את חמתי׃ ¹⁴ אני יהוה דברתי באה ועשׂיתי לא אפרע ולא אחוס ולא אנחם כדרכיך וכעלילותיך שׁפטוך נאם אדני יהוה׃