HOT(i)
27 ויאמר יהוה אל משׁה כתב לך את הדברים האלה כי על פי הדברים האלה כרתי אתך ברית ואת ישׂראל׃ 28 ויהי שׁם עם יהוה ארבעים יום וארבעים לילה לחם לא אכל ומים לא שׁתה ויכתב על הלחת את דברי הברית עשׂרת הדברים׃ 29 ויהי ברדת משׁה מהר סיני ושׁני לחת העדת ביד משׁה ברדתו מן ההר ומשׁה לא ידע כי קרן עור פניו בדברו אתו׃ 30 וירא אהרן וכל בני ישׂראל את משׁה והנה קרן עור פניו וייראו מגשׁת אליו׃ 31 ויקרא אלהם משׁה וישׁבו אליו אהרן וכל הנשׂאים בעדה וידבר משׁה אלהם׃ 32 ואחרי כן נגשׁו כל בני ישׂראל ויצום את כל אשׁר דבר יהוה אתו בהר סיני׃ 33 ויכל משׁה מדבר אתם ויתן על פניו מסוה׃ 34 ובבא משׁה לפני יהוה לדבר אתו יסיר את המסוה עד צאתו ויצא ודבר אל בני ישׂראל את אשׁר יצוה׃ 35 וראו בני ישׂראל את פני משׁה כי קרן עור פני משׁה והשׁיב משׁה את המסוה על פניו עד באו לדבר אתו׃