Leviticus 14:55 Cross References - Wycliffe

⁵⁵ and of smytyng, of lepre of clothis, and of housis,

⁴⁷ A wollun cloth, ethir lynnun, that hath lepre in the warp, ⁴⁸ ethir oof, ethir certis a skyn, ether what euer thing is maad of skiyn, ⁴⁹ if it is corrupt with a whijt spotte, ethir reed, it schal be arettid lepre, and it schal be schewid to the preest; ⁵⁰ which schal close it biholden bi seuene daies. ⁵¹ And eft he schal biholde in the seuenthe dai, and if he perseyueth, that it wexide, it schal be contynuel lepre; he schal deme the cloth defoulid, and al thing in which it is foundun; ⁵² and therfor the cloth schal be brent in flawmes. ⁵³ That if he seeth that the spotte wexide not, he schal comaunde, ⁵⁴ and thei schulen waische that thing wherynne the lepre is, and he schal close it ayen bi seuene othere daies; ⁵⁵ and whanne he seeth the formere face not turned ayen, netheles that nether the lepre wexede, he schal deme that thing vnclene, and he schal brenne it in fier, for lepre is sched in the ouer part of the cloth, ether thorouy al. ⁵⁶ Ellis if the `place of lepre is derkere, aftir that the cloth is waischun, he schal breke awey that place, and schal departe fro the hool. <sup>57</sup> That if fleynge lepre and vnstidefast apperith ferthermore in these places, that weren vnwemmed bifore, it owith be brent in fier; if it ceessith, <sup>58</sup> he schal waische the secounde tyme tho thingis that ben cleene, and tho schulen be cleene. <sup>59</sup> This is the lawe of lepre of cloth, wollun and lynnun, of warp and of oof, and of al purtenaunce of skiyn, hou it owith to be clensyd, ethir `to be defoulid.