John 18:19 Cross References - Wycliffe

¹⁹ And the bischop axide Jhesu of hise disciplis, and of his techyng.

⁵⁹ And the prince of prestis, and al the counsel souyten fals witnessing ayens Jhesu, that thei schulden take hym to deeth; ⁶⁰ and thei founden not, whanne manye false witnessis weren comun. But at the laste, twei false witnessis camen, ⁶¹ and seiden, `This seide, Y may distruye the temple of God, and after the thridde dai bilde it ayen. <sup>62</sup> And the prince of prestis roos, and seide to hym, Answerist thou no thing to tho thingis, that these witnessen ayens thee? <sup>63</sup> But Jhesus was stille. And the prince of prestis seide to hym, Y coniure thee bi lyuynge God, that thou seie to vs, if thou art Crist, the sone of God. <sup>64</sup> Jhesus seide to him, Thou hast seid; netheles Y seie to you, `fro hennus forth ye schulen se mannus sone sittinge at the riythalf of the vertu of God, and comynge in the cloudis of heuene. ⁶⁵ Thanne the prince of prestis to-rente his clothis, and seide, He hath blasfemed; what yit han we nede to witnessis? lo! now ye han herd blasfemye; what semeth to you? ⁶⁶ And thei answeriden, and seiden, He is gilti of deeth. ⁶⁷ Thanne thei speten `in to his face, and smyten hym with buffatis; and othere yauen strokis with the pawme of her hondis in his face, ⁶⁸ and seide, Thou Crist, arede to vs, who is he that smoot thee?

⁵⁵ And the hiyest prestis, and al the counsel, souyten witnessyng ayens Jhesu to take hym to the deeth; but thei founden not. ⁵⁶ For manye seiden fals witnessyng ayens hym, and the witnessyngis weren not couenable. ⁵⁷ And summe risen vp, and baren fals witnessyng ayens hym, ⁵⁸ and seiden, For we `han herd hym seiynge, Y schal vndo this temple maad with hondis, and aftir the thridde dai Y schal bilde another not maad with hondis. <sup>59</sup> And the witnessyng `of hem was not couenable. ⁶⁰ And the hiyest prest roos vp in to the myddil, and axide Jhesu, and seide, Answerist thou no thing to tho thingis that ben put ayens thee of these? ⁶¹ But he was stille, and answeride no thing. Eftsoone the hiyest prest axide hym, and seide to hym, Art thou Crist, the sone of the blessid God? ⁶² And Jhesus seide to hym, Y am; and ye schulen se mannus sone sittynge on the riythalf of the vertu of God, and comynge in the cloudis of heuene. ⁶³ And the hiyest preest torente hise clothis, and seide, What yit dissiren we witnessis? ⁶⁴ Ye han herd blasfemye. What semeth to you? And thei alle condempneden hym to be gilti of deeth. ⁶⁵ And summe bigunnen to bispete hym, `and to hile his face, and to smite hym with buffetis, and seie to hym, Areede thou. And the mynystris beeten hym with strokis.

⁵³ And whanne he seide these thingis to hem, the Farisees and wise men of lawe bigunnen greuousli to ayenstonde, and stoppe his mouth of many thingis, ⁵⁴ aspiynge hym, and sekynge to take sum thing of his mouth, to accuse hym.

²⁰ And thei aspieden, and senten aspieris, that feyneden hem iust, that thei schulden take hym in word, and bitaak hym to the `power of the prince, and to the power of the iustice.

⁶³ And the men that helden hym scorneden hym, and smyten hym. ⁶⁴ And thei blynfelden hym, and smyten his face, and axiden hym, and seiden, Arede, thou Crist, to vs, who is he that smoot thee? ⁶⁵ Also thei blasfemynge seiden ayens hym many other thingis. ⁶⁶ And as the day was come, the eldre men of the puple, and the princis of prestis, and the scribis camen togidir, and ledden hym in to her councel, ⁶⁷ and seiden, If thou art Crist, seie to vs. ⁶⁸ And he seide to hem, If Y seie to you, ye schulen not bileue to me; and if Y axe, ye schulen not answere to me, nethir ye schulen delyuere me. ⁶⁹ But aftir this tyme mannys sone schal be sittynge on the riyt half of the vertu of God. ⁷⁰ Therfor alle seiden, Thanne art thou the sone of God? And he seide, Ye seien that Y am. ⁷¹ And thei seiden, What yit desiren we witnessyng? for we vs silf han herd of his mouth.