Mark 13:1 Cross References - WestSaxon990

¹ Ða he of þam temple eode þa cwæð än of his leorning-cnihtum to him. lareow loca hwylce stanas her synt & hwylce getimbrunga þisses temples;

¹ & þa se hælend ut-eode of þam temple. him tö-genealæhton hys leorning-cnihtas. þt hi him ætywdon þæs temples getimbrunge. ² þa &swarode he him & cwæð; Ge-seoþ ge eall þis. Soð ic secge eow. ne bið her læfed stan uppan stane þe ne beo to-worpen; ³ Ða he sæt uppan oliuetes dune þa comun hys leorningcnihtas dihlice & cwædon; Sege us hwænne þas ðing gewurþun. & hwilc tacn si þines to-cymys & worulde ge-endunge; ⁴ Ða &swarode he him & cwæð. warniað þt eow nan ne beswice; ⁵ Manega cumaþ on minum naman & cweðaþ; Ic eom crist. & beswicaþ manega; ⁶ Witodlice ge gehyrað gefeoht & gefeohta hlisan. warnigeað þt ge ne beon gedrefede; Ðas þing sceolun gewurþan. ac nys þonne gyt se ende; ⁷ Þeod winð ongen þeode & rice ongen rice. & mann-cwealmas beoð & hungras wide geond land & eorþan styrunga ⁸ ealle þas þing synt þæra sara anginnu; ⁹ Ðonne syllað hi eow on gedrefednysse. & ofsleað eow & ealle menn eow hatigeað for minum naman ¹⁰ & þonne beoð manega unge-trywsode & belæwað betwyx him & hatigað him be-twynan; ¹¹ & manega lease witegan cumað & beswicað manega. ¹² & forþam þe unryhtwisnys rixað manegra lufu acolaþ; ¹³ Witodlice seþe þurhwunað oð ende se byþ hal; ¹⁴ & þis godspel byþ bodod ofer ealle eorþan on gewittnysse eallum þeodum & þonne cymð seo ge-endung; ¹⁵ Ðonne ge ge-seoð þa onsceonunge þære toworpennysse þe se witega. gecwæð daniel. þa he stod on haligre stowe. ongyte seðe hit ræt; ¹⁶ Fleon þonne to muntum þa þe on iudea lande synt. ¹⁷ & seþe ys uppan hys huse ne gä he nyþyr þt he ænig þing on his huse fecce ¹⁸ & seþe is on æcyre. ne cyrre he þt he hys tunecan nyme; ¹⁹ Wä eacniendum & fedendum on þam dagum. ²⁰ biddað þt eower fleam on wintra oððe on reste-dæge ne gewurþe; ²¹ Witodlice þonne byð swa mycel gedeorf swa næs of middan-geardes fruman oþ þis; Ne nü ne ge-wurð; ²² & buton þa dagas gescyrte wærun. nære nan mann hal gewordyn; Ac for þam ge-corenum þe he geceas þa dagas beoð gescyrte; ²³ Ðonne gyf eow hwa segð nu crist ys her oþþe ðær. ne gelyfe ge him; ²⁴ Þonne cumað lease cristas & lease witegan. & doð mycle tacn & fore-beacn þt ðä beoþ on ge-dwolan gelædde gyf hyt beon mæg þe ge-corene wærun; ²⁵ Witodlice ic hyt eow fore-sæde; ²⁶ Gyf hig eow secgeað her he ys on westene ne fare ge üt. gyf hig secgeað her he is on þurh-ferun ne ge-lyfe ge; ²⁷ Wito[d]lice swa swa lïgyt færð fram est-dæle & æt-ywð oþ west-dæl. swa byð mannes suna to-cyme; ²⁸ Swa hwær swa hold byþ þæder beoð earnas gegaderude; ²⁹ Sona æfter þæra daga ge-drefydnesse seo sunne byð for-sworcen & se mona hys leoht ne sylð & steorran feallaþ of þære heofenan. & þære heofenan mægenu beoþ astyrede. ³⁰ & þonne æt-ywð mannes suna tacn on heofonan. & þonne wepað ealle eorþan mægþa. & geseoð mannes sunu cumende on heofonan genipod. mid myclum mægene & mægenþrymme. ³¹ & he asent hys englas mid byman & mycelre stefne. & hï ge-gaderigað hys gecorenan. of feower middan-eardes endum of heofona heahnyssum oð hyra gemæru; ³² Leornigeað big-spell be þam fic-treowwe þonne hys twig byþ hnesce & leaf acennede. ge witun þt sumor ys gehende ³³ & wite ge swa þonne ge þas þing geseoð þt he ys on durum gehende; ³⁴ Soð ic secge eow þt ðeos cneorys ne gewit ærþam þe ealle þas þing gewurðon; ³⁵ Heofone & eorþe gewitað. witodlice mine word ne gewitað; ³⁶ Nat nan mann be þam dæge ne be þære tide ne furðun englas buton fæder äna; ³⁷ Witodlice swa swa on nöes dagum wæs. swa byð mannes suna tocyme. ³⁸ swa hi wærun on þam dagum ær þam flode. etende & drincynde & wifigende & gyfta syllende. oð þone dæg þe nöe on þa earce eode. ³⁹ & hi nysðon ær þt flod com & nam hig ealle. swa byð mannes suna töcyme; ⁴⁰ Ðonne beoð twegen on æcyre. än byð genumen & oðer byþ læfyd. ⁴¹ Twa beoð æt cwyrne grindende. än byð genumen & oðer byþ læfed; Twegen beoþ on bedde. än byð ge-numen & oþer byð læfed; ⁴² [Note: Ðys godspel sceal to mænies confessores mæsse-dæge. ] Wacigeað [Note: The capital W is written as Ð. ] witodlice forþam þe ge nyton on hwylcyre tide eower hlaford cuman wyle; ⁴³ Witað þt gyf se hiredes ealdor wiste on hwylcere tide se þeof töwerd wære. witodlice he wolde wacigean & nolde geþafigen þt man hys hus under-dulfe; ⁴⁴ & for-þam beo gë gearwe. forþam ðe mannes sunnu (sic) wyle cuman on þære tide þe ge nyton; ⁴⁵ Wens þu (sic) hwa sy getrywe & gleaw þeow. þone geset hys hlafurd ofer his hired. þt he him on tide mete sylle; ⁴⁶ Eadi ys se þeow þe hys hlafurd hyne gemët þus dondne þonne he cymð; ⁴⁷ Soþ ic eow secge þt ofer eall þt he ah he hyne gesett; ⁴⁸ Gyf se yfela þeowa ðencþ on hys heortan & cwyþ. min hlafurd uferað hys cyme. ⁴⁹ & agynð beatan hys efen-þeowas. & yt & drincþ mid druncenum. ⁵⁰ þonne cymþ ðæs weles hlaford on þam dæge ðe he nä ne wenþ & on ðære tide þe he nat. ⁵¹ & todælþ hyne & asett hys dæl mid liccetterum. þær byþ wop & toþa gristbitung;

⁵ & þa cwæð he to þam þe sædon be þam temple. þt hit wære geglenged mid gödum stänum & godum gifum. ⁶ Þas þing þe ge geseoð þa dagas cumað on þam ne bið stan læfed ofer stan. þe ne beo to-worpen; ⁷ Þa ahsodon hig hine la bebeodend hwænne beoð þas þing. & hwylce tacna beoð þonne þas þing gewurðaþ; ⁸ Ða cwæþ he warniað þt ge ne syn beswicene. manege cumað on minum naman. & cweðað; Ic hit eom & tïd genealæcð; ne fare ge æfter him ⁹ ne beo ge bregede þonne ge geseoð gefeoht and twy-rædnessa; Ðas þing gebyrigeað æryst ac nys þonne gyt ende; ¹⁰ Ða cwæð he to him þeod arist agen þeode & rice agen rïce ¹¹ & beoð mycele eorþan styrunga geond stowa. & cwealmas & hungor. & egsan of heofone & mycele tacna beoð. ¹² ac toforan eallum þissum hig nimað eow & ehtað & syððan eow on gesamnunga. & on hyrdnyssa & lædaþ eow to cyningum & to demum for mïnum naman. ¹³ þis eow gebyrað on gewitnesse; ¹⁴ Ne sceole ge on eowrum heortum fore-smeagan hu ge &swarian. ¹⁵ ic sylle eow muð & wïsdom. þam ne magon ealle eower wiðer-winnan wið-ständan & wið-cweðan; ¹⁶ Ge beoð gesealde fram mägum & gebroðrum & cuðum & freondum. & hig eow to deaðe geswencað. ¹⁷ & ge beoð eallum on hatunga. for minum naman. ¹⁸ & ne for-wyrð a locc of eowrum heafde; ¹⁹ On eowrum geþylde ge gehealdað eowre sawla; ²⁰ [Note: Ðys godspell gebyrað on wodnes dæg on þære .xi. ucan ofer pentecosten. Respondens iesus dixit discipulis suis. Cum autem uideritis circumdari ab exercitu. A. Cum uideritis, &c. B. ] Þonne ge geseoð hierusalem mid here betrymede. witað þt hyre toworpennes genealæcð. ²¹ þonne fleoð on muntas þa ðe on iudea synt & nyðer ne astigað þa ðe on hyre middele synt. & into hyre ne magon þa ðe þar-ute synt ²² forþam ðe þis synt wrace dagas þt ealle þing syn gefyllede þe awritene synt; ²³ Soðlice wä eacnigendum wïfe & fedendum on þam dagum þonne bið mycel of-þriccednys ofer eorðan. & yrre þisum folce. ²⁴ & hig feallað on swurdes ecge. & beoð hæftlingas on ealle þeoda; Hierusalem bið fram þeodum fortreden oð mægða tïda synt gefyllede; ²⁵ And beoð tacna on sunnan & on monan & on steorrum & on eorðan. þeoda for-þriccednys. for gedrefednesse sæs swëges. & yða ²⁶ bifigendum mannum. for ege & anbide þe eallum ymbe-hwyrfte to-becumað; Ðonne beoð heofones myhta astyrede. ²⁷ & þonne hig geseoð mannes sunu on lyfte cumende mid mycelum anwalde & mægen-þrymme; ²⁸ Ðonne þas þing agynnað beseoð & eowre heafdu üp-ahebbaþ. forþam ðe eower alysednes geNealæcð; ²⁹ Ða sæde he him sum big-spel. behealdað þæne fic-beam & ealle trywu ³⁰ þonne hig wæstm brincgað. ge witun þt sumor ys gehende; ³¹ And þonne ge þas þing geseoð witað þt godes rïce is gehende; ³² Soðlice ic eow secge þt þeos cneores ne gewit ærþam þe ealle þas ðing gewurþon; ³³ Heofen & eorðe gewitaþ soðlice mïne word ne gewitað; ³⁴ [Note: Ðys godspel gebyrað on frige-dæg on þære end-leftan wucan ofer pentecosten. A.B. Adtendite uobis ne grauentur corda uestra in crapula & ebrietate & curis. A. ] Warniaþ eow þe-læs eower heortan gehefegude syn on ofer-fylle & on druncennesse & þises lifes carum & on eow se færlica dæg be-cume ³⁵ swa swa grin; He be-cymþ on ealle þa ðe sittað ofer eorðan ansyne; ³⁶ Waciað on ælcere tïde & bidað þt ge wurðe syn. þt ge þas towerdan þing for-fleon. & standan beforan mannes suna;